ސަރުކާރުން މި އަހަރަށް ކަނޑައަޅާފައިވާ އާސަންދަ އަދި ސަބްސިޑީ ބަޖެޓުގެ ބޮޑު ބައި ހުސްވެފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ދައްކައިފި އެވެ. 

ފިނޭންސް މިނިސްޓްރީއިން އާންމުކޮށްފައިވާ ވީކްލީ ރިޕޯޓުތަކުން ދައްކާގޮތުން މި ހިނގާ އޭޕްރީލް މަހުގެ 13 ވަނަ ދުވަހާ ހަމައަށް އާސަންދައަށް ކުރި ހޭދަ ވަނީ 783.1 މިލިއަން ރުފިޔާއަށް އަރައިފަ އެވެ. މިއީ މުޅި އަހަރަށް އާސަންދައަށް ހޭދަވާނެކަމަށް ކަނޑައެޅި 1.045 ބިލިއަން ރުފިޔާގެ ބަޖެޓުގެ 75 އިންސައްތަ އެވެ. 

އާސަންދަ ބަޖެޓުގެ އިތުރުން ސަރުކާރުން ބައެއް އަސާސީ މުދާ އަދި ހިދުމްތަކަށް ދެމުންދާ ސަބްސިޑީއަށް ކަނޑައެޅި ބަޖެޓުގެ ބޮޑު ބައި ވެސް ވަނީ ހުސްވެފައެވެ. 

Advertisement

އެގޮތުން ތެލަށްދެވޭ ސަބްސިޑީ އެންމެ ބޭނުންޖެހިފައިވާ ފަރާތްތަކަށް ދެވޭ ނޫނީ ޓާގެޓަޑް ސަބްސިޑީއަކަށް ބަދަލުކޮށްގެން އެއް ބިލިއަނަށް ވުރެ ގިނަ ރުފިޔާ ސަލާމަތް ކުރެވޭނެ ކަމަށް އޮތީ އަންދާޒާކޮށްފަ އެވެ. އަދި ކަރަންޓު ސަބްސިޑީ ދޭ އުސޫލަށް ގެންނަ ބަދަލުން 150 މިލިއަން ރުފިޔާ މިއަހަރު ސަލާމަތްކުރަން އަމާޒުހިފި އެވެ.

މީގެ އިތުރުން އާސަންދަ އާއި ބޭސްގަތުމަށްކުރާ ހަރަދުކުޑަކޮށްގެން ބަޖެޓުން 600 މިލިއަނަށް ވުރެ ގިނަ ރުފިޔާ ސަލާމަތް ކުރެވޭނެ ކަމަށް ލަފާކުރި އެވެ.

ސަރުކާރުން ހުށަހަޅައި، ރައްޔިތުންގެ މަޖިލީހުން މިއަހަރަށް ފާސްކޮށްދީފައިވަނީ 42.8 ބިލިއަން ރުފިޔާގެ ބަޖެޓެކެވެ.

މިއީ ދައުލަތަށް ލިބޭނެ ކަމަށް އަންދާޒާކުރި އާމްދަނީއާ އަޅާބަލާއިރު، ގާތްގަނޑަކަށް 8.5 ބިލިއަން ރުފިޔާގެ ޑެފިސިޓު ބަޖެޓެކެވެ.

ނަމަވެސް، ބަޖެޓުގައި ހިމަނާފައިވާ ހަރަދު ކުޑަކުރުމުގެ ފިޔަވަޅުތައް ނޭޅިއްޖެނަމަ، ހަރަދުތައް އިތުރުވެ، ބަޖެޓު ޑެފިސިޓުވާ އަދަދު 14.459 ބިލިއަން ރުފިޔާއަށް އަރާނެ ކަމަށް ފިނޭންސުން ވަނީ ލަފާކޮށްފަ އެވެ.

އަނެއްކޮޅުން ސަރުކާރުގެ ޚަރަދުކުޑަ ކުރުމުގެ ސިޔާސަތު ތަންފީޒުކޮށް ޚަރަދުތައް ކުޑަކުރާތަން ނުފެންނައިރު، އަދި ކުރާ ޚަރަދުތަކަށް އެއްވެސް އުނިކަމެއް ގެނެސްފައި ނުވާއިރު، ޚަރަދުތައް ބަޖެޓުގެ ތެރެއިން ޚަރަދުތައް ސަލާމަތްކޮށް ސަބްސިޑީދޭ މިންވަރު އިތުރު ނުކުރެވޭނެކަން މިހާރު އާންމު ކޮށްފައިވާ ތަފާސް ހިސާބުތަކުގެ އަލީގައި ސާފުވެގެން ދެއެވެ.