ބާޒާރު ކޮތަޅު ބޮނޑީގެ އަގު ބޮޑުވީ ރައްޔިތުންގެ މަޖިލީހުގެ ސަބަބުންކަމަށް ސަރުކާރުން ބުނަމުން ރައްޔިތުންގެ މަޖިލީހުގެ ނޮޅިވަރަމްފަހު ދާއިރާގެ މެމްބަރު މުޙައްމަދު ނަޝީދު އަބްދުﷲ (މޮސްޓާ) ނުރުހުން ފާޅުކުރައްވައިފި އެވެ.
ޕްލާސްޓިކް ކޮތަޅުން ނަގަންފަށާފައިވާ 2 ރުފިޔާގެ ފީގެ ސަބަބުން ކޮތަޅު ބޮނޑީގެ އަގު މަތިވެފައިވަނީ ކުނި މެނޭޖުކުރުމުގެ ޤާނޫނުގެ ބިލު ފާސް ވެގެން އައިއިރު މާއްދާއެއް އުނިކޮށްފައި ވުމުން ކަމަށް އެންވަޔަރުމަންޓު މިނިސްޓްރީން ވަނީ ބުނެފައެވެ.
ކުނި ޤާނޫނުގެ 35 ވަނަ މާއްދާއަށް ގެނައި އިސްލާހުގައި ކުރިން އޮތީ 50 ކޮތަޅު ނުވަތަ އެއަށްވުރެ ގިނަ ކޮތަޅު ހިމެނޭ ކޮތަޅު ބޮނޑި އިސްތިސްނާކޮށްފައިވާ ކަމަށެވެ. އެހެން ނަމަވެސް ބިލް ޤާނޫނަކަށް ބަދަލުވިއިރު 50 ކޮތަޅު ބޮނޑީގެ އިސްތިސްނާ ވަނީ އުނިކޮށްފަ އެވެ.
ކޮތަޅު ބޮނޑީގެ އަގު ބޮޑުވުމާއި ގުޅިގެން ބޮޑެތި ފާޑުކިޔުންތަކެއް އަމާޒުވުމާއި ގުޅިގެން ސަރުކާރުން ބުނީ މިހާރު ކުރިމަތިވެފައިވާ މައްސަލަ ނުކުތީ އެ އިސްތިސްނާ އުނިކޮށްފައި ވުމުން ކަމަށެވެ.
އެކަމާއި ގުޅިގެން މޮސްޓާ ކުރެއްވި ޓްވީޓެއްގައި ވިދާޅުވީ އެހެން އެކަން ދިމާވީ މަޖިލީހުގެ ސަބަބުންކަމަށް ބުނެ ފޫޅުކަނޑާ ނުލެވޭނެ ކަމަށެވެ.
ރައްޔިތުންގެ މަޖިލީހުގެ މެޖޯރިޓީ އަކީ ސަރުކާރުން ބުނާ ގޮތަށް ބިލުތައް ފާސްކޮށްދޭ ސަރުކާރަށް ތާއީދުކުރާ މެމްބަރުންކަން މޮސްޓާ ފާހަގަކުރެއްވި އެވެ. އަދި ވިދާޅުވީ ބިލު ފާސްކޮށްފައިވަނީ ސަރުކާރުން އެދުނުގޮތަށް ކަމަށެވެ.
މީގެ ކުރިންވެސް ބިލު ތަސްދީގުކުރުމަށްފަހު ކައިރި ކައިރީގައި ބިލުތަކަށް ބަދަލުތަކެއް ގެނެސްފައިވާއިރު، މޮސްޓާ ވިދާޅުވީ ކުނި ބިލު ފާސްކޮށްފައިވާ ގޮތުން ކޮތަޅުގެ އަގަށް އައި ބަދަލުތަކާއި ގުޅިގެން ރައްޔިތުން އުފުލަމުންދާ ތަކުލީފު ހައްލުކުރުމުގެ އިޚްލާސްތެރި ނިޔަތެއް އޮތް ނަމަ ރައީސުލްޖުމްހޫރިއްޔާގެ ގަރާރެއް ނެރުއްވައިގެން ވެސް އެކަން އިސްލާހު ކުރާނެ ކަމަށެވެ.
ސަރުކާރުން ހުއްޓުވަން ބޭނުންވާ ބައެއް ކަންކަން ރައީސް ޞާލިހުގެ ގަރާރަކުން މީގެ ކުރިންވެސް ހުއްޓުވާފައިވާކަމަށް މޮސްޓާ ވިދާޅުވި އެވެ.
"މަޖިލިސް ބޮލަށް ކަނޑާނުލާ. މަޖިލިހަކީ %100 ސަރުކާރުން ކޮންޓްރޯލް ކުރާތަނެއް. ރައްޔިތުންނަށް ހެވެއްއެދިގެން ކަމެއް ކޮށްދޭނެ އިހުލާސްތެރިކަން ހުރިނަމަ ރައީސުލްޖުމްހޫރިއްޔާގެ ގަރާރަކުން ވެސް ކަން ކުރާނެ. އިންޑިޔާ އައުޓް ހުއްޓުވުމަށް ގަރާރު ނެރެވުނު މިކަން ކުރަން ވީމަ ފަހަތަށް ނުޖެހޭ"
ނޮޅިވަރަމްފަހު ދާއިރާގެ މެމްބަރު މުޙައްމަދު ނަޝީދު އަބްދުﷲ (މޮސްޓާ)
އޭޕްރިލް މަހުން ފެށިގެން ކޮތަޅަކަށް ދެ ރުފިޔާ ނަގަން ފަށާފައިވާއިރު، މީގެ ކުރިން 25 ރުފިޔާއަށް ލިބޭ ކޮތަޅު ބޮނޑީގެ އަގު މިހާރު ވަނީ 225 ރުފިޔާއަށް އުފުލިފައެވެ. އަދި މިހާރު ޤާނޫނު އޮތް ގޮތުން ކޮންމެ ކޮތަޅަކުން ދައުލަތަށް 6 ރުފިޔާގެ ފައިދާއެއް ޖެހެއެވެ.
އެއީ މި ޤާނޫނު ގެނައި މަޤްސަދު ވެސް ހާސިލު ނުވެ، ރައްޔިތުންނަށް ބޮޑެތި ތަކުލީފުތަކެއް އުފުލަން ޖެހިފައިވާ ކަންކަމުގެ ގޮތުގައި އެމްޑީޕީގެ އިސް ބައެއް ބޭފުޅުންވެސް ދަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
