މަޖިލީހުގެ ރިޔާސަތުގައި އިންނަވައިގެން އެމްޑީޕީގެ ރައީސް މުޙައްމަދު ނަޝީދު ސަރުކާރަށް ޖެއްސުން ކުރައްވަމުން ގެންދަވާ ކަމަށާއި، އެމްޑީޕީ އިސްލާހު ކުރުމަށް އަޅާ އެންމެ ފުރަތަމަ ފިޔަވަޅެއްގެ ގޮތުން މަޖިލީހުގެ ރިޔާސަތު ބަދަލުކުރަން ޖެހޭކަމަށް އެމްޑީޕީގެ ޕީޖީ ގުރޫޕުގައި ހިމެނިވަޑައިގަންނަވާ މަރަދޫ ދާއިރާގެ މެމްބަރު މުޙައްމަދު ޝަރީފު (މަވޯޓާ) ވިދާޅުވެއްޖެ އެވެ. 

ޝަރީފު މިފަދައިން ވިދާޅުވެފައިވަނީ އެމްޑީޕީގެ ޗެއާޕާސަން ފައްޔާޒު ޢިސްމާއީލް އެޕާޓީގެ ރައީސް މުހައްމަދު ނަޝީދާއި ފިކުރެއްގެ ދިރުން ފެކްޝަނުގެ މެންބަރުންނަށް ބަހުގެ ހަމަލާތަކެއް ރައްދުކުރައްވާފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ. 

އެ ޓްވީޓުގައި ޝަރީފު ވިދާޅުވީ ރައްޔިތުންގެ މަޖިލީސް މިހާރު ހިނގަމުންދަނީ އެއްވެސް ހަމައެއް ލަމައެއް ނެތި ކަމަށެވެ. މިހާރު މަޖިލީހުގައި ކުރާހާވެސް ކަމަކީ އެކު ނަންނަމުގައި ޤަރާރުތައް ހުށައަޅުއްވައިގެން މަޖިލީހުގެ ވަގުތުތައް ބޭކާރުކުރުންކަމަށް އޭނާ ވިދާޅުވި އެވެ. އަދި ވިދާޅުވީ ރައްޔިތުންނާއި ގުޅުން އޮތް ކަންކަމުގެ ބަހުސް އޮންނަނީ ފަސް ކޮށްފައި ކަމަށެވެ. 

Advertisement

ޝަރީފު އިތުރަށް ވިދާޅުވީ ރިޔާސަތުގައި އިންނަވާ ނަޝީދު ސަރުކާރަށް ޖެއްސުން ކުރައްވަމުން ގެންދަވާއިރުވެސް ސަރުކާރަށް ތާއީދު ކުރައްވާ މެމްބަރުން މަޑުން ތިއްބަވަނީ ކެތްތެރިކަން އިސްކުރުމަށް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު އިރުޝާދުދެއްވަމުން ގެންދަވާތީ ކަމަށެވެ. 

އެހެން ނަމަވެސް އިޚްތިރާމުކޮށްގެން ތިބެވޭނީ ވަކި ވަރަކަށް ކަމަށް އެމްޑީޕީގެ ޗެއާ ޕާސަން ފައްޔާޒު އިސްމާއިލް ވިދާޅުވުމުން، އެ ވިދާޅުވުމުގެ މާނައާއި ދޭތެރޭގައި ވިސްނަން ޖެހޭކަމަށް ޝަރީފު ވިދާޅުވި އެވެ. 

އެމް.ޑީ.ޕީ ފުނޑުފުނޑު ކޮށްލުމަށް ފުރުސަތު ނުދެއްވާނެކަމަށް ފައްޔާޒު ވިދާޅުވާނަމަ އެންމެ ފުރަތަމަ ކުރައްވަން ޖެހިވަޑައިގަންނަވާނެ ކަމަކީ ރައްޔިތުންގެ މަޖިލީހުގެ ރިޔާސަތު ބަދަލުކުރުންކަމަށް އޭނާ ވިދާޅުވި އެވެ. 

ޝަރީފު މިފަދައިން ވިދާޅުވެފައިވާއިރު، މަޖިލީހުގައި ތިއްބަވާ ސަރުކާރަށް ތާއީދު ކުރައްވާ މެމްބަރުން ވަނީ ދެ ފަހަރެއްގެ މަތިން މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ ވޯޓު ނެގުމަށް މަސައްކަތް ކޮށްފަ އެވެ.