ޤައުމީ ދިފާއީ ބާރު ނިކުމެ ދިވެހި މަސްކަނޑު ވިއްކާލި މީހުން ޖަވާބުދާރީ ކުރުވުމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ގޮވާލައްވައިފި އެވެ.
ފޯޅަވަހީގެ ސިޔާދަތީ ބާރު ގެއްލޭގޮތަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު ހާމަކުރުމަށް ގޮވާލާ މަޖިލީހަށް ހުށައެޅި ކުއްލި މައްސަލައިގައި ބަހުސްކުރައްވަން ފައްޓަވަމުން ސައީދު ވިދާޅުވީ ފޯޅަވައްސަކީ އެއްވެސް ޒަމާނެއްގައި މޮރިޝަސްއަށް މިލްކުވެރިކަން ލިބިގެންވާ ތަނެއް ނޫން ކަމަށެވެ.
ރައްޔިތުންގެ މަޖިލީހުގައި އެ ބަހުސް ކުރިއަށް ދާއިރު، ފޯޅަވައްސާއި ގުޅިގެން ދިވެހި ދައުލަތުން ދަމަހައްޓަމުން އައި ސްޓޭންޑް މި ސަރުކާރުން ބަދަލުކުރި ކުރުން ދިފާއުކުރައްވާ އެމްޑީޕީގެ ބައެއް މެމްބަރުން ދެއްކެވި ވާހަކަތަކަށް ސައީދު ވަނީ ރައްދުދެއްވާފަ އެވެ.
އޭނާ ވިދާޅުވީ ފޯޅަވަހި މައްސަލައިގައި ދައުލަތުގެ ސްޓޭންޑް ބަދަލުކުރި ކުރުން ދިފާއުކުރައްވާ ވާހަކަދައްކަވާ ބައެއް މެމްބަރުން، އެ ވާހަކަތައް ދައްކަވަމުންދަނީ ސަރުކާރުގެ ނުފޫޒު އެބޭފުޅުންގެ މައްޗަށް އޮތުމުން ކަމަށެވެ. މިނިވަން ބަހުސަކަށް މަޖިލީހުގައި ފުރުސަތު ލިބިއްޖެ ނަމަ ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ރަނގަޅަށްކަމަށް އެއްވެސް މެމްބަރު ވިދާޅު ނުވާނެކަން ސައީދު ފާހަގަކުރެއްވި އެވެ.
އެއާއެކު ސައީދު ވިދާޅުވީ ފޯޅަވަހި ހިމެނޭ ކަނޑުގެ ސަރަހައްދު ވިއްކާލީ ފޮރިން މިނިސްޓަރު އަބްދުﷲ ޝާހިދު އެކަނިކަމަށް ދެންނެވެން ނެތް ކަމަށެވެ. ފެންނަން އޮތީ ރައީސް ޞާލިހަށް ދައުލަތުގެ ހުރިހާ ބާރެއް ލިބިލެއްވުމާއި ފޮރިން މިނިސްޓަރު ޝާހިދަށް އދ ގެ ޖެނެރަލް އެސެމްބަލީގެ ގޮނޑި ލިބިވަޑައިގަތުމާއެކު ހަދާފައިވާ ޑީލުތަކެއްކަމަށް އޭނާ ވިދާޅުވި އެވެ.
އެކަންކަން ފާހަގަކުރައްވާ ސައީދު ވިދާޅުވީ މި ޑީލުގެ ސަބަބުން ދިވެހިންގެ އަތުން މަލިކު ގެއްލިގެން ދިޔަ ގޮތަށް ފޯޅަވަހި ސަރަހައްދު ގެއްލިގެން ދިއުމުގެ ފުރުސަތު ފަހިވެފައިވާ ކަމަށެވެ. މިއީ ގައުމީ ދިފާއީ ބާރުން އަމިއްލަ އިސްނެގުމުގައި ބަލާ ތަހުގީގުކުރަން ޖެހޭ ކަމެއްކަމަށް އޭނާ ވިދާޅުވި އެވެ. އަދި އެ މައްސަލަ ބެއްލެވުމަށް ސައީދު ވަނީ ގޮވާލައްވާފަ އެވެ.
"ރާއްޖޭގެ ވެރިއަކަށް މި ލިބެނީ، ދިވެހި ސްޓޭޓުގެ ހުރިހާ ބާރެއް. ދަންނަވަން މި އުޅެނީ ރައީސް އިބްރާހިމް މުޙައްމަދު ޞާލިހުގެ އަތްޕުޅަށް ހުރިހާ ބާރެއް އައިމަ އަދި ދިވެހިރާއްޖޭގެ ޚާރިޖީ ވަޒީރަށް ޔޫއެން ޖެނެރަލް އެސެމްބްލީގެ ޗެއާ ލިބުނު ހިސާބުން ފެށިގެން ކުއްލިއަކަށް މި ޑީލު ފާޅުވެއްޖެ. އަޅުގަނޑު ނެތިން އަބްދުﷲ ޝާހިދޭ 500 މިލިއަން ޑޮލަރު ބޭނުންކުރީ ދަންނަވާކަށް. އެހެން ނަމަވެސް މެމްބަރު އިބްރާހިމް ރަޝީދު އެ ވިދާޅުވާ ވާހަކަފުޅު އެބަޖެހޭ ތަހުގީގުކުރެވެން. ރައީސް ޞާލިހު، ޚާރިޖީ ވަޒީރު، ބަންޑާރަ ނައިބު، އަދި ހަގީގަތުގައި ދިވެހި ދިފާއީ ބާރު މިއަދު މިބޭފުޅުން ޖަވާބުދާރީ ކުރުވަން އެބަޖެހޭ"
މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު
ސައީދު ވިދާޅުވީ ފޯޅަވައްސަކީ ދިވެހިންގެ ތަނެއްކަން ސާބިތުކޮށްދެވޭނެ ތާރީހީ ހެކިތައް ފެންނަން އޮތް ކަމަށެވެ. އަދި އެތަން ދިވެހިންގެ ތަނެއްގެ ގޮތުގައި ބޭއްވުމުގެ ފުރުސަތު އޮވެމެ އެތަން ރާއްޖޭގެ ބާރުގެ ދަށުން ގެއްލެންދެން ތިބެއްޖެކަމަށް ވާނަމަ އެއީ އަންނަން އޮތް ޖީލުތައް އެކަމުގެ ހިތާމަ ކުރާނެ ކަމެއް ކަމަށެވެ.
އަދި އެއީއަންނަން އޮތް ޖީލުގެ ކުރިމަތީ އަދުގެ ޖީލު ވަރަށް ބޮޑަށް ދަރަނިވެރިވާނެ ކަމެއްގެ ގޮތުގައި ސައީދުގެ ވާހަކައިގައި ވަނީ ސިފަކުރައްވާފަ އެވެ.
Advertisement
This content is created and paid for by advertisers and does not involve Voice Journalists
