ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ މި ސަރުކާރަށް ހެޔޮބަހެއް ބުނަނީ ސިޔާސީ މަޤާމުތަކުގައި ތިއްބެވި މަދުބައެއް ކަމަށް ސަރުކާރު ހިންގާ މައި ޕާޓީ އެމްޑީޕީގެ ޕީޖީ ގުރޫޕުގައި ހިމެނިވަޑައިގަންނަވާ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ. 

އެމްޑީޕީގެ ރައީސް މުޙައްމަދު ނަޝީދު އިސްކޮށް ހުންނަވާ ޕާޓީގެ ތެރެއިން އުފައްދަވާފައިވާ ފިކުރެއްގެ ދިރުން ގޮފީގައިވެސް އިސްކޮށް ހަރަކާތްތެރިވާ އާޒިމް މިފަދައިން ވިދާޅުވެފައިވަނީ ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިއުމުގައި ބަންޑާރަ ނައިބުގެ އިހުމާލު އޮތްކަމަށް ބުނެ އޭނާގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމާއި ގުޅިގެން އެކަމާއި ދެކޮޅަށް ބައެއް މެމްބަރުން ވާހަކަދައްކަވަމުން ދާތީ ކުރެއްވި ޓްވީޓެއްގަ އެވެ. 

އާޒިމް ވިދާޅުވީ މި ސަރުކާރާއި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ހެޔޮ ބަހެއް ބުނަނީވެސް ސަރުކާރުގެ ސިޔާސީ މަޤާމުތަކުގައި ތިއްބެވި ނިސްބަތުން މަދު ބައެއް ކަމަށެވެ. އެ ނޫން މީހަކު ސަރުކާރަށް ހެޔޮ ބަހެއް ބުނާތަން ފެނިވަޑައި ނުގަންނަވާކަމަށް އޭނާ ވިދާޅުވި އެވެ. 

އާޒިމް ވިދާޅުވީ ސިޔާސީ މަޤާމުތަކުގައި ތިބި މަދު ބަޔަކު ސަރުކާރަށް ސަނާކިޔަމުން ދިޔަ ނަމަވެސް، ރައްޔިތުން ތިބީ ރައީސް ޞާލިހަށް ވެރިކަމުގެ ދެވަނަ ދައުރެއް ދޭ ގޮތަކަށް ނޫން ކަމަށެވެ. އަދި ދެވަނަ ދައުރެއް ދޭން ޖެހޭ ސަބަބެއް ވެސް ނެތްކަމަށް އާޒިމް ވަނީ މީގެ ކުރިން ވެސް ވިދާޅުވެފަ އެވެ. 

ޗާގޯސް މައްސަލައާއި ގުޅިގެން ސަރުކާރުން އަމަލުކޮށްފައިވަނީ ރައްޔިތުންގެ މަސްލަހަތު އިސްކޮށްގެން ނޫންކަމަށް ޤަބޫލުކުރާ ގިނަ ބަޔަކު ވަނީ އެ މައްސަލައިގައި އެކުގައި މަސައްކަތް ކުރުމަށް އިއްތިހާދެއް އެކުލަވާލާފަ އެވެ. 

އެގޮތުން އެ އިއްތިހާދުގައި ޕީޕީއެމް ޕީއެންސީ ކޯލިޝަނާއި، އެމްޑީޕީގެ ފިކުރެއްގެ ދިރުން ގޮތްޕާއި، ޖުމްހޫރީ ޕާޓީ އަދި އެމްއެންޕީ ހިމެނެއެވެ. މަޖިލީހުގައި ގުޅިފައިވާ ޕާޓީތަކުގެ އިއްތިހާދުން ވަނީ އޭޖީ ރިއްފަތުގެ އިތުބާރު ނެތްކަމުގެ މައްސަލަ ވައްދާފަ އެވެ. 

ކުރިއަށް އޮތް ހަފާތާގައި ފޮރިން މިނިސްޓަރު އަބްދުالله ޝާހިދުގެ މައްސަލަވެސް ވައްދާނެ ކަމަށާއި، އެ މައްސަލަ ވެއްދުމަށް ބޭނުންވާ ވަރަށް ސޮއި ހަމަކުރެވިފައިވާކަމަށް އެ އިއްތިހާދުން ވަނީ ހާމަކޮށްފަ އެވެ. 

ސިޔާސީ ޕާޓީތަކުގެ އިތުރުން ކުރީގެ ބަންޑާރަ ނައިބުންނާއި ސިފައިންގޭގައި ގިނަ ދުވަސްތަކެއް ވަންދެން އުޅުއްވި ބޭފުޅުންގެ އިތުރުން މީހުންގެ މެދުގައި މަގުބޫލު ސިޔާސީ ބައެއް ބޭފުޅުންވެސް މި މަސައްކަތުގައި ހިމެނިވަޑައިގަންނަވަ އެވެ. 

ގުޅިފައިވާ އިއްތިހާދުން ބުނީ އެ މައްސަލައިގައި ދައުލަތުގެ ފަރާތުން ވަކާލާތުކުރި އޭޖީ ރިއްފަތުގެ ޓީމުން ރައްޔިތުންގެ ހައްގުގައި ދައްކަން ޖެހޭ މުހިންމު ވާހަކަތަކެއް ހުށައަޅާފައި ނުވާކަމަށެވެ. އަދި އެ މައްސަލައިގައި ދައުލަތުން ނެގި ޕޮސިޝަނަކީ ޤާނޫނާއި ޚިލާފު ޕޮސިޝަނެއް ކަމަށެވެ. 

އޭގެ އިތުރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅުގެ ސަބަބުން އެ މައްސަލައަށް ވަރަށް ބޮޑަށް އަސަރުކޮށްފައިވާކަން ވެސް އެ ފަރާތްތައް ފާހަގަކުރައްވަ އެވެ. އަދި ރައީސް ޞާލިހުގެ އިތުބާރު ނެތްކަމުގެ މައްސަލަ ވެސް މަޖިލީހަށް ވައްދާނެކަމަށް ފޯޅަވަހި އިއްތިހާދުން ވަނީ ބުނެފަ އެވެ.