މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ދެމުވެރިކޮށް ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ މައްސަލައިގެ އިފްތިތާހީ ބަޔާން މިއަދު ކްރިމިނަލް ކޯޓުގައި އިއްވައިފި އެވެ. 

އެ ބަޔާން އިއްވަވަމުން އެމަނިކުފާނުގެ އިސް ޤާނޫނީ ވަކީލު ޑރ މުހައްމަދު ޖަމީލު އަހުމަދު ވިދާޅުވީ އެ މައްސަލައާއި ގުޅިގެން ރައީސް ޔާމިންގެ މައްޗަށް އުފުލާފައިވާ ރިޝްވަތު ޤަބޫލުކުރުމާއި މަނީލޯންޑާ ކުރިކަމުގެ ކުށުގެ ދައުވާ ސާބިތުކޮށްދިނުމަށް އެކަށީގެންވާ ހެއްކާއި ގަރީނާ ދައުލަތަށް ހުށައަޅާފައި ނުވާ ކަމަށެވެ. 

އެގޮތުން ޑރ ޖަމީލު ފާހަގަކުރެއްވި އެއް ކަމަކީ ރިޝްވަތު ހިފުމުގެ އަމަލު ޔާމީން ހިންގީ ކްރިކް ރިޒާ މެދުވެރިކޮށް ކަމަށް ބުނާއިރު ދެ މީހުންގެ މައްޗަށް ދެ ގާނޫނަކުން ދައުވާ ކޮށްފައިވާ ކަމަށެވެ. މިއީ އެއް އަމަލަކަށްވާއިރު ރައީސް ޔާމީންގެ މައްޗަށް ގާނޫނުލްއުގޫބާތުގެ 510 މާއްދާގެ (ހ)ގެ ދަށުން ދައުވާކޮށްފައިވާއިރު، ރިޒާގެ މައްޗަށް ކޮރަޕްޝަން ހުއްޓުވުން މަނާކުރުމުގެ ގާނޫނުގެ ދެވަނަ މާއްދާގެ (ހ)ގެ ދަށުން ދައުވާކޮށްފައި ވަނީ ކޮން ގޮތަކުންތޯ ޑރ ޖަމީލު ވަނީ ސުވާލުކުރައްވާފަ އެވެ. 

ޑރ ޖަމީލު ފާހަގަކުރެއްވި ގޮތުގައި އިސްވެ ބަޔާންކޮށްފައިވާ ދެ ގާނޫނުގައި މަންފާ މާނަކޮށްފައިވަނީ މުޅިން ދެގޮތަކަށެވެ. އެހެންކަމުން ދައުލަތުން ތުހުމަތުކުރާ ގޮތަށް އެ މައްސަލަ ސާބިތު ނުކުރެވޭނެކަމަށް ޑރ ޖަމީލު ވިދާޅުވި އެވެ. 

އޭގެ އިތުރުން ބަޔާން އިއްވަމުން ޑރ ޖަމީލު ވިދާޅުވީ ދައުލަތުން ތުހުމަތުކުރާ ރިޝްވަތުގެ މުއާމަލާތް ހިންގާފައި ވަނީ ކްލެސިކް ސިޓީ ހޯލްޑިންސްއަށް ރ. ފުއްގިރި ހަތަރު ލައްކަ ޑޮލަރަށް ދޫކުރަން އެމްއެމްޕީއާރްސީން މާ ކުރިން އޮފާ ލެޓާ ދީފައި ވަނިކޮށް ކަމަށެވެ.

އެ ސިޓީ ދިންތާ 50 ދުވަސް ފަހުން ކަމާ ގުޅުމެއް ނެތް ފަރާތަކަށް 1.55 މިލިއަން ޑޮލަރުގެ ރިޝްވަތު ދީގެން އެ ރަށް ހޯދުމަކީ ހަމަ ބުއްދިން ވިސްނާލިޔަސް ޤަބޫލުކުރެވޭނެ ކަމެއް ނޫންކަމަށް ޑރ ޖަމީލު ވިދާޅުވި އެވެ. އަދި މި މުއާމަލާތަކީ އެމްޑީއޭގެ ރައީސް އަހުމަދު ސިޔާމް އަތުން ޑޮލަރު ގަންނަން ހިންގި މުއާމަލާތެއް ކަމަށް ވެސް ޖަމީލް ފާހަގަކުރައްވާފައިވެ އެވެ.

މިއަދުގެ އަޑުއެހުން އެންމެ ފުރަތަމަ ތާވަލުކޮށްފައިވަނީ އިފްތިތާހީ ބަޔާން ނެގުމަށްފަހު ހެކިބަސް ވެސް ނަގާ ގޮތަށެވެ. 

އެހެން ނަމަވެސް ރައީސް ޔާމިންގެ ފަރާތްޕުޅުން ވަނީ އެކަމަށް އިއުތިރާޒުކޮށްފަ އެވެ. 

އެގޮތުން ޝަރީއަތުގެ ކުރީގެ ހުށަހެޅުންތަކާމެދު ނިންމި ނިންމުން ސުޕްރީމް ކޯޓުގައި އިސްތިއުނާފް ކޮށްފައި ވަނިކޮށް މައްސަލަ ކުރިއަށް ގެންދާތީ އެކަމަށް އިއުތިރާޒް ކުރާކަމަށް އެމަނިކުފާނުގެ ފަރާތްޕުޅުން ވަނީ ވިދާޅުވެފަ އެވެ. 

އެކަންކަން ފާހަގަކުރުމާއި ގުޅިގެން ގާޒީ ނަދީމު ވަނީ އިފްތިތާހީ ބަޔާން ނެގުމަށްފަހު އަޑުއެހުން ކުރުކޮށްލާފަ އެވެ. އަދި މައްސަލައިގެ ހެކިބަސް ނެގުމުގެ އަޑުއެހުން އާދިއްތަ ދުވަހަށް ތާވަލުކޮށްފަ އެވެ.