ރ. ފުއްގިރި މައްސަލައިގައި ޝަރީއަތުގެ ކުރިން ހުށައަޅާ ހުށައެޅުންތަކާއި ގުޅިގެން ވާދަވެރި ސިޔާސީ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ސުޕްރިމް ކޯޓަށް ހުށައެޅި އިސްތިއުނާފުގެ އަޑުއެހުންތައް ނިންމާލައިފި އެވެ. 

އެ މައްސަލައިގައި ރައީސް ޔާމިންގެ ފަރާތްޕުޅުން އިސްތިއުނާފީ ނުކުތާތައް ވަނީ އިއްޔެގެ އަޑުއެހުމުގައި ހުށައަޅާފަ އެވެ. 

އެމަނިކުފާނުގެ ފަރާތްޕުޅުން ވަނީ 3 ނުކުތާއެއް ހުށައަޅުއްވާފަ އެވެ. 

އެ މައްސަލައިގައި ހެކިންގެ ގޮތުގައި ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުالله ޒިޔަތުގެ ހެކިބަސް ހިމެނޭއިރު، ރިޔާސީ ލޯންޗުކޮޅު ގޮއްވާލި މައްސަލައިގައި ވެސް ތުހުމަތު ކުރެވުނު ފަރާތްތަކަށް ކުރި ދައުވާތައް އަނބުރާ ގެންގޮސްފައިވާކަން ރައީސް ޔާމިންގެ ފަރާތްޕުޅުން ވަނީ ފާހަގަކޮށްފަ އެވެ. 

މިއަދު ކުރިއަށް ދިޔައީ އެ މައްސަލައިގައި ދައުވާ އުފުލާފައިވާ މއ. ކުރިކީލަހިޔާ އަޙުމަދު ކްރިކް ރިޒާގެ ފަރާތުން އިސްތިއުނާފީ ނުކުތާތައް ހުށައެޅުމެވެ. 

އެގޮތުން މިއަދުގެ އަޑުއެހުމުގައި ކުރިކް ރިޒާގެ ފަރާތުން 4 ނުކުތާއެއް ވަނީ ސުޕްރިމް ކޯޓަށް ހުށައަޅާފަ އެވެ. 

އޭގެ ތެރޭގައި ދައުވާ ހުށައެޅުމުގައި އުނިކަމެއްވާކަމަށް ބަޔާންކޮށް ހުށައެޅި 2 ހުށައެޅުމަކާއި، ހެއްކާ ގުޅޭ 2 ހުށައެޅުމަކާއި ގުޅިގެން ދަށު ކޯޓުން ނިންމި ނިންމުމަށް ހައިކޯޓުންވެސް ތާއީދުކޮށްފައިވާތީ އިސްތިއުނާފު ކުރި ނުކުތާތަކެއް ހިމެނެއެވެ.

ކްރިކް ރިޒާގެ ފަރާތުން ވަނީ ޝަރީއަތުގެ ކުރީގެ ހުށައެޅުމާއި ގުޅޭގޮތުން ކްރިމިނަލް ކޯޓުން ނިންމާފައިވާ ނިންމުމާއި، އެ ނިންމުމަށް ތާއީދުކޮށް ހައިކޯޓުން ނިންމާފައިވާ ނިންމުން ބާތިލުކޮށްދިނުމަށް އެދިފައެވެ.

އެގޮތުން ކްރިކް ރިޒާގެ މައްޗަށް ދައުވާ އުފުލަން ޖެހޭނީ ޤާނޫނުލްއުޤޫބާތުގެ ދަށުންކަމަށް ކަނޑައަޅުއްވައިދެއްވުމަށް ވަނީ އެދިފައެވެ.

ރ ފުއްގިރި މައްސަލައިގައި ދައުވާ އުފުލާފައިވާ ފަރާތްތަކުން ސުޕްރިމްކޯޓުގައި އިސްތިއުނާފުކޮށްފައިވާ މައްސަލައިގައި އެ ފަރާތްތަކުން ހުށައަޅާ އިސްތިއުނާފީ ނުކުތާތައް ހުށައެޅުމަށްފަހު ދައުލަތުން ވަނީ އެ ނުކުތާތަކަށް ރައްދުދީފަ އެވެ. 

މިއަދުގެ އަޑުއެހުން ނިންމާލައްވާފައިވަނީ އެ މައްސަލައާއި ގުޅިގެން ދެފަރާތުން ދައްކަން ހުރި ހުރިހާ ވާހަކަތަކެއް ހުށައެޅުމަށް ފަހުގައެވެ. ގާތްގަނޑަކަށް 5 ގަޑިއިރަށް މިއަދުގެ އަޑުއެހުން ދިގު މެދިގެން ދިޔައެވެ. 

އެ މައްސަލައިގެ އަޑުއެހުންތައް ނިންމަވާލައްވަމުން އެ މައްސަލަ ބައްލަވާ ސުޕްރިމް ކޯޓުގެ ބެންޗުގެ ރިޔާސަތުގައި އިންނެވި ހުސްނުއްސުޢޫދު ވިދާޅުވީ އެ މައްސަލައާއި ގުޅިގެން އަންނަ ހޯމަ ދުވަހަށް ގޮތެއް ނިންމާނެ ކަމަށެވެ. އަދި ހުކުމް އިއްވާނެ ކަމަށެވެ. 

ސުޕްރިމް ކޯޓުން ވަނީ ފުއްގިރި މައްސަލައާއި ގުޅޭގޮތުން އެ ކޯޓަށް ހުށައަޅާފައިވާ އިސްތިއުނާފު މައްސަލަ ނިމެންދެން ދަށުކޯޓުގައި ކުރިއަށްދާ ޝަރީއަތް މަޑުޖައްސާލުމުގެ ވަގުތީ އަމުރެއް ނެރެފަ އެވެ.