ރ. ފުއްގިރި މައްސަލައިގައި ޝަރީއަތުގެ ކުރިން ހުށައަޅާ ހުށައެޅުންތަކާއި ގުޅިގެން ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ސުޕްރިމް ކޯޓަށް ހުށައެޅި އިސްތިއުނާފުގެ ފުރަތަމަ އަޑުއެހުން މިއަދު ބާއްވާ އެމަނިކުފާނުގެ ފަރާތްޕުޅުން އިސްތިއުނާފީ ނުކުތާތަށް ހުށައަޅުއްވައިފި އެވެ. 

ސުޕްރީމް ކޯޓުގައި މި މައްސަލަ ކުރިއަށް ގެންދަނީ އަހުމަދު ކްރިކް ރިޒާގެ ފަރާތުން ހުށައަޅާފައިވާ މައްސަލައާވެސް އެކުއެކީގައެވެ.

މި މައްސަލަ ބެއްލެވުމަށް ސުޕްރިމް ކޯޓުގައި ވަނީ 3 ފަނޑިޔާރުންގެ ބެންޗެއް އެކުލަވާލައްވާފަ އެވެ. އަދި ބެންޗުގެ ރިޔާސަތު ބައްލަވަނީ ފަނޑިޔާރު ހުސްނުއްސުޢޫދެވެ. 

އެ މައްސަލައާއި ގުޅިގެން މިއަދު ކުރިއަށް ގެންދިޔަ އަޑުއެހުމުގައި ދަށު ކޯޓުން ނިންމި ނިންމުންތައް ރައީސް ޔާމީނުގެ ފަރާތުން ހައިކޯޓުގައި އިސްތިއުނާފު ކުރުމުން ހައިކޯޓުންވެސް ދަށު ކޯޓުގެ ނިންމުމަށް ތާއީދު ކޮށްފައިވާތީ އިސްތިއުނާފު ކުރި ނުގުތާތައް ހުށައަޅުއްވާފަ އެވެ. 

އެގޮތުން އެމަނިކުފާނުގެ ފަރާތްޕުޅުން މައިގަނޑު 3 ނުކުތާއެއް ވަނީ ހުށައަޅުއްވާފަ އެވެ. 

އެއްކަމަކަށް ހުށައެޅުއްވީ ދައުލަތުން ހުށައަޅާފައިވާ ބައެއް ހެކިތައް ޝަރީއަތަށް ބަލައިނުގަތުމަށް ހުށައެޅި ހުށައެޅުމުން އެ ހެކިތައް ބަލައިނުގަންނަން ޖެހޭ އެއްވެސް ސަބަބެއް ނެތްކަމަށް ދަށުކޯޓުން ނިންމި ނިންމުން ހައިކޯޓުން ދަމަހައްޓާފައިވާތީ އިސްތިއުނާފު ކުރި ނުގުތާއެކެވެ. 

އެ މައްސަލައިގައި ހެކިންގެ ގޮތުގައި ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުالله ޒިޔަތުގެ ހެކިބަސް ހިމެނޭއިރު، ރިޔާސީ ލޯންޗުކޮޅު ގޮއްވާލި މައްސަލައިގައި ވެސް ތުހުމަތު ކުރެވުނު ފަރާތްތަކަށް ކުރި ދައުވާތައް އަނބުރާ ގެންގޮސްފައިވާކަން ރައީސް ޔާމިންގެ ފަރާތްޕުޅުން ވަނީ ފާހަގަކޮށްފަ އެވެ. 

އެމަނިކުފާނު ފަރާތްޕުޅުން ދެން ހުށައެޅި ނުކުތާއަކީ ރައީސް ޔާމީނު ވިދާޅުވީ ފުއްގިރި މައްސަލައިގެ ޝަރީޢަތުގެ ކުރިން އެމަނިކުފާނުގެ ފަރާތްޕުޅުން ހުށަހެޅުއްވި ކަންކަމުގެ ތެރޭގައި ހިމެނޭ ހެކި ހާމަކުރުމުގެ މައްސަލައާ ގުޅިގެން ކުރިމިނަލް ކޯޓުން ނިންމާފައިވާ ނިންމުން ހައިކޯޓުން ދެމެހެއްޓުމާއި ގުޅިގެން ހުށައެޅި އިސްތިއުނާފީ ނުގުތާއެވެ. 

ހެކިތައް ހޯއްދެއްވުމަށް އެމަނިކުފާނުގެ ފަރާތްޕުޅުން ހުށައެޅި ސަބަބު ކޯޓަށް ސާފުކޮށްދެއްވަމުން ރައީސް ޔާމިންގެ ފަރާތްޕުޅުން ވިދާޅުވީ ފުއްގިރި މައްސަލައިގައި ސައްކަތްކުރަނީ ރައީސުލްޖުމްހޫރިއްޔާއަކީ މަޤާމުގެ ހައިސިއްޔަތުން ޓުއަރިޒަމް މިނިސްޓަރަށާއި އެމްއެމްޕީއާރުސީގެ އެމްޑީއަށް ވަކި ކަހަލަ އިރުޝާދުތަކެއް ދެއްވާ ބޭފުޅެއްކަން ސާބިތުކޮށްދިނުމަށް ކަމަށެވެ. 

އެހެންކަމުން ފުއްގިރި މައްސަލަ ކުއްޔަށް ދޫކުރުމުގެ މުއާމަލާތު ހިނގިކަމަށް އެ ބުނާ މުއްދަތުގެ ތެރޭގައި ރައީސުލްޖުމްހޫރިއްޔާގެ އޮފީހުން ރައީސުލްޖުމްހޫރިއްޔާ އާއި ޓުއަރިޒަމް މިނިސްޓްރީގެ ދަށުން ހިންގާ އެމްއެމްޕީއާރުސީގެ އެމްޑީއާއި ދެމެދު ހިންގާފައިވާ މުއާމަލާތުތަކާއި އެ މުއާމަލާތާއި ގުޅޭ އެއްވެސް ކަހަލަ ލިޔެކިޔުމެއް އޮތް ނަމަ އެ ހިއްސާކުރަން ޖެހޭކަމަށް ރައީސް ޔާމިންގެ ފަރާތްޕުޅުން ވަނީ ވިދާޅުވެފަ އެވެ.

މި މައްސަލައިގައި އެފަދަ އެއްވެސް ލިޔެކިޔުމެއް ހިއްސާކޮށްފައި ނުވަތަ ހުށައަޅާފައި ނުވާކަން އެމަނިކުފާނުގެ ފަރާތްޕުޅުން ފާހަގަކުރެއްވި އެވެ. 

ރައީސް ޔާމިންގެ ފަރާތްޕުޅުން ވަނީ އެދިފައިވާ ލިޔެކިޔުންތައް ފޯރުކޮށް ނުދިނުމުގެ ސަބަބުން އެ މައްސަލައިގައި ދިފާއު ބިނާކުރުމަށް ހުރި ގޮންޖެހުންތަކަށް ވެސް އަލިއަޅުވާލައްވާފަ އެވެ.

މިއަދުގެ އަޑުއެހުމުގައި ވާހަކަދައްކަވަމުން ރައީސް ޔާމިން ވިދާޅުވީ ރައީސުލްޖުމްހޫރިއްޔާގެ މަޤާމުގައި ހުންނަވައިގެން ވަކި ރަށެއް ވަކި ފަރާތަކަށް ދިނުމަށް އެއްވެސް ފަރާތަކަށް ދޫކުރުމަށް އެމަނިކުފާނު އަންގަވާފައި ނުވާނެ ކަމަށެވެ. ދައުލަތުން އެފަދައިން ތުހުމަތު ކުރާނަމަ އެކަމާއި ގުޅޭ ލިޔުންތައް ފޯރުކޮށްދޭން ކަމަށާއި، އެ ލިޔެކިޔުންތަކަކީ ދައުލަތުގެ އަތުގައި ހުރި ލިޔެކިޔުންތަކެއްކަމަށް ރައީސް ޔާމިން ވިދާޅުވި އެވެ. 

ރައީސް ޔާމިން ހޯއްދަވަން އެދިވަޑައިގަންނަވާ މައުލޫމާތަކީ އެމަނިކުފާނުގެ މައްޗަށް ހުށަހަޅާފައިވާ ދައުވާގެ އަސާސްކަމުގައިވާ ޓުއަރިޒަމް މިނިސްޓަރާއި އެމްއެމްޕީއާރުސީގެ އެމްޑީއާ ރައީސުލްޖުމްހޫރިއްޔާއާ އޮންނަކަމަށް ދައުލަތުން ބުނާ ގުޅުން ނުވަތަ ލިންކު މުގުރައިލުމަށް ބޭނުންވާ ލިޔުންތައްކަމަށާއި، އެ ލިޔުންތަކަކީ ދައުލަތުގައި ހުންނާނެ ހެކިތަކެއްކަން ރައީސް ޔާމިން ފާހަގަކުރެއްވި އެވެ. 

ތިން ވަނަ ނުކުތާއެއްގެ ގޮތުގައި ރައީސް ޔާމިންގެ ފަރާތްޕުޅުން ހުށައެޅުއްވީ ހެކި ހާމަކޮށްދިނުމަށް އެދި ހުށައެޅުމާ ގުޅޭގޮތުން ގޮތް ނިންމުމުގައި ޖިނާއީ އިޖުރާއަތުގެ ޤާނޫނުގެ 129 ވަނަ މާއްދާ ނުބައިކޮށް މާނަކޮށްފައިވާކަމަށް ބުނެ ހުށައެޅި ނުކުތާއެކެވެ.

އެމަނިކުފާނުގެ ފަރާތްޕުޅުން އެދިލެއްވީ އަދީބާއި ޒިޔަތަކީ އެމަނިކުފާނުގެ އަދާވާތްތެރިންގެ ގޮތުގައި ކަނޑައަޅައިދީ އެމަނިކުފާނާއި ދެކޮޅަށް އަދީބާއި ޒިޔަތުގެ ހެކިބަސް ބަލައިނުގަނެވޭނެކަމަށް ކަނޑައަޅާއި ދިނުމަށެވެ. އަދި ދެން ހުރި ހެކިތަކާއި ގުޅިގެންވެސް އަލުން ގޮތެއް ނިންމަން ޖެހޭކަމަށް ރައީސް ޔާމިންގެ ފަރާތްޕުޅުން ވަނީ އެދިވަޑައިގަންނަވާފަ އެވެ. 

އޭގެ އިތުރުން މިއަދުގެ އަޑުއެހުމުގައި ރައީސް ޔާމިންގެ ފަރާތްޕުޅުންވެސް އަދި އެ މައްސަލައިގައި ދައުވާ އުފުލާފައިވާ ކުރިކް ރިޒާގެ ފަރާތުންވެސް ވަނީ ސުޕްރިމް ކޯޓަށް ހުށައަޅާފައިވާ އިސްތިއުނާފީ މައްސަލަ ވަކި ގޮތަކަށް ނިމެންދެން ދަށުކޯޓުގައި އޮތް ފުއްގިރި މައްސަލަ މަޑުޖައްސާލުމަށް އެދިވަޑައިގެންފަ އެވެ. 

އެއާއެކު މިއަދުގެ އަޑުއެހުން ސުޕްރިމް ކޯޓުން ނިންމާލާފައިވަނީ ހޯމަ ދިވަހާއި ހަމަޔަށް ދަށުކޯޓުގައި އޮތް ފުއްގިރި މައްސަލަ މަޑުޖައްސާލުމަށް ސުޕްރިމްކޯޓަށް އަމުރުކޮށްފަ އެވެ. އަދި ހެއްކާއި ގުޅޭގޮތުން ސުޕްރިމް ކޯޓަށް ހުށައެޅިފައިވާ މައްސަލަ އަންނަ ހޯމަ ދުވަހާއި ހަމަޔަށް ބަލާ ނިންމާ ފައިސަލާ ކުރައްވާނެކަމަށް އެ މައްސަލަ ބައްލަވާ އިސް ފަނޑިޔާރު ހުސްނުއްސުއޫދު ވަނީ ވިދާޅުވެފަ އެވެ.