ފުވައްމުލަކު ގޮނޑުފޮށް ހިމާޔަތްކުރުމުގެ މަސައްކަތަށްކަމަށް ބުނެ ގދ. ފަރެސްމާތޮޑާ އެއާޕޯޓު ސަރަހައްދުން ވެލިނަގަމުންދާތީ ކަންބޮޑުވުން ފާޅުކޮށް އެ ދާއިރާގެ މެމްބަރު ހުސެއިން މުޙައްމަދު ލަތީފު ހުށައެޅުއްވި ކުއްލި މައްސަލަ މަޖިލީހުން ބޭރުކޮށްލައިފި އެވެ. 

މެމްބަރު ހުސެއިން ހުށައެޅިއްވި އެ މައްސަލައިގައި ބުނެފައިވަނީ އީޕީއޭއިން ފުވައްމުލަކު މަޝްރޫއަށް ގެންދިއުމަށް ހުއްދަ ދީފައިވަނީ ފަރެސްމާތޮޑާ އެއާޕޯޓުގެ މަޝްރޫއަށް ބޭނުންކުރާ ވެލީގެ ތެރެއިން ބާކީވާ 45000 ކޮޑި މީޓަރުގެ ވެލި ގެންދިއުމަށް ކަމަށެވެ. އަދި އެއީ ފަރެސްމާތޮޑާ އާއި ވަރަށް ދުރުން ކަނޑުން ނަގާފައިވާ ވެލިކަމަށެވެ. 

ފުވައްމުލަކަށް ވެލި ގެންދިއުމަށް ފަރެސްމާތޮޑާގެ އެއްވެސް ހިސާބެއް ކޮނެގެން ވެލި ނެގުމަށް އެންވަޔަރަމެންޓް ޕްރޮޓެކްޝަން އޮތޯރިޓީން ހުއްދަ ދީފައިނުވާއިރު އެ މަސައްކަތަށް ވެލި ނެގުމަކީ ކަނޑައެޅިގެން ޤާނޫނާއި ޚިލާފުކަމެއްކަމަށް މެމްބަރު ހުސެއިންގެ މައްސަލައިގައި ފާހަގަކުރައްވާފައި ވެއެވެ. 

އޭގެ އިތުރުން ފަރެސްމާތޮޑާގެ ދެކުނު ފަރާތް ނެގުމަށްޓަކައި ފަސް ނެގުމަށް އެތެރެވަރީގެ ދެ ތިލައެއް ޕްރޮޖެކްޓުގެ ސާވޭގައި ހިމަނާފައިވާކަން ފާހަގަކުރައްވާ މެމްބަރު ހުސެއިން ވިދާޅުވީ އެ ރަށުގެ ފުޓުބޯޅަދަނޑު ހެދުމުގެ މަޝްރޫއަށް ވެސް ވެލި ލިބިފައި ނުވާކަމަށެވެ. 

އެހެން ނަމަވެސް ރައްޔިތުންގެ މަޖިލީހުން އެ މައްސަލަ ބަލައިގެންފައެއް ނުވެއެވެ. މައްސަލަ ބޭރުކޮށްލާފައިވަނީ އެ މައްސަލައަށް ވޯޓުދެއްވި 44 މެމްބަރުންގެ ތެރެއިން 32 މެމްބަރުންގެ ވޯޓުން ނެވެ. އެ މައްސަލަ ބަލައިގަތުމަށް ވޯޓުދެއްވީ އެންމެ 12 މެމްބަރުންނެވެ. 

މަޖިލީހުން އެ މައްސަލަ ބޭރުކޮށްލި ނަމަވެސް ފަރެސްމާތޮޑާ އެއާޕޯޓު ސަރަހައްދުން ވެލިނަގާ މައްސަލައާއި ގުޅިގެން އެ ރަށު ކައުންސިލުންވެސް ދަނީ ކަންބޮޑުވުން ފާޅުކުރަމުން ނެވެ.