ރަސްމީ ދަތުރުފުޅެއްގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ރޭ އިނގިރޭސިވިލާތަށް ފުރާވަޑައިގެންފިއެވެ.

އެގޮތުން ރައީސް އޮފީހުން ބުނެފައިވަނީ ރައީސުލްޖުމްހޫރިއްޔާގެ ދެކަނބަލުންގެ މިދަތުރުފުޅަކީ، އިނގިރޭސި ވިލާތުގެ ރަސްގެފާނު ޗާލްސް 3 ވަނަ، ރަސްކަމުގެ ތަޚުތުގައިވެޑުވުމުގެ ރަސްމިއްޔާތުގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެއް ކަމަށެވެ.

މިއާއިއެކު މިރަސްމިއްޔާތު އޮންނާނީ މިހަފްތާ ބަންދުގައި ކަމަށް ރައީސް އޮފީހުން ވަނީ ފާހަގަކޮށްފައެވެ.

ރައީސުލްޖުމްހޫރިއްޔާގެ ދެ ކަނބަލުންގެ އިތުރުން ފޮރިން މިނިސްޓަރ އަބްދުالله ޝާހިދުވެސް މިދަތުރުފުޅުގައި ބައިވެރިވެވަޑައިގަންނަވައެވެ.

އެގޮތުން މިކަމާއި ގުޅިގެން ޝާހިދު ކުރެއްވި ޓްވީޓެއްގައި، އިނގިރޭސިވިލާތުގެ ތަހުތަށް ޗާލްސް ތިނެން ވަޑުވާ ތާރީހީ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ އިނގިރޭސިވިލާތަށް ކުރައްވާ ދަތުރުފުޅުގައި އަރިހުގައި ބައިވެރިވުމަކީ ޝަރަފެއް ކަމަށް ވިދާޅުވިއެވެ.

މިއާއިއެކު އިނގިރޭސިވިލާތަކީ ދިވެހިރާއްޖޭގެ ޒާމާންވީ ގާތް އެކުވެރިއެއް ކަމަށް ފާހަގަކޮށް މި ދަތުރުގެ ސަބަބުން މިގުޅުން އިތުރަށް ބަދަހިވެގެން ދާނެ ކަމަށް އުންމީދު ކުރާ ކަމަށް ވެސް ޝާހިދު ވިދާޅުވިއެވެ.