ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަން ކާމިޔާބުކުރެއްވި އިބްރާހީމް ޝާޒް، މެންބަރުކަމުގެ ހުވައި އަންނަ ހޯމަ ދުވަހު ކުރައްވާނެކަމަށް ރައްޔިތުންގެ މަޖިލީހުން އަންގައިފި އެވެ. 

ގުރައިދޫ ދާއިރާގެ ބައި-އިލެކްޝަން އެމްޑީޕީގެ ކެނޑިޑޭޓް އިބްރާހީމް ޝާޒް ކާމިޔާބުކުރެއްވީ ޕީޕީއެމްގެ ކެނޑިޑޭޓް ޙުސައިން ރިޟާ އާދަމް އާއި، އެމްއެންޕީގެ ކެނޑިޑޭޓް ޢަލީ ޢާރިފާ ވާދަކުރައްވައިގެންނެވެ.

ދާއިމީ ނަތީޖާގައިވާ ގޮތުން ގުރައިދޫ ދާއިރާގެ ގޮނޑި ކާމިޔާބުކުރެއްވި އެމްޑީޕީގެ ކެނޑިޑޭޓް އިބްރާހީމް ޝާޒަށް ވަނީ 1346 ވޯޓު ނުވަތަ ވޯޓްލީ މީހުންގެ %49.96 އިންސައްތަ ހޯއްދަވާފައެވެ. ޕީޕީއެމްގެ ކެނޑިޑޭޓަށް ލިބިވަޑައިގަތީ 1226 ވޯޓު ނުވަތަ %45.51 ވޯޓެވެ. އަދި އެމްއެންޕީގެ ކެނޑިޑޭޓަށް ލިބިވަޑައިގަތީ 122 ވޯޓެވެ. އެއީ ވޯޓްލީ މީހުންގެ %4.53 އެވެ.

ރައްޔިތުންގެ މަޖިލީހުގެ އިދާރާއިން ބުނީ، ގުރައިދޫ ދާއިރާގެ މެންބަރުކަމުގެ ހުވައި ޝާޒް ކުރައްވާނީ އަންނަ ހޯމަ ދުވަހުގެ ހެނދުނު  10:00 ގައި ކަމަށެވެ. އަދި އެ ދުވަހު އޮންނަ މަޖިލީހުގެ ޖަލްސާގައި ޝާޒް ބައިވެރިވެވަޑައިގަންނަވާނެ ކަމަށްވެސް ރައްޔިތުންގެ މަޖިލީހުގެ އިދާރާއިން ވަނީ ބުނެފަ އެވެ. 

ރައްޔިތުންގެ މަޖިލީހުގެ ގުރައިދޫ ދާއިރާގެ އިންތިޚާބު ބާއްވާފައިވަނީ އެ މަޤާމުގައި ހުންނެވި މެމްބަރު އިބްރާހިމް ރިޒާ އަވަހާރަވުމާއި ގުޅިގެންނެވެ. އިބްރާހިމް ރިޒާއަކީ 14 އަހަރު ގުރައިދޫ ތަމްސީލު ކުރެއްވި ބޭފުޅެކެވެ. އޭނާ އެ ގޮނޑި ތަމްސީލު ކުރައްވާފައިވަނީ ޕީޕީއެމްގެ މެމްބަރެއްގެ ގޮތުގައެވެ. 

14 އަހަރަށްފަހު އެމްޑީޕީއަށް ގުރައިދޫ ދާއިރާގެ ގޮނޑި ލިބިފައިވާއިރު، އެ ޕާޓީން އަންނަނީ އެއީ ލިބުނު ވަރަށް ބޮޑު ކާމިޔާބީއެއްގެ ގޮތަށް ސިފަކުރަމުން ނެވެ. އަދި ގޮނޑި އެމްޑީޕީއަށް ލިބުނީ ސަރުކާރުގެ ސިޔާސަތުތައް ރައްޔިތުން ބަލައިގަންނާތީކަމަށް އެމްޑީޕީގެ އިސް ބައެއް ބޭފުޅުން ދަނީ ވިދާޅުވަމުން ނެވެ. 

އަނެއްކޮޅުން އިދިކޮޅުން ބުނަމުންދަނީ އިންތިޚާބަށް ސަރުކާރުން ނުފޯޒު ފޯރުވާފައިވާ ކަމަށެވެ. އަދި އިންތިޚާބުގެ ޞައްޙަކަމާމެދު ސުވާލު އުފެދޭ އެތައް ކަމެއް ފެންނަން ހުރިކަމަށް އިދިކޮޅުން ދަނީ ބުނަމުންނެވެ.