ރައްޔިތަކަށް ލުއި ފަސޭހަވާނެ ހުރިހާ ކަމެއް މި ސަރުކާރުން ދަނީ ކުރަމުންކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވެއްޖެ އެވެ.

ޣަފޫރު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މަޑުއްވަރީ ދާއިރާގެ އާދަމް ޝަރީފު ހުށައަޅުއްވާފައިވާ ރާއްޖޭގައި މުދަލާއި ޚިދުމަތުގެ އަގު ބޮޑުވުން ކޮންޓްރޯލު ކުރުމަށް ސަރުކާރަށް ގޮވާލާ ހުށައެޅި ޤަރާރަށް ބަހުސް ކުރައްވަމުން ނެވެ. 

ޣަފޫރު ވިދާޅުވީ ތަކެތީގެ އަގު ބޮޑުވީ ޖީއެސްޓީ 2 ޕަސެންޓު ބޮޑުކޮށްގެން ނޫން ކަމަށެވެ. ޖީއެސްޓީ ބޮޑުކޮށްގެން މުދަލުން އަގުބޮޑުވާނީ އެންމެ ދެ ރުފިޔާ ކަމަށާއި، ތަކެތީގެ އަގު ބޮޑުވެގެން އުޅެނީ ދުނިޔޭގެ ބާޒާރަށް އަންނަމުންދާ ބަދަލުތަކާއި ގުޅިގެން ކަމަށެވެ. 

Advertisement

ދުނިޔޭގެ ބާޒާރުގައި ތަކެތީގެ އަގުތައް ބޮޑުވަމުންދާއިރު، އޭގެ އަސަރު ރާއްޖެއަށް ނުކުރާނެކަމަށް ނުބުނެވޭނެކަމަށް އޭނާ ވިދާޅުވި އެވެ. 

އެކަން ފާހަގަކޮށް ޣަފޫރު ވިދާޅުވީ އިންފްލޭޝަން 5 ޕަސެންޓުގައި ވެސް ހިފެހެއްޓިފައިވަނީ މި ސަރުކާރުން އަޅާފައިވާ ފިޔަވަޅުތަކެއްގެ ސަބަބުން ކަމަށެވެ. 

މިސާލެއްގެ ގޮތުން އޭނާ ވިދާޅުވީ ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިގެން ދިޔައިރު ސަރުކާރުން ކަރަންޓު އަގު ބޮޑުކޮށްފައި ނުވާ ކަމަށެވެ. އަދި ހެޔޮ އަގުގައި ތެޔޮ ފޯރުކޮށްދިނުމަށް ގިނަ މަސައްކަތްތަކެއް ކޮށްފައިވާ ކަމަށެވެ. 

ޣަފޫރު އިތުރަށް ވިދާޅުވީ ރައްޔިތަކަށް ލުއި ފަސޭހަވާނެ ހުރިހާ ކަމެއް މި ސަރުކާރުން ކުރަމުންދާ ކަމަށެވެ. 

ރައްޔިތުންނަށް ދިމާވާ މައްސަލަތައް ޙައްލުކުރުމަށް އަޅަން ޖެހުނު ކޮންމެ ފިޔަވަޅެއް ސަރުކާރުން އަޅަމުންދާ ކަމަށާއި، އެ ފިޔަވަޅުތަކުގެ ހެޔޮ އަސަރު ރާއްޖޭގެ އިގްތިޞާދުން ފެންނަމުންދާކަމަށް ޣަފޫރު ވަނީ ވިދާޅުވެފަ އެވެ.