މަސައްކަތްތައް ލަސްވާ ވަރަށް ގިނަ ސަބަބުތައް ހިމެނޭ ކަމަށާ، އޭގެ ތެރޭގައި، މަސައްކަތްތައް ކުރިއަށް ގެންދިޔުމަށް ހަދާފައިވާ ގާނޫނު ތަކާއި ގަވާއިދުތައް ހިމެނޭ ކަމަށް ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި މިނިސްޓަރު އަސްލަމް އާއި ސުވާލު ކުރުމަށް މަޖިލީހަށް ހާޒިރު ކޮށްފައިވާއިރު، ވެލިދޫ ދާއިރާގެ މެމްބަރު މުހައްމަދު އަބްދުالله ޝަފީގު ވަނީ ރަށް ރަށުގެ ތަރައްޤީއަށް ބަޖެޓް ކުރެވިފައިވާ މަޝްރޫޢުތައް ލަސްވަނީ ކީއްވެތޯ ސުވާލު ކުރައްވާފައެވެ.
ޝަފީގުގެ ސުވާލަށް ޖަވާބު ދެއްވަމުން، އަސްލަމް ވިދާޅުވީ މަސައްކަތްތައް ލަސްވާ ވަރަށް ގިނަ ސަބަބުތައް ހުންނަ ކަމަށެވެ.
މަސައްކަތް ލަސްވަން ދިމާވާ ބައިވަރު ސަބަބުތައް އެބަހުރި. އެއް ކަމަކީ އަޅުގަނޑުމެން މަސައްކަތް ކުރުމުގައި، މި ދިވެހިރާއްޖޭގައި ހެދިފައި ހުރޭ، ކަންކަން ކުރުމުގައި ޓްރާސްޕޭރެންސީ ގެންގުޅެ އަދި ކަންކަން ކުރުމުގައި، މީހުން ކުރާ ގޮތަށް ކުރުމަށްޓަކައި ހެދިފައި ހުރޭ ގާނޫނުތަކާއި ގަވާއިދުތަކެއް. އޭގެ ތެރޭގައި ޓެންޑަރ ޕްރޮސެސް ވެސް އިނދޭ. އޭގެ ތެރެއިން އީއައިއޭވެސް ހަދަން ޖެހޭ. އޭގެ ތެރޭގައި ހުރޭ އަދި، ޓެންޑަރ ޕްރޮސެސް ތެރޭގައި ސްޓޭންޓް ސްޓިލް ކިޔާ ޕްރޮސެސް އެއްވެސް އެބަ އިނދޭ. ބަޔަކު މައްސަލަ ޖައްސައިފިއްޔާ މަސައްކަތަށް ހުއްޓުމެއްވެސް އެބައާދޭ. އަދި ހަމަ އޭގެ ތެރޭގައި އާދޭ ކޮންސަލްޓޭޓިވް ޕްރޮސެސް ވެސް.
މިނިސްޓަރު މުހައްމަދު އަސްލަމް
އަސްލަމް ވިދާޅުވީ، މަސައްކަތް ކުރުމަށްޓަކައި ރަށަކަށް އަރައި އެތަނުގައި "ހަދަން ބޭނުން އެއްޗެއް ހެދުމަށްފަހު އަންނަނީ" ނޫން ކަމަށެވެ.
އަދި މަސައްކަތް ކުރަން ހުންނަ ތަރުތީބާއި އެއްގޮތަށް މަސައްކަތް ކުރުމުން، އޭގެ ތެރެއިން ލަސްވާ ލަސްވުންތައް އަންނަކަމަށްވެސް އަސްލަމް ވިދާޅުވި އެވެ.
މިއާއެކު އަސްލަމް ވިދާޅުވީ، މަސައްކަތް ލަސްވާ އަނެއް ސަބަބަކީ މަސައްކަތް ކުރިއަށް ގެންދިޔުމުގެ ގާބިލްކަން ނުވަތަ ކެޕޭސިޓީ ނެތުން ކަމަށެވެ. އެހެންކަމުން، ކޮންމެ ކުންފުންޏަކުން މަސައްކަތް ކުރި ނަމަވެސް، މިހާރު ރާއްޖޭގައި މަސައްކަތްތައް ކުރަމުންދާ މިންވަރަށް ބަލާއިރު، ކުންފުނިތަކަށް ވަނީ އޯވާލޯޑް ވެފައި ކަމަށް އަސްލަމް ވިދާޅުވި އެވެ.
މީގެ އިތުރުން ކޮންޓްރެކްޓަރުންގެ މާލީ ހާލަތުގެ ސަބަބުން ވެސް ލަސްތައް އަންނައިރު، ކޮވިޑާއި ގުޅިގެންވެސް ލަސްތަކެއް އަންނަ ކަމަށް އަސްލަމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
