މީގެ ތިން އަހަރު ކުރިން ވަޅި އަކުން ހަމަލާދީ ހުޅުމާލޭގައި މަރާލި ޓެކްސީ ޑްރައިވަރ ގާސިމް ހަސަންގެ ގާތިލް, ޅ. ހިންނަވަރު, ބޮޑުހިޔާގެ, އަދުހަމް މުހައްމަދު މަރަން ކްރިމިނަލް ކޯޓްއިން މިއަދު ހުކުމް ކޮށްފިއެވެ.

2019 ވަނަ އަހަރުގެ ޑިސެމްބަރު 04 ގައި އދ. މާމިގިލިއަށް ނިސްބަތްވާ ޓެކްސީ ޑްރައިވަރ ގާސިމް ހަސަންއަށް ވަޅިއަކުން ހަމަލާދީ މަރާލައިފާވަނީ ގާސިމްގެ ކާރުގެ ފަހަތު ސީޓްގައި އިން އަދުހަމް ފޭރުމަށް ކުރި މަަސައްކަތް ނާކާމިޔާބުވުމާއި ގުޅިގެންނެވެ. އަދުހަމް މި މައްސަލާގައި ހައްޔަރު ކޮށްފައިވަނީ އެއަހަރުގެ 15 ޑިސެމްބަރުގައެވެ.

މި މައްސަލައާއި ގުޅިގެން މިދިޔަ މަހު 19 ގައި ބޭއްވުނު އަޑުއެހުމުގައި އަދުހަމްގެ މައްޗަށް ކުށް ސާބިތުވެއްޖެ ކަމަށް ކްރިމިނަލް ކޯޓްއިން ވަނީ ކަނޑައަޅާފައެވެ.

Advertisement

މިއަށްފަހު ހެކިންގެ ހެކިބަސް ނެގުމަށް އަޑުއެހުމެއް ބާއްވާ ގާސިމްގެ ވާރިސުން ދެނެގަނެފައިވަނީ މިދިޔަ މަހު 30 ގައެވެ. އެގޮތުން ހެކިން ބުނި ގޮތުގައި ގާސިމް މަރުވިއިރު އޭނާގެ މައިންބަފައިންނާއި އަންހެނުން ދުނިޔޭގައި ނެތް ނަމަވެސް އޭނާގެ 5 ދަރިން ތިއްބެވެ.

މިއަދު ގާސިމްގެ ވާރިސުންގެ ބަސް ނެގުމަށް ކްރިމިނަލް ކޯޓްގައި ވަނީ އަޑު އެހުމެއް ބާއްވާފައެވެ. ގާސިމްގެ ހުރިހާ ވާރިސުންވެސް ވަނީ މަރަށް މަރު ހިފަން ބޭނުންވާކަމަށް ބުނެފައެވެ.

މި އަޑުއެހުމުގައި އަދުހަމް ވަނީ ވާރިސުންގެ ކިބައިން މާފަށް އެދިފައެވެ. އަދި އެއީ އޭނާ ގަސްތުގައި ކުރިކަމެއް ނޫން ކަމަށް އަދުހަމް ވަނީ ބުނެފައެވެ.

މި މަހު 19 ގައި އަދުހަމްގެ މައްޗަށް ކުށް ސާބިތު ކުރުމަށް ބޭއްވުނު އަޑުއެހުމުގައި ގާޒީ އަލީ ނަދީމް ވިދާޅުވެފައިވަނީ ގާސިމް މަރާލި ސަރަހައްދުން ފެނުނު ވަޅިން އަދުހަމްގެ ޑީއެންއޭ ފެނިފައިވާތީ ވަޅި ހެރިކަމާއިމެދު އެއްވެސް ޝައްކެއް ނެތް މިންވަރަށް ޔަގީންވާ ކަމަށެވެ.

އަދި ވަޅީގެ ހަމަލާއާއިމެދު އެކި ފަހަރު އެކި ގޮތަށް ވާހަކަދެއްކި ނަމަވެސް ކޮންމެ ފަހަރަކުވެސް ވަޅި ހެރި ކަމަށް އަދުހަމް އެއްބަސްވެފައިވާކަމަށެވެ.

އަދުހަމް ވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއަށް އިއުތިރާފްވެ އެއަށްފަހު އޮތް ބައްދަލުވުމެއްގައި އޭނާ އެކަން ކުރީ މަސްތުގެ ހާލަތުގައިކަމަށާއި ގަސްތުގައި ނޫން ކަމަށް ބުނެފައެވެ.

މިކަމާއި ގުޅިގެން ގާޒީ ނަދީމް ވިދާޅުވެފައިވަނީ ކުށުގެ ވެށިން ފިލުމަށް އަދުހަމް ކުރި މަސައްކަތުންވެސް މިއީ ގަސްތުގައި ކޮށްފައިވާ ކަމެއްކަން ހާމަވާކަމަށާއި މީހުން ދިރިނޫޅޭ ހިސާބެއްގައި ހިނގި އެ ހާދިސާއަށް ފަހު ގާސިމަށް އެހީތެރިވުމަށް އަދުހަމް މަސައްކަތް ކުރި ނަމަ، އޭނާގެ ކިބައިގައި މެރުމުގެ ގަސްދު ނެތް ކަމަށް ބެލެވުނީސް ކަމަށެވެ.

އަދި މަސްތުގެ ހާލަތުގައި އަދުހަމް އެވަގުތު ހުރިއިރު އޭނާ ހުރީ ކުރި ޢަމަލުގެ ނަތީޖާ ނުވިސްނޭ ހާލަތުގައި ނޫންކަމަށްވެސް ޤާޒީ ވިދާޅުވެފައިވެއެވެ.

މިއާއިއެކު ގާޒީ ވަނީ ގާސިމްގެ މަރާއި ގުޅިގެން ހެދި މެޑިކޯ ލީގަލް ރިޕޯޓާއިމެދު އަދުހަމް ސުވާލު އުފައްދާފައިނުވާކަން ފާހަގަކުރައްވާފައިވެއެވެ.

އަދި ދިރިހުރުމުގެ ހައްގު ކޮންމެ މީހަކަށް ލިބިފައިވާކަން ފާހަގަ ކުރައްވާ ގާޒީ ވިދާޅުވެފައިވަނީ މި ހައްގު މީހެއްގެ ކިބައިން އަތުލެވޭނީ ކޯޓަކުން ކުރާ ހުކުމަކުން ކަމަށާއި ގާސިމްގެ ލޭ ހުއްދަ ކުރަންޖެހޭ ސަބަބެއް ނެތް ކަމަށެވެ. އެހެންކަމުން ގާސިމް މަރާލައިފާވަނީ ހައްގަކާއި ނުލާ ކަމަށެވެ.