"ޘާބިތު ޙައްޖު އެންޑް ޢުމްރާ" ގުރޫޕާއި އެކު ޢުމްރާއަށް ގޮސް އުޅެނިކޮށް ގެއްލުނު މީހާ ފެނިއްޖެ އެވެ. 

"ޘާބިތު ޙައްޖު އެންޑް ޢުމްރާ" ޖަމާޢަތުން ގެއްލިގެން ހޯދީ އެ ޖަމިއްޔާގެ ހަވާލުގައި ޢުމްރާއަށް ގޮސް އުޅުނު، ހއ. ހޯރަފުށީ، ނޫވިލާގެ، ފާޠިމަތު ވަޙީދާ ކަމަށެވެ. 

ފާތިމަތު ވަހީދާގެ އައިލާ އާއި ހަވާލާދީ "ޘާބިތު ޙައްޖު އެންޑް ޢުމްރާ" ގުރޫޕުން ބުނީ، އޭނާ ޢާއިލާގެ އެހެން ބޭފުޅުންނާއެކު ދަމުނަމާދަށް ދިއުމަށްފަހު، މޯބައިލް، ކާރޑު އަދި ދަބަސް ބޭއްވުމަށްފަހު ޢާއިލާގެ މެންބަރުންނާއި ދުރަށް ގޮސްފައިވަނީ ރޭ ގާތްގަނޑަކަށް 00:15 ގައި ކަމަށެވެ. އަދި އެ ދިޔަ ގޮތަށް އެނބު ހޮޓަލަށް އައިސްފައި ނުވާ ކަމަށާ، އެކަން އެ ގުރޫޕަށް ޢާއިލާގެ ފަރާތުން އެންގީ ރޭ ދަންވަރު 02:40 ގައި ކަމަށެވެ. 

އޭގެ ފަހުން އޭނާ ހޯދުމުންދާ ކަމަށް އެ ގުރޫޕުން މީގެ ކުރިން ބުނެފައިވާއިރު، ދާދި ދެންމެ އެ ގުރޫޕުން ކޮށްފައިވާ ޕޯސްޓެއްގައި ބުނީ، އޭނާ ފެނިފައިވާ ކަމަށެވެ. އަދި އޭނާ ފެނިފައިވަނީ އެހެން ޖަމާޢަތެއްގެ މީހަކާއި ދިމާވެގެން އެ ހޮޓަލަށް ގޮސް ހުއްޓައި ކަމަށާ، އެ މީހާ އެތަނުގައި ހުރިކަން އެންގީ އެ ހޮޓަލުގައި ހުރި މީހާގެ ވައިބާ ނަންބަރުން ޢާއިލާ އަށް ގުޅައިގެން ކަމަށްވެސް ޘާބިތު ޙައްޖު އެންޑް ޢުމްރާ ގުރޫޕުން މަޢުލޫމާތު ދެއެވެ. އަދި ގެއްލިގެން ހޯދަމުންދިޔަ މީހާގެ ހާލު ރަނގަޅު ކަމަށްވެސް އެ ގުރޫޕުން ބުނެއެވެ.