އަދުގެ ސަރުކާރުން ފުޓުބޯޅަ ދަނޑުތައް އަޅާ މިންވަރު ގިނަ ކަން ފީފާގެ ރައީސް ޖިއާނީ އިންފެންޓީނޯއަށް އެނގިލެއްވުމުން އޭނާ ހުންނެވީ ކޮސްވެފައި ކަމަށާ، އެހާވެސް ގިނަ ދަނޑުތައް މި ސަރުކާރުން އަޅަމުން ގެންދާ ކަމަށް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވަނީ އަދުގެ ސަރުކާރުން ފުޓުބޯޅަ ކުރިއަރުވައި ދިރުވުމަށް ކުރަމުންދާ މަސައްކަތްތަކާއި ގުޅޭގޮތުން މަހްލޫފް އާއި ސުވާލު ކުރައްވާފައެވެ.
ސެމްބެ ގެ އެ ސުވާލަށް ޖަވާބު ދެއްވަމުން ރާއްޖޭގައި ދިރުވައި ކުރިއަރުވަން ސަރުކާރުން ވަރަށް ބޮޑެތި މައްސައްކަތްތަކެއް ކުރަމުން އަންނަކަން ފާހަގަކުރައްވައި އޭގެ މިސާލެއްގެ ގޮތުން މަހްލޫފް ވަނީ ސަރުކާރުން އަޅަމުންދާ ފުޓްބޯޅަ ދަނޑުތައް ނަންގަވާފައެވެ.
"މިއަހަރު ތެރޭ އިރާދަކުރެއްވިއްޔާ 50 ވަނަ ދަނޑު އަޅުގަނޑުމެން ހުޅުވައިދޭނަން. ހިމަންދޫ މިއަދު އެ ހަވާލުކުރީ ނިންމާފައި. މީގެ ކުރިން، ސަރުކާރަކުން އަޅާލަދިން އެންމެ ފުޓްބޯޅަދަނޑެއް ވެސް ނެތް. އިންފަންޓީނޯއާ ދިމާވެގެން، ފުޓްބޯޅަދަނޑު އަޅާ ވާހަމަ ބުނީމާ ހުރީ ކޮސްވެފައި. އެހެންނު ވާނީ ކުޑަކުޑަ ގައުމެއްގައި އަޅުގަނޑުމެން ގޮސް 300 މީހުންނަށް ވެސް އެބަ އަޅާލަދެން ދަނޑު،" މަހުލޫފު ވިދާޅުވި އެވެ.
މަހުލޫފު ވިދާޅުވީ ފުޓްބޯޅަ ކުރިއަރުވަން ސަރުކާރުން ވަރަށް ބޮޑު އެއްބާރުލުމަކާއި ސަމާލު ކަމެއް ދެއްވާކަމަށެވެ. އެހެންނަމަވެސް މައްސަލަ އޮތީ ރާއްޖޭގެ ޓޮޕް ލީގުގެ ތެރޭގައި ކަމަށާ، އެކަން ހައްލުކުރަން ވެސް މިނިސްޓްރީން ދެވެން އޮތް ހުރިހާ އެއްބާރުލުމެއް އެފްއޭމަށް ދެމުން އަންނަ ކަމަށެވެ.
Advertisement
This content is created and paid for by advertisers and does not involve Voice Journalists
