ރ. ފުއްގިރި މުއާމަލާތާއި ގުޅުވާ ޕީޕީއެމްގެ ރިޔާސީ ކެންޑިޑޭޓު އަދި ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ މައްސަލައިގެ ހެކިބަސް ނެގުން އާދިއްތަ ދުވަހަށް ތާވަލުކޮށްފި އެވެ.
ފުއްގިރި މައްސަލައާއި ގުޅިގެން މިއަދު ކުރިމިނަލް ކޯޓުގައި ކުރިއަށް ގެންދިޔަ އަޑުއެހުމުގައި އޮތީ އެ މައްސަލައިގެ އިފްތިތާހީ ބަޔާން އިއްވުމަށްފަހު ހެކިބަސް ނަގާ ގޮތަށެވެ.
އެހެން ނަމަވެސް ރައީސް ޔާމިންގެ ފަރާތްޕުޅުން ވަނީ އިފްތިތާހީ ބަޔާން ހުށައެޅުމަށްފަހު އިއުތިރާޒެއް ހުށައަޅަން ބޭނުންފުޅުވާކަމަށް ބުނެފައެވެ. އެކަމާއި ގުޅިގެން އެ މައްސަލަ ބައްލަވާ ގާޒީ އަލީ ނަދީމު އެ ފުރުސަތު ދެއްވިއެވެ.
ޖިނާއީ އިޖުރާއަތުގެ ޤާނޫނުގެ 145 ވަނަ މާއްދާގެ (ރ) ގެ ދަށުން ރައީސް ޔާމިންގެ ފަރާތްޕުޅުން ވަނީ ދައުލަތުން ހުށަހަޅާފައިވާ ހެކިތަކެއް ބަލައިނުގަނެވޭނެ ކަމަށް ބަޔާންކޮށް އިއުތިރާޒުކޮށްފަ އެވެ.
ޖިނާއީ އިޖުރާއަތުގެ ޤާނޫނު ބުނާގޮތުން ހަސްމަކު އެފަދަ ހުށަހެޅުމެއް ހުށަހަޅައިފިނަމަ، ޝަރީއަތް ކުރިއަށް ގެންދެވޭނީ އެކަމަށް ގޮތެއް ކަނޑައެޅުމަށް ފަހުގައެވެ.
މިއަދު އިފްތިތާހީ ބަޔާން އިއްވަން ފެއްޓެވުމުގެ ކުރިން ވެސް ޑރ. މުހައްމަދު ޖަމީލް ވަނީ މައްސަލަ ކުރިއަށް ގެންދިއުމަށް އިއުތިރާޒްކޮށްފަ އެވެ.
އެގޮތުން ޝަރީއަތުގެ ކުރީގެ ހުށަހެޅުންތަކާމެދު ނިންމި ނިންމުން ސުޕްރީމް ކޯޓުގައި އިސްތިއުނާފް ކޮށްފައި ވަނިކޮށް މައްސަލަ ކުރިއަށް ގެންދާތީ އެކަމަށް އިއުތިރާޒް ކުރާ ކަމަށް ޑރ ޖަމީލު ވިދާޅުވި އެވެ.
އޭގެ އިތުރުން މިއަދުގެ އަޑުއެހުމުގައި ރައީސް ޔާމިން ވަނީ އެ މައްސަލައިގައި އެމަނިކުފާނުގެ މައްޗަށް ދައުވާކޮށްފައިވަނީ ޤާނޫނު އަސާސީއާއި ޚިލާފަށްކަން ފާހަގަކުރައްވާ އަލުން އެ މައްސަލަ ރިއުކުރުމަށް އެދިވަޑައިގަންނަވާފަ އެވެ. އެމަނިކުފާނުގެ ފަރާތްޕުޅުން ޤާނޫނީ ވަކީލުން ފާހަގަކުރެއްވި ގޮތުގައި ދައުލަތުން އުފުލާފައިވާ ދައުވާތަކަކީ ޤާނޫނު އަސާސީގެ 60 ވަނަ މާއްދާއާއި ޚިލާފަށް ހުށައަޅާފައިވާ ދައުވާތަކެކެވެ.
މިއަދުގެ އަޑުއެހުމުގައި މައްސަލައިގެ އިފްތިތާހީ ބަޔާން އިއްވި ނަމަވެސް ހެކިބަސް ނެގުމާއި ގުޅޭގޮތުން ކުރި އިއުތިރާޒާއި ގުޅިގެން ގާޒީ ނިންމެވީ އެ އަޑުއެހުން އާދިއްތަ ދުވަހަށް ފަސްކުރުމަށެވެ.
އެއާއެކު މިއަދުގެ އަޑުއެހުން ވަނީ ކުރުކޮށްލާފަ އެވެ.
Advertisement
This content is created and paid for by advertisers and does not involve Voice Journalists
