ސިވިލް ކޯޓާއި ކްރިމިނަލް ކޯޓުގެ އިސްޤާޟީ ކަމުގެ މަގާމަށް ދެބޭފުޅަކު އައްޔަން ކުރައްވައިފިއެވެ.

މިކަމާއި ގުޅިގެން ޖުޑީޝަލް ސަރވިސް ކޮމިޝަން (ޖޭއެސްސީ) އިން ކޮށްފައިވާ އިއުލާނެއްގައި ބުނެފައިވަނީ މި ދެ މަގާމަށް އެ ކޮމިޝަނުން ކޮށްފައިވާ 02 އިޢުލާންގެ ދަށުން ކުރިމަތިލީ ފަރާތްތަކާއި "ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީ" އިން އިންޓަރވިއުކޮށްފައިވާ ކަމަށެވެ.

މިއަށްފަހު ކްރިމިނަލް ކޯޓުގެ އިސްޤާޟީ ކަމަށް ހަމަޖެއްސުމަށް ކޮމިޝަނަށް ލަފާ އަރުވާފައިވަނީ ޅ.ހިންނަވަރު، މާތިލަ، އަލްއުސްތާޛު އާދަމް މުޙައްމަދު ކަމަށް ޖޭއއެސްސީ އިން ބުނެފައިވެއެވެ. އަދި ސިވިލް ކޯޓުގެ އިސްޤާޟީ ކަމަށް ހަމަޖެއްސުމަށް ކޮމިޝަނަށް ލަފާއަރުވާފައިވަނީ ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދު ކަމަށް ވެސް އެ ކޮމިޝަނުން ބުނެފަައިވެއެވެ.

Advertisement

ސިވިލް ކޯޓުގެ އިސްޤާޟީ ކަމަށް އައްޔަންކުރެވުނު ގއ.މާމެންދޫ، ފެހިގެ، އަލްއުސްތާޛު އަޙްމަދު ނިމާލް ޖުނައިދު

އެހެންކަމުން މި ދެބޭފުޅުން މަގާމަށް އައްޔަންކުރުމަށް މޭ 03 ގައި ބޭއްވުނު އެ ކޮމިޝަންގެ ބައްދަލުވުމުގައި ނިންމާ، މިއަދު އެދެބޭފުޅުންނަށް ވަނީ ފަތްކޮޅު އަރުވާފައި ކަމަށް ޖެއެސްސީއިން ބުނެފައިވެއެވެ.

ކްރިމިނަލް ކޯޓްގެ އިސް ޤާޟީގެ މަގާމް ހުސްވެފައިވަނީ އެ މަގާމްގައި ކުރިން ހުންނެވި ޤާޟީ އަހުމަދު ޝަކީލް ހައި ކޯޓްގެ ފަނޑިޔާރުކަމަށް ހުވާކުރެއްވުމާއި ގުޅިގެންނެވެ.

އެހެންކަމުން މިއަހަރުގެ 13 މާރިޗު އިން ފެށިގެން ކްރިމިނަލް ކޯޓުގެ އިސް ޤާޟީގެ ގޮތުގައި ވަގުތީ ގޮތުން މަސައްކަތް ކުރައްވާފައިވަނީ ޤާޟީ އާދަމް މުހައްމަދެވެ.