ކޮންމެ އަހަރަކު 500 އެއްހާ މީހުން އަލަށް މަސްތުވާތަކެތީގެ ވަބާގައިޖެހޭކަމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް މުޙައްމަދު ހަމީދު މިހެން ވިދާޅުވީ ފުލުހުންގެ 90 ވަނަ އަހަރީ ދުވަހުގެ މުނާސަބަތުގައި ރޭ ހުޅުމާލޭ ސިންތެޓިކް ޓްރެކްގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

މި ޖަލްސާގައި ވާހަކަފުޅު ދައްކަވަމުން ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ ހަލުވިކަމާއެކު ގައުމަށް އަންނަމުންދާ އިޖުތިމާއީ، ސިޔާސީ، އިގްތިޞާދީ، ޓެކްނޮލޮޖީ އަދި މޫސުމީ ބަދަލުތަކާ ގުޅުވައިގެން މުޖުތަމައުގެ ސަލާމަތާއި ރައްކާތެރިކަމަށްޓަކައި ދިވެހި ފުލުހުން މިއަދު ވާންޖެހިފައިމިވަނީ އެބަދަލުތަކަށް ހޭލުންތެރި، ގާބިލްބަޔަކަށްކަމަށެވެ. އަދި ފުލުހުންގެ މުއައްސަސާއަކީ، މި މަސައްކަތުގައި އަބަދުމެ ދެމިއޮންނަ، އެއިރަކަށް ބޭނުންވާ ކުރިއެރުންތައް ލިބި، ރައްޔިތުންގެ އިތުބާރާއި ޔަގީންކަން ފުރިހަމައަށް ލިބިފައިވާ މުއައްސަސާއަކަށް ވުމަށް ކުރަންޖެހޭ ގިނަ ކަންތައްތައް އަދިވެސް އެބަހުރިކަމާ، އެމަގުން ފުލުހުން ކުރަމުން އައި މަސައްކަތުގެ ރަނގަޅު ނަތީޖާވެސް މިއަދު ވަނީ ފެންނަން ފަށާފައިވާކަން ފާހަގަކުރެއްވިއެވެ.

ރޭގެ ޖަލްސާގައި ވާހަކަ ދައްކަވަމުން ޙަމީދު ވަނީ އަލަށް ތައާރަފްވާ ތަފާތު ބާވަތްތަކުގެ މަސްތުވާތަކެއްޗާއެކު ޒުވާނުން މިކަމުގެ ތެރެއަށް ވަންނަ މިންވަރު އިތުރުކަން ފާހަގަކުރައްވާފައެވެ. އެގޮތުން އަލަށް 400 އާއި 500އާ ދެމެދުގެ އަދަދަކަށް އެކި އުމުރު ފުރައިގެ މީހުން ކޮންމެ އަހަރަކުވެސް އަލަށް މަސްތުވާތަކެތީގެ ތެރެއަށް ވަންނަމުންދާކަމަށާ، މިކަމަކީ ކަންބޮޑުވާކަމެއްކަން ފާހަގަކުރައްވާ ސިޕީ ހަމީދު ވިދާޅުވީ މިކަންކަން ހައްލުކުރުމަށް ފުލުހުން ހިމެނޭގޮތުން ޖިނާއީ ޢަދުލުގެ ނިޒާމާއި މި މައްސަލައާ ގުޅުން ހުރި ދައުލަތުގައި ހިމެނޭ ހުރިހާ އިދާރާތަކުން އެއް މިސްރާބަކަށް މަސައްކަތްކުރަން ޖެހޭކަމަށެވެ. 

އަދި މަސްތުވާތަކެތީގެ މައްސަލަ ހައްލުކުރުމަށް ފުލުހުންގެ ސްޓްރެޓެޖިކް އެކްޝަން ޕްލޭންގެ ދަށުން މަސްތުވާތަކެތި އަތުލައިގަނެވޭ މިންވަރު އެތައް ގުނައަކުން އިތުރުކޮށްފައިވާކަމަށްވެސް ހަމީދު ވިދާޅުވިއެވެ.

"ކުށްކުރާ ފަރާތްތައް ހައްޔަރުކޮށް ފިޔަވަޅު އެޅުމަކީ ފުލުހުންގެ މައިގަނޑު މަސައްކަތް. އެހެން ނަމަވެސް އެކަށީގެންވާ ޖާގައާއި ވަސީލަތްތައް ނެތުމުން މީހުން ބަންދުކުރުމުގައި ހުރި ގޮންޖެހުންތަކަކީ މިއަދު ފުލުހުންގެ މަސައްކަތް ކުރިމަތިވެފައިވާ ވަރަށް ބޮޑު ދަތިކަމެއް. އެ ދަތިކަމާއެކުގައި ވެސް މީހުން ބަންދުކޮށް ބެލެހެއްޓުމުގައި ބަންދުކުރެވޭ މީހުންނާއި ލިބިދޭން ޖެހޭ އަސާސީ ހައްގުތަކާއި ހިދުމަތްތައް ވީ އެންމެ ރަނގަޅަކަށް ފޯރުކޮށް ދިނުމަށްޓަކައި ފުލުހުންގެ ކަސްޓޯޑިއަލް އޮފިސަރުން ދަނީ ބުރަ މަސައްކަތްތަކެއް ކުރަމުން" ހަމީދު ވިދާޅުވި އެވެ.

މީގެ އިތުރުން 2022 އަހަރު ތެރޭގައި ތޭރަހާހަސްވުރެ ގިނަ ޖިނާއީ މައްސަލަ ފުލުހުން ތަހުގީގުކޮށްފައިވާކަމާއި، ފުލުހުންގެ ތަހުގީގުތަކުގެ ބޮޑުބައެއް މިއަދި ބިނާވެފައިވަނީ ފޮރެންސިކް ހެކީގެ މައްޗަށްކަމަށް ހަމީދު ވިދާޅުވިއެވެ.

އެގޮތުން މަރުގެ މައްސަލަތަކާއި، ޖިނާއީ އެނޫންވެސް ބޮޑެތި މައްސަލަތަކުގެ ތަހުގީގުތަކުގައި ޑީ.އެން.އޭ އެނަލިސިސްއާއި، ޑިޖިޓަލް ފްރެންސިކްސް އަދި އެނޫންވެސް ބާވަތުގެ ހެކި ހޯދަންޖެހޭ އެފަދަ މައްސަލަތަކުގައި އެންމެ ޒަމާނީ ފޮރެންސިކް ތަހްގީގު އުކުޅުތައް އަންނަނީ ވަރަށް މުހިންމު އުކުޅެއް އަދާކުރަމުންކަމަށް ފާހަގަކުރެއްވިއެވެ.

އަދި ތަހުގީގުކުރުމުގެ މަސައްކަތުގައި ފުލުހުންގެ ތެރޭގައި މިހާރު ހަރަކާތް ތެރިވަމުންދާ ފުލުހުންގެ ތެރެއިން ގިނަ ފުލުހުންނަކީ ގާނޫނުގައި ބުނާ ފެންވަރުގެ ނުވަތަ އެއަށްވުރެން މަތީ ފެންވަރެއްގެ ތަމްރީން ލިބިފައިވާ ފުލުހުން ކަމަށް ކޮމިޝަނަރ ވިދާޅުވިއެވެ.

"ގޮންޖެހުންތައް ހުރިނަމަވެސް ޚިދުމަތް ތަރައްޤީކޮށް ޒަމާނީ ވައްޓަފާޅިއާ ބައްދަލުވާ ރައްދެއް ދެވޭނެ މިންވަރަށް ފުލުހުންގެ ތަޙްޤީގީ ޤާބިލުކަން އިތުރުކުރުމަށް އަންނަނީ މަސައްކަތް ކުރުމުން. ތަޙްޤީގުކުރުމުގައި އުޅޭ 573 ފުލުހުންގެ ތެރެއިން ގިނަ ފުލުހުންނަކީ ޤާނޫނުގައި ބުނާ ފެންވަރުގެ ނުވަތަ އެއްއަށްވުރެ މަތީ ފެންވަރެއްގެ ތަމްރީން ލިބިފައިވާ މީހުން. ދެންތިބި މީހުންނަށް ފުރިހަމަކުރަންޖެހޭ ތަމްރީންތައް ފުރިހަމަކުރަމުން." ކޮމިޝަނަރ އޮފް ޕޮލިސް މުޙައްމަދު ޙަމީދު ވިދާޅުވިއެވެ.

އަދި ފުލުހުންގެ އާ ޤާނޫނެއް ވުޖޫދުވެގެން އައުމަކީ، ފުލުހުންގެ މަސައްކަތަށް ލިބުނު އެންމެ ބޮޑު އެއް ކުރިއެރުންކަން ފާހަގަކުރައްވައި، ފުލުހުންގެ އާ ޤާނޫނުގެ ސަބަބުން ފުރިހަމަޔަށް ޖަވާބުދާރީވާ، ޒިންމާދާރު މުއައްސަސާއަކަށް ވުމަށް މަގުފަހިކޮށްދީފައިވާކަމަށާއި ޒަމާނީ ވަސީލަތްތަކާއި އުކުޅުތައް ފުލުހުންގެ މަސައްކަތުގައި ބޭނުންކުރުމަށް ހައިސިއްޔަތު ލިބިދިނުމުގެ އިތުރުން، ރައްޔިތުންނާއި ގާތުން ރައްޔިތުންގެ ބައިވެރިވުމާއެކު ޚިދުމަތް ދިނުމަށް މަގުފަހިކޮށްދީފައިވާކަމަށް ވިދާޅުވިއެވެ.