ރައީސުލްޖުމްހޫރިއްޔާ އިބްރާހިމް މުޙައްމަދު ވަނީ ޤައުމަށް ޤައްދާރުވެ ދިވެހިންގެ މަސްކަނޑު ވިއްކާލާފައިކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ. 

ތާރިގު މިފަދައިން ވިދާޅުވެފައިވަނީ ރާއްޖޭގެ ޚާއްސަ އިޤްތިޞާދީ ސަހަރައްދުން ބައެއް ގެއްލޭގޮތަށް ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކުރި ސަބަބު ހާމަކުރުމަށް ގޮވާލާ މަޖިލީހަށް ހުށައެޅި ކުއްލި މައްސަލައިގައި ބަހުސްކުރައްވަމުން ނެވެ. 

ތާރިގު ވިދާޅުވީ ރައީސް ޞާލިހު މޮރިޝަސްގެ ބޮޑު ވަޒީރަށް ފޮނުއްވި ސިޓީގެ ސީދާ އިބާރާތް ނޭނގުނުކަމުގައި ވީ ނަމަވެސް އެ ސިޓީގައި ދިވެހިރާއްޖެއަށް ނުރައްކާ ކުރާނެ ވާހަކަތަކެއް ހުރިކަން އެޓްލަސްގައި އޮތް މައްސަލައަށް ވަކާލާތުކުރަމުން މޮރިޝަސްގެ ވަކީލުން ހާމަކުރި މައުލޫމާތުން ސާފުވާ ކަމަށެވެ. 

Advertisement

އެކަންކަން ފާހަގަކުރައްވާ ތާރިގު ވިދާޅުވީ ޑީލު އޮތީ ހަދާފައި ކަމަށެވެ. އަދި އެކަމުގައި ރައީސް ޞާލިހުގެ އިތުރުން އޭޖީ ރިއްފަތާއި ފޮރިން މިނިސްޓަރު ޝާހިދު ބައިވެރިވެވަޑައިގެންފައިވާކަން އެނގިލައްވާކަމަށެވެ.

އެހެންކަމުން އެމީހުންނަކީ ޤައުމަށް ޤައްދާނު ނުވާ ބައެއްކަމަށް ކަނޑައެޅޭގެ އެއްވެސް ހަމައެއް ނޯންނާނެކަމަށް ތާރިގު ވިދާޅުވި އެވެ. 

ތާރިގު އިތުރަށް ވިދާޅުވީ ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކުރުމުގެ ސަބަބުން އިޓްލޮސްގައި އޮތް މައްސަލައިގައި ދިވެހި ދައުލަތުން ނަގަމުން އައި ދިފާއު އަނެއް ފުށަށް ބަދަލުވެފައިވާ ކަމަށެވެ. އެއީ ދިވެހި ދައުލަތުގެ ދިފާއު ބިނާކޮށްފައިވަނީ ފޯޅަވަހީގެ ސިޔާދަތީ ބާރު ދުވަހަކުވެސް މޮރިޝަސްއަށް ލިބިފައި ނުވާކަމަށް ބަޔާންކޮށްކަން އޭނާ ފާހަގަކުރެއްވި އެވެ. 

އެހެންކަމުން ސަރުކާރުން ސްޓޭންޑް ބަދަލުކުރުމާއި ގުޅިގެން އެ މައްސަލަ ދިވެހިރާއްޖެއާއި ދެކޮޅަށް ނިމުމުގެ ފުރުސަތު ބޮޑު ކަމަށާއި، އެކަމުގެ ސަބަބުން ދިވެހިންނަށް ބޮޑެތި ގެއްލުންތަކެއް ލިބި ރާއްޖޭގެ ސަރަހައްދުން ބައެއްވެސް ދޫވެގެންދާނެކަމަށް އޭނާ ވިދާޅުވި އެވެ.