ސަރުކާރުގެ ހިލޭ ޑިގްރީ ޕްރޮގްރާމްގެ ދަށުން ކިޔަވާ ދަރިވަރުން ސަރުކާރަށް ފައިސާ ދައްކަން ޖެހޭ ހާލަތްތަކާއި، ފައިސާ ނުދައްކައިފިނަމަ އެޅޭނެ ފިޔަވަޅުތަކުގެ އައު އުސޫލު މިނިސްޓްރީ އޮފް ހަޔަރ އެޑިއުކޭޝަންއިން އާންމުކޮށްފިއެވެ.

އެގޮތުން މި އުސޫލުގައިވާ ގޮތަށް ސަރުކާރުން ދަރިވަރަށް އެއްވެސް ފައިސާއެއް ދޫކުރުމަށްފަހު އަންނަނިވި ހާލަތްތަކުގެ ތެރެއިން ހާލަތެއް ދިމާވެއްޖެނަމަ، އެ ފައިސާ މިނިސްޓްރީއަށް އަނބުރާ ދައްކަންޖެހެއެވެ. އެގޮތުން:

-މަޤްބޫލު އުޒުރަކާ ނުލައި ޕްރޮގްރާމް ފުރިހަމަނުކޮށް ހުއްޓައިލުން.

-ދަރިވަރު ޕްރޮގްރާމުން ފެއިލްވެއްޖެކަމަށް މަރުކަޒުން ކަނޑައެޅުން.

-ފުރަތަމަ ޑިގްރީއަކަށްވުރެ ދަށް ސަނަދަކާއެކު ދަރިވަރު ޕްރޮގްރާމުން ވަކިވުން.

-މިނިސްޓްރީއަށް ހުށަހަޅަންޖެހޭ އެއްވެސް މަޢުލޫމާތެއް ސިއްރުކުރުން/ ހިފެހެއްޓުން ނުވަތަ ޞައްޙަ ނޫން މަޢުލޫމާތު ހިއްސާކޮށްފައިވާކަން ފާހަގަވުން.

-މި އުސޫލުގެ ދަށުން ޕްރޮގްރާމް ފުރިހަމަކުރުމަށް ސަރުކާރުން ދަރިވަރަށް ހޭދަކޮށްފައިވާ ފައިސާ، މިނިސްޓްރީއަށް ދައްކަން ޖެހުމާއި މަރުކަޒު ބަދަލުވާއިރު މި ސްކީމުގެ ދަށުން ދަރިވަރަށް ހޭދަކޮށްފައިވާ ފައިސާ ދައްކަން ޖެހުން.

މި ހާލަތްތަކުގެ ތެރެއިން ފައިސާ އަނބުރާ ދައްކަންޖެހޭ ހާލަތެއް މެދުވެރިވެއްޖެ ނަމަ، އެ ފައިސާ ދެއްކުމުގައި ދަރިވަރު ޢަމަލުކުރަން ޖެހޭ ގޮތް މިނިސްޓްރީއިން ވަނީ ބަޔާންކޮށްފައެވެ. ނަމަވެސް ކުރީގައި މި ފައިސާ އަނބުރާ ދައްކަންޖެހޭ މުއްދަތާއި މިހާރު ކަނޑައަޅާފައިވާ މުއްދަތާއި އަޅާ ބަލާއިރު މުއްދަތު ކުޑަކޮށްފައިވާ ކަން ފާހަގަކުރެވެއެވެ.

އެގޮތުން ދަރިވަރަށް ޚަރަދުކުރީ:

-25,000ރ. ރުފިޔާއަށްވުރެ މަދު މިންވަރެއްނަމަ، 2 އަހަރުދުވަހުގެ (24 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީ 30 މަސް ދުވަހުގެ ތެރޭގައި.

-25,000ރ. އާއި 50,000ރ. ދޭތެރޭގެ މިންވަރެއްނަމަ، 2 އަހަރާއި 6 މަސްދުވަހުގެ (30 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީ 38 މަސް ދުވަސް ތެރޭގައި.

-50,000ރ. އާއި 100,000ރ. ދޭތެރޭގެ މިންވަރެއްނަމަ، 3 އަހަރާއި 6 މަސްދުވަހުގެ (42 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީި 53 މަސް ދުވަސް ތެރޭގައި.

-100,000ރ. އާއި 200,000ރ. ދޭތެރޭގެ މިންވަރެއްނަމަ، 4 އަހަރުދުވަހުގެ (48 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީ 66 މަސް ދުވަސް ތެރޭގައި.

-200,000ރ. އާއި 300,000ރ. ދޭތެރޭގެ މިންވަރެއްނަމަ، 7 އަހަރުދުވަހުގެ (84 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީ 105 މަސް ދުވަހުގެ ތެރޭގައި.

-300,000ރ. އާއި 400,000ރ. ދޭތެރޭގެ މިންވަރެއްނަމަ، 10 އަހަރުދުވަހުގެ (120 މަސްދުވަސް) ތެރޭގައި އަނބުރާ ދައްކަންޖެހޭ. ކުރިން އޮންނަނީ 150 މަސް ދުުވަސް ތެރޭގައި.

-400,000ރ. އާއި 500,000ރ. ދޭތެރޭގެ މިންވަރެއްނަމަ، 12 އަހަރުދުވަހުގެ (144 މަސްދުވަސް) ތެރޭގައި އަނބުރާ ދައްކަންޖެހޭ.

-500,000ރ. (ފަސްލައްކަ) ރުފިޔާއަށްވުރެ ގިނަ މިންވަރެއްނަމަ، 15 އަހަރުދުވަހުގެ (180 މަސްދުވަސް) ތެރޭގައި އަނބުރާ ދައްކަން ޖެހޭ.

ސަރުކާރުން ދަރިވަރަށް ކުރި ޚަރަދު އަނބުރާ ދައްކަންޖެހޭ ހާލަތުގައި ނުދައްކާ ނަމަ އަޅާނެ ފިޔަވަޅުތައްވެސް މިނިސްޓްރީއިން ވަނީ ބަޔާންކޮށްފައެވެ.

އެގޮތުން ސަރުކާރުން ދަރިވަރަށް ކުރި ޚަރަދު އަނބުރާ ދައްކައި ނިމެންދެން، މިނިސްޓްރީން އިޢުލާނުކުރާ މަތީ ތަޢުލީމާއި ތަމްރީނުގެ އެއްވެސް ފުރުޞަތެއް ނުދޭނެ ކަމަށް މިނިސްޓްރީއިން ވަނީ ބުނެފައެވެ. އަދި ފައިސާ ހޯދުމަށް ޝަރުޢީ ގޮތުން އަޅަންޖެހޭ ފިޔަވަޅުތައް އަޅާނެ ކަމަށް ވެސް މިނިސްޓްރީއިން ވަނީ ބުނެފައެވެ.