އެމްޑީޕީގެ މަޖިލިސް މެމްބަރުންވެސް ފޯޅަވަހި ޕެޓިޝަންގައި ސޮއިކުރަން ފަށައިފިއެވެ.
މި ޕެޓިޝަންގައި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ސޮއިކުރައްވަނިކޮށް ނަގާފައިވާ ފޮޓޯއެއް އާއްމު ކުރަމުން ރައްޔިތުންގެ މަޖިލީހުގެ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވީ، ފޯޅަވަހި ސިއްރު ސިޓީ އަދި ސިއްރުޑީލް އަނބުރާ ގެނައުމަށް ގޮވާލާ ފޯރިޔާއެކު ރައްޔިތުން ސޮއި ކުރަމުންދާ ކަމަށެވެ.
ބޮންޑެ ވަނީ، މިއަދު ބޮޑުތަކުރުފާނު ދުނިޔޭގައި ހުންނެވި ނަމަ ރާއްޖޭގެ ކަނޑުގެ ސަރަހައްދުން ބައެއް ގެއްލޭގޮތަށް ފޯޅަވަހި ޑީލު ހެދި މީހުންގެ ބޯ ކަނޑާލާނެ ކަމަށްވެސް ވިދާޅުވެފައެވެ.
ފޯޅަވަހި މައްސަލައިގައި ދިވެހި ދައުލަތުން ދަމަހައްޓަމުން އައި ސްޓޭންޑް މި ސަރުކާރުން ބަދަލުކުރި ސަބަބު ރައްޔިތުންނަށް ހާމަކޮށްދީ، މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުވި ސިއްރު ސިޓީ ހާމަކުރުމަށް ގޮވާލާ ރައްޔިތުންގެ މަޖިލީހަށް ކުއްލި މައްސަލައެއްވެސް ހުށަހަޅާފައިވެއެވެ.
އެ މައްސަލައަށް އަލިއަޅުވާލައި މަޖިލީހުގައި ބޮންޑެ ދެއްކެވި ވާހަކަފުޅު ފައްޓަވަމުން ވަނީ ފޯޅަވަހި މައްސަލައިގައި ސްޓޭންޑް ބަދަލުކުރީ ފޮރިން މިނިސްޓަރު އަބްދުالله ޝާހިދު މޮރިޝަސްގެ މަސްފެކްޓްރީ ތަކާއެކު 500 މިލިއަން ޑޮލަރުގެ ޑީލެއް ހައްދަވައިގެންކަމަށް ތުހުމަތު ކުރައްވަމުން ނެވެ. އޭނާ ވިދާޅުވީ އަބްދުالله ޝާހިދު އެ ފައިސާ ނަންގަވާފައިވާ ކަމަށެވެ.
"މޮރިޝަސްއޭ މި ކިޔާ ތަނަކީ ކުރީ ޒަމާނުގައި، މުޙައްމަދު ތަކުރުފާނުގެ ޒަމާނުގައި މީހުން ދިރިއުޅުނު ރަށެއްވެސް ނޫން. ކަލާފަނު ޒަމާނުގައިވެސް ދިރިއުޅުނު ރަށެއް ނޫން. މިތަނަށް ކިޔާއުޅުނީ ދިނާރުބޯ. މިތަނަކީ ދިވެހިން ޒަންޖިބާރަށް ދާ މަގުމަތީގައި ބައެއް ފަހަރު ގަދަވެގެން ޖައްސާ ތަނެއް. ފަޅުރަށެއް. މި ސަރުކާރުން މި އުޅެނީ ފަޅުރަށަކަށް ދިވެހިރާއްޖޭގެ ސަރަހައްދެއް ވިއްކާލަން"
މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)
އެކަން ފާހަގަކުރައްވާ ބޮންޑެ ވިދާޅުވީ މިއަދު މުޙައްމަދު ތަކުރުފާނު ދުނިޔޭގައި ހުންނެވި ނަމަ ހައްދަވާނެ ގޮތަކާއި ދޭތެރޭ ވިސްނާވަޑައިގެންނެވޭ ކަމަށެވެ. ނުވަތަ މިއަދު ކަލާފާނު ރަސްގެފާނު ހުންނެވި ހައްދަވާނީ ކިހެނެއްތޯ ހިތްޕުރަށް އަރާވަޑައިގަންނަވާ ކަމަށެވެ.
އެއާއެކު އޭނާ ވިދާޅުވީ ޔަގީނުންވެސް ފޯޅަވަހި ޑީލު ހެދި ފަރާތްތަކުގެ ބޯ ބުރިކުރާނެ ކަމަށެވެ. ބޮންޑެ އެފަދައިން ވިދާޅުވީ ބޮޑުތަކުރުފާނު ދުނިޔޭގައި ހުންނެވި ނަމަ ރާއްޖޭގެ ސަރަހައްދުން ބައެއް ވިއްކާލުމަށް ޑިލު ހެދި މީހުންނަށް ހައްޤު އަދަބު ދެއްވާނެކަން ސިފަކޮށްދެއްވުމުގެ ގޮތުންނެވެ.
"އަޅުގަނޑު ހިތަށް އަރާ މުހައްމަދު ތަކުރުފާނު ދުނިޔޭގައި ހުންނެވި ނަމަ ކިހެނެއްބާއޭ ހައްދަވާނީ؟ ކަލާފާނު ހުންނެވި ނަމަ ކިހެނެއް ބާއޭ.. އަދި ބޮޑުތަކުރުފާނު އަދި އޭގެ ބޮޑު ރަސްގެފާނު ހުންނެވި ނަމަ ކިހެނެއް ބާ އޭ އިސްކަންދަރު ރަސްގެފާނު ހުންނެވި ހައްދަވާނީ؟ މި މީހުންގެ ބޯ ބުރިކޮށްލިސް. ބޯ ކަނޑާލިސް މި މީހުންގެ. އެވަރުގެ ކަމެއް މި ކުރަނީ. ދިވެހިރާއްޖޭގެ ސަރަހައްދެއް މި ދޫކޮށްލަނީ"
މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ)
ފޯޅަވަހި މައްސަލައިގައި ގޮތް ނިންމުން އަންނަ ހުކުރު ދުވަހަށް ތާވަލުކޮށްފައިވާއިރު، އެ މައްސަލައިގައި ސަރުކާރުގެ ސްޓޭންޑް ބަދަލުކުރުމާއި ގުޅިގެން ރާއްޖޭގެ ސަރަހައްދުން ބައެއް ގެއްލުމުގެ ފުރުސަތު ބޮޑުކަމަށް އިން ކަނޑައެޅުމުގައި އިސްކޮށް ހަރަކާތްތެރިވެފައިވާ އަދި ކުރީގެ ބަންޑާރަ ނައިބުކަންވެސް ކުރައްވާފައިވާ ޑރ މުނައްވަރު ވަނީ ވިދާޅުވެފަ އެވެ.
ރައްޔިތުންގެ މަޖިލީހަށް އެ މައްސަލަ ހުށައަޅާ ބަހުސް ފަށާފައިވާއިރު، ފޯޅަވަހި ޑީލު ހެދި މީހުން ހާޒިރުކޮށް އެމީހުން ޖަވާބުދާރީ ކުރުވުމަށް މައްސަލަ ހުށައެޅުއްވި އާދަމް ޝަރީފު އުމަރު ވަނީ ގޮވާލައްވާފަ އެވެ.
Advertisement
This content is created and paid for by advertisers and does not involve Voice Journalists
