ރައްޔިތުން މަޖިލީހުގެ ގުރައިދޫ ދާއިރާގެ ބައި-އިލެކްޝަންގެ ދާއިމީ ނަތީޖާ އިއުލާނުކޮށްފި އެވެ.

ދާއިމީ ނަތީޖާ ދައްކާ ގޮތުން ބައި-އިލެކްޝަންގައި ވާދަކުރި އެމްޑީޕީގެ ކެންޑިޑޭޓް އިބްރާހިމް ޝާޒަށް ވަނީ ވަގުތީ ނަތީޖާއާއި އަޅައި ބަލާއި ހަ ވޯޓު އިތުރުވެފަ އެވެ. ނަމަވެސް ނަތީޖާއަށް އައި ބަދަލުގެ ސަބަބުން ވެސް އިންތިހާބުގެ ޖުމްލަ ނަތީޖާއަކަށް ބަދަލެއް ނާދެއެވެ.

މިދިޔަ ހޮނިހިރު ދުވަހު ބޭއްވިި ބައި-އިލެކްޝަންގައި ޝާޒް އާއި  ވާދަކުރީ ޕީޕީއެމްގެ ކެނޑިޑޭޓް ޙުސައިން ރިޟާ އާދަމް އާއި، އެމްއެންޕީގެ ކެނޑިޑޭޓް ޢަލީ އާރިފްއެވެ.

ބައި-އިލެކްޝަންގެ ދާއިމީ ނަތީޖާ ދައްކާ ގޮތުން އިބްރާހިމް ޝާޒްއަށް ވަނީ ޖުމްލަ 1346 ވޯޓު ލިބިފަ އެވެ. ވަގުތީ ނަތީޖާގައި ޝާޒް އަށް ލިބުނީ 1340 ވޯޓެވެ.

ޕީޕީއެމްގެ ހުސެއިން ރިޒާ އަށް ލިބުނު ވޯޓަށް ވަގުތީ ނަތީޖާ އާއި ދާއިމީ ނަތީޖާގައި ވެސް ބަދަލެއް ނެތެވެ. އޭނާ އަށް ލިބުނީ 1226 ވޯޓެވެ. އެމްއެންޕީގެ ކެނޑިޑޭޓް އާރިފް އަށް ލިބުނު ވޯޓުގެ އަދަދު ވަނީ ވަގުތީ ނަތީޖާއަށްވުރެ މަދުވެފައެވެ. އެގޮތުން ވަގުތީ ނަތީޖާގައި އާރިފްއަށް ލިބުނީ 128 ވޯޓެވެ. ދާއިމީ ނަތީޖާގައި ލިބިފައިވަނީ 122 ވޯޓެވެ. 

އިންތިޚާބުގައި ޖުމްލަ 2755 މީހުން ވަނީ ވޯޓުލާފައެވެ. އޭގެތެރޭގައި 1431 ފިރިހެންނުންނާއި 1324 އަންހެނުން ހިމެނެއެވެ. ބާތިލު ވޯޓުގެ އަދަދަކީ 61އެވެ.

އިންތިޚާބުގައި ޖުމްލަ 6 ވޯޓު ފޮށި ބެހެއްޓިއެވެ. އެގޮތުން ގުރައިދޫގައި 2 ވޯޓު ފޮށި، މާފުށީގައި 2 ވޯޓުފޮށި، ގުޅީގައި 1 ފޮށީގެ އިތުރުން އެދާއިރާގެ ރައްޔިތުން ވޯޓުލުމަށް މާލޭގައި ބެހެއްޓި 1 ވޯޓު ފޮއްޓެވެ.