އެމްއެމްޕީއާރުސީގެ ޚިޔާނާތާއި ގުޅުވާ ޔޫތު މިނިސްޓަރު އަހުމަދު މަހުލޫފުގެ މައްޗަށް އުފުލާފައިވާ ރިޝްވަތު ޤަބޫލުކުރުމުގެ ދައުވާ އަނބުރާ ގެންދިޔަ ގޮތަށް އެމްއެމްޕީއާރުސީ މެދުވެރިކޮށް ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތައް ވެސް އަނބުރާ ގެންދިއުމަށް އިދިކޮޅު ކޯލިޝަން ޕްރޮސެކިއުޓާ ޖެނެރަލް ހުޝެއިން ޝަމީމަށް ދަންނަވައިފި އެވެ.
އެމްއެމްޕީއާރުސީގެ މައްސަލަތަކުގެ ދައުވާ އުފުލުމުގައި ޕީޖީން ތަފާތުކުރުންތައް ގެންގުޅޭކަން ފާހަގަކޮށް އިދިކޮޅުގެ ހުރި ކަންބޮޑުވުންތަކާއެކު، އިދިކޮޅު ކޯލިޝަންގެ ލީޑަޝިޕުން ވަނީ ޕީޖީ އާއި ބައްދަލުކުރައްވާފަ އެވެ.
އެ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން އިދިކޮޅު އިއްތިހާދު ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ އެމްއެމްޕީއާރުސީގެ ޚިޔާނާތާއު ގުޅުންހުރި މައްސަލަތަކުގައި ދައުވާ އުފުލާއިރު ޕީޖީން ތަފާތު ކުރުން ގެންގުޅޭތީ އެކަމުގެ ކަންބޮޑުވުން ފާޅުކޮށްފައި ވާނެ ކަމަށެވެ.
އެގޮތުން މަހުލޫފުގެ މައްސަލަ އަނބުރާ ގެންދިއުމުން ޕީޖީގެ ޕްރޮސެކިއުޓަރުންގެ ޓީމުވެސް ކަންބޮޑުވުން ފާޅުކޮށް ހުރިހާ މައްސަލަތަކެއް އެ އުސޫލުގެ ދަށުން ގެންދިއުމަށް އެދިވަޑައިގެންފައިވާކަން ޕީޖީގެ ސަމާލުކަމަށް ގެނެސް، ރައީސް ޔާމިނުގެ މައްސަލަ ގެންދިއުމަށް އިދިކޮޅުން ހުށައަޅާފައިވާނެ ކަމަށް އަބްދުއްރަހީމް ވިދާޅުވި އެވެ.
"އެއްކަމަކީ އެމްއެމްޕީއާރުސީގެ މައްސަލައިގައި ހިމެނޭ ބައެއް ބޭފުޅުންގެ ދައުވާ އަނބުރާ ގެންނެވިގޮތަށް ރައީސް ޔާމިނުގެ މައްސަލަ އަނބުރާ ގެނެސް ދޭށޭ. އެއީ އެއްބާވަތެއްގެ މައްސަލައެކޭ މީ. އެހެންވީމަ ވަކި ބޭފުޅަކަށް އަނިޔާދީފަ އަނެއްބައި ބޭފުޅުން އޭގެން ސަލާމަތް ކުރުމުގެ ވިސްނުން ޕީޖީ ގެންގުޅުއްވައިގެން ނުވަނެއޭ. ޝަމީމު ވިދާޅުވި މައްސަލަ އަނބުރާ ގެންދަނީ ހެކި ވަޒަންކުރުމަށް ފަހުގައޭ. ދެން އެއާ ގުޅިގެން އަޅުގަނޑުމެން ދެންނެވިން އެހިންވީމަ ފުއްގިރި މައްސަލަ އަނބުރަން ގެންނަން ވީ ނޫން ތޯ އޭ"
ޕީއެންސީގެ ރައީސް އަބްދުއްރަހީމް
އަބްދުއްރަހީމް ވިދާޅުވީ މަޤާމުގެ ގޮތުން ވިދާޅު ނުވި ނަމަވެސް ރައީސް ޔާމިނުގެ މައްސަލަތަކުގައި ބޮޑެތި ގޯސްތަކެއް ހަދާފައިވާކަން ޕީޖީ ޝަމީމު ޤަބޫލުފުޅު ކުރައްވާކަން ޕީޖީގެ ވާހަކަތަކުން އެނގިގެންދާ ކަމަށެވެ.
އެގޮތުން އާރަށު މައްސަލައިގެ ހުކުމް ކުރިތާ 62 ދުވަސް ފަހުން އެ މައްސަލައާއި ގުޅުވާ ރައީސް ޔާމިނުގެ މައްޗަށް 53 މިލިއަން ރުފިޔާ 6 މަސް ދުވަސްތެރޭ ދެއްކުމަށް ކްރިމިނަލް ކޯޓުން ކުރި އަމުރު ހައިކޯޓުން ބާތިލުކުރުމާއި ގުޅިގެން އެ މައްސަލަ ސުޕްރިމް ކޯޓުގައި އިސްތިއުނާފު ނުކުރުމަށް ޕީޖީން ނިންމީވެސް ހައިކޯޓުގެ ނިންމުން ރަނގަޅުކަމަށް ޤަބޫލުފުޅު ކުރައްވާތީކަމަށް ޕީޖީ ވިދާޅުވެފައިވާކަން އަބްދުއްރަހީމް ފާހަގަކުރެއްވި އެވެ.
އަދި ރައީސް ޔާމިނުގެ މައްޗަށް ނުހައްގުން އަނިޔާތަކެއް ދެވިފައިވާކަން ޕީޖީ ޤަބޫލުފުޅުކުރައްވާކަން ވެސް ވާހަކަތަކުން އެނގުނުކަމަށް އަބްދުއްރަހީމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
