މޮނިކޮން އަމުރަކާ ޚިލާފުވި މީހަކު ގޭގައި ބަންދުކުރުމަށް ކްރިމިނަލް ކޯޓުން ހުކުމް ކޮށްފިއެވެ.
އެގޮތުން މި އަމުރާ ޚިލާފުވި ތ. ތިމަރަފުށި ގަރޑްންހައުސް އަހުމަދު ރިޝްވާން އަކީ ހުޅުމާލޭގައި ޓޫރިސްޓުންނަށް ވަޅިން ހަމަލާ ދިން މައްސަލައިގައި ދައުވާ ނުކުރެވި ދޫވި މީހުންގެ ތެރެއިން މީހެކެވެ.
މި މައްސަލައާއި ގުޅިގެން ކްރިމިނަލް ކޯޓްގެ ނިންމުމުގައި ބުނެފައިވަނީ އަހްމަދު ރިޝްވާންގެ މައްޗަށް ދިވެހިރާއްޖޭގެ ހައިކޯޓްއިން ކޮށްްފައިވާ މޮނިކޮމް އަމުރުގައި ވަނީ ރޭގަނޑު 20:30 އިން ފެށިގެން ހެނދުނު 5:00 އަކާއި ހަމައަށް ބޭރަށް ނުދިއުމަށް ކަމަށެވެ.
އެހެންނަމަވެސް މިދިޔަ އަހަރު ޑިސެމްބަރު 01 ގައި 22:11 ކަންހާއިރު ރިޝްވާން ދިރިއުޅޭ ގެއިން ބޭރަށް ނިކުމެ އޭނާގެ މައްޗަށް ކޮށްފައިވާ މޮނިކޮން އަމުރާއި ޚިލާފު ވެފައިވާ ކަމަށެވެ.
މިއާއިއެކު މި ދައުވާއަށް ރިޝްވާން އިއުތިރާފުވެފައިވާ ކަމަށާއި މި ދައުވާގައި ބުނާގޮތަށް ބޭރަށް ނުކުމެފައިވާނެ ކަމަށް އޭނާ އެއްބަސްވެފައިވާ ކަމަށް ކްރިމިނަލް ކޯޓްއިން ބުނެފައިވެއެވެ.
އެހެންކަމުން އޭނާ މިހާތަނަށް ބަންދުގައި ހޭދަކުރި މުއްދަތު އުނިކުރުމަށްފަހު އޭނާގެ މައްޗަށް ވަނީ 6 މަހާއި 20 ދުވަހަށް ގޭގައި ބަންދުކުރުމަށް ކްރިމިނަލް ކޯޓްއިން ހުކުމްކޮށްފައެވެ.
Advertisement
This content is created and paid for by advertisers and does not involve Voice Journalists
