މިސްރުގައި 40 އަހަރުން ދަށުގެ މީހުންނަށް ބޭއްވުނު ބައިނަލްއަގްވާމީ ޤުރުއާން މުބާރާތުގައި ހިތުން ކިޔެވުމުގެ ގޮފިން ބައިވެރިވެ މުޅި މުބާރާތުން 2 ވަނަ ހޯދާފައިވާ އަލްހާފިޒާ ފާތިމަތު ޝާޔާ ޒާހިރު އަށް ރައީސުލްޖުމްހޫރިއްޔާގެ ނައިބު ފައިސަލް ނަސީމް މަރުހަބާ ދަންނަވާފިއެވެ.

އެގޮތުން ރައީސުލްޖުމްހޫރިއްޔާގެ ނައިބު ޝާޔާއާއި ބައްދަލުކުރައްވާފައިވަނީ އިއްޔެގެ ވަގުތެއްގައި އެމަނިކުފާނުގެ ގެކޮޅު، ހިލާލީގޭގައެވެ.

މި ބައްދަލުވުމުގައި ރައީސުލްޖުމްހޫރިއްޔާގެ ނައިބު ފައިސަލް ނަސީމް ޝާޔާއަށް މަރުހަބާ ދެންނެވުމާއިއެކު ޤުރުއާން ކިޔެވުމާއި ތައުލީމު ހާސިލްކުރުމުގައި ކުރިއަށް ދިޔުމަށް ހިތްވަރު ދެއްވާފައިވާ ކަމަށް ރައީސް އޮފީހުން ވަނީ ބުނެފައެވެ.

ރައީސުލްޖުމްހޫރިއްޔާގެ ނައިބުގެ އިތުރުން އިސްލާމިކް މިނިސްޓަރ ޑރ. އަހުމަދު ޒާހިރު އާއި އިސްކަންދަރު ސްކޫލްގެ ޕްރިންސިޕަލް ހުސައިން ސައީދުވެސް ވަނީ މި ބައްދަލުވުމުގައި ބައިވެރިވެ ވަޑައިގަންނަވާފައެވެ.