ދައުލަތުގެ ބަންޑާރަ ނައިބަކީ ބަޔަކު ހަދާހާ "ޑީލެއް" ދިފާއުކުރައްވަން ހުންނަވާ ފަރާތެއް ނޫން ކަމަށް މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން (ޖުމްހޫރީ ޕާޓީ) ވިދާޅުވެއްޖެ އެވެ. 

ފޯޅަވަހި މައްސަލައިގައި ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔައީ ބަންޑާރަނައިބު އިބްރާޙިމް ރިއްފަތުގެ އިހުމާލުންކަން ފާހަގަކޮށް އެ މައްސަލައިގައި ގުޅިފައިވާ ސިޔާސީ ޕާޓީތަކުން ވަނީ ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފަ އެވެ. 

އެކަން އިއުލާނުކުރުމަށް މިއަދު ގުޅިފައިވާ ސިޔާސީ ޕާޓީތަކުން ބޭއްވި ޕްރެސް ކޮންފަރެންސްގައި ވާހަކަދައްކަވަމުން އަލީ ހުސެއިން ވިދާޅުވީ ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅި މައިގަނޑު ސަބަބަކީ އެ މައްސަލައިގައި ދިވެހިންގެ މަސްލަހަތަށްވުރެ އެހެން ބައެއްގެ މަސްލަހަތު އިސްކޮށް ރިއްފަތު މަސައްކަތްޕުޅު ކުރައްވާފައިވާތީ ކަމަށެވެ. 

Advertisement

ދައުލަތުގެ ބަންޑާރަނައިބަކީ ރައްޔިތުންގެ އެންމެ މަތީ މަސްލަހަތު ހިމާޔަތްކުރަން ޖެހިވަޑައިގަންނަވާ ފަރާތް ކަމަށާއި، މި މައްސަލައިގައި ފެނިގެން ދިޔައީ ބަޔަކު ހެދި ޑީލެއް ދިފާއުކުރެއްވުމަށް ރައްޔިތުންގެ މަސްލަހަތު ދޫކޮށްލައްވައިގެން ރިއްފަތު ހުންނެވި މަންޒަރުކަމަށް އަލީ ހުސެއިން ވިދާޅުވި އެވެ. 

އަލީ ހުސެއިން ވިދާޅުވީ ޤާނޫނުގައި ބަޔާންކޮށްފައިވާ ދިވެހިރާއްޖޭގެ އިޤްތިޞާދީ ސަރަހައްދު ހިމާޔަތްކުރުމަށް ކުރެވެން އޮތް ހުރިހާކަމެއް ކުރައްވަން ބަންޑާރަނައިބަށް ޖެހިވަޑައި ގަންނަވާނެ ކަމަށެވެ. އެ މަސައްކަތް ކުރުމަކީ އިޚްތިޔާރީ ކަމެއްގެ ގޮތުގައި ދޫކޮށްލާފައިވާ ކަމެއް ނޫންކަން އޭނާ ފާހަގަކުރެއްވި އެވެ. 

އަލީ ހުސެއިން އިތުރަށް ވިދާޅުވީ ބަންޑާރަ ނައިބު ރިއްފަތު އެ މަސައްކަތްޕުޅު ކުރައްވާފައި ނުވުމުގެ ސަބަބުން ދިވެހިރާއްޖެއަށް ވަރަށް ބޮޑު ގެއްލުމެއް ލިބިގެން ގޮސްފައިވާ ކަމަށެވެ. ރާއްޖޭގެ ސަރަހައްދުން ބައެއް ގެއްލި ރާއްޖޭގެ މަސްވެރިކަމަށް ވެސް ދާދި އަވަހަށް ބޮޑެތި ގޮންޖެހުންތަކެއް ކުރިމަތިވެގެންދާނެ ކަން އޭނާ ފާހަގަކުރެއްވި އެވެ. 

އެއާއެކު އޭނާ ވިދާޅުވީ އެ މައްސަލައިގައި ޒިންމާ އުފުއްލަވަން ޖެހިވަޑައިގަންނަވާ ހުރިހާ ފަރާތްތައް ޖަވާބުދާރީ ކުރުމުގެ މަސައްކަތް ގުޅިގެން ކުރަން ނިންމާފައިވާ ކަަމަށެވެ. އަދި އެކަން ކުރުމުގައި ފަހަތަށް ޖެހިވަޑައި ނުގަންނަވާނެކަމަށް ވިދާޅުވި އެވެ.