ބައިނަލްއަގުވާމީ ޤާނޫނުތައް ދައުލަތް ތަމްސީލުކުރަން ހުންނެވި ބަންޑާރަ ނައިބަށް (އިބްރާހިމް ރިއްފަތަށް) އެނގިވަޑައި ނުގަންނަވާތީ ހިތާމަކުރައްވާ ކަމަށް ކުރީގެ ބަންޑާރަ ނައިބު އާޒިމާ ޝުކޫރު ވިދާޅުވެއްޖެ އެވެ. 

އާޒިމާ ޝުކޫރު މިފަދައިން ވިދާޅުވެފައިވަނީ ދިވެހިރާއްޖެއާއި ޗާގޯސް އާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިޓްލޮސްއަށް ހުށައެޅި މައްސަލައިގައި އެޓާނީ ޖެނެރަލް ރިއްފަތާއި އޭނާގެ ޤާނޫނީ ޓީމުން، ދިވެހިރާއްޖޭގެ ޤާނޫނު އަސާސީއާއި ޚިލާފު ޕޮސިޝަނެއް ނަންގަވައި ކޯޓުގައި ވަކާލާތު ކުރައްވާފައިވާއިރު، އެ މައްސަލަ ނިމިގެން ދިޔަ ގޮތުގެ ސަބަބުން ރާއްޖޭގެ ކަނޑުގެ ސަރަހައްދުން ބޮޑު ބައެއް ގެއްލިގެން ދިޔަ ނަމަވެސް އެ މައްސަލަ އިސްތިއުނާފު ކުރެވޭނެ އެއްވެސް އުސޫލެއް ނެތްކަމަށް ވިދާޅުވެ އޭޖީ ރިއްފަތު ދައްކަވަމުން ގެންދަވާ ވާހަކަތަކަށް ފޯޅަވަހި މައްސަލައިގައި ގުޅިގެން މަސައްކަތް ކުރުމަށް އިއްތިހާދުވެފައިވާ ފަރާތްތަކުން ބޭއްވި ޕްރެސް ކޮންފަރެންސްގައި ރައްދުދެއްވާ ވާހަކަ ދައްކަވަމުން ނެވެ. 

އާޒިމާ ވިދާޅުވީ ޔުނައިޓެޑް ނޭޝަންސް ލޯ އޮފް ދަ ސީ (އަންކްލޮސް) އަށް ހަވާލާދެއްވާ ޗާގޯސް މައްސަލަ އިޓްލޮސްއިން ނިންމި ނިންމުން އިސްތިއުނާފު ކުރެވޭނެ ހާލަތެއް ނެތްކަމަށް ބަންޑާރަ ނައިބު ވިދާޅުވެފައިވާކަމަށް ބައެއް ނޫސްތަކުން ރިޕޯޓުކޮށްފައިވާ ކަމަށެވެ. 

އެހެން ނަމަވެސް އެއީ ރަނގަޅު މައުލޫމާތެއް ނޫން ކަމަށާއި، އިޓްލޮސްގެ ހިންގާ ގަވައިދުގައި ވަރަށް ސާފުކޮށް، އެ ކޯޓުން ނިންމާ މައްސަލަތައް އިސްތިއުނާފު ކުރެވޭނެ ހާލަތްތައް ބަޔާންކޮށްދެއްވާފައިވާ ކަމަށް އާޒިމާ ޝުކޫރު ވިދާޅުވި އެވެ. އަދި ޤާނޫނުތައް މިހާރުގެ ބަންޑާރަނައިބަށް އެނގިވަޑައިނުގަންނަވާތީ ހިތާމަ ކުރައްވާކަމަށް އާޒިމާ ޝުކޫރު ވިދާޅުވި އެވެ. 

އާޒިމާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދާއި ގުޅުން އޮތް މި މައްސަލައިގައި ދިވެހި ދައުލަތް ތަމްސީލުކުރެއްވުމަށް ޤާނޫނީ ޓީމެއް ގޮވައިގެން ވަޑައިގެންނެވިއިރު ދައުލަތުގެ ބަންޑާރަނައިބަށް އިޓްލޮސްގެ ހިންގާ ގަވައިދުގައި އޮތް އެއްޗެއް ނޭގުމަކީ ހަގީގަތުގައި ވެސް އިންތިހާއަށް ހިތާމަކުރާ ކަމެއް ކަމަށެވެ. 

ކޯޓުގައި ވަކާލާތުކުރައްވަމުން ގެންދެވިއިރު، ދިފާއު ބިނާކުރެއްވިއިރު، އެ ގާނޫނުތައް ރަނގަޅަށް އެނގިވަޑައިނުގެން ވަކާލާތު ކުރެއްވުމަކީ ރާއްޖެއަށް ގެއްލުންތައް ލިބިގެން ދިޔަ ސަބަބެއްގެ ގޮތުގައި އާޒިމާ ފާހަގަކުރެއްވި އެވެ. އަދި އެ ގަވައިދުތައް އެނގިވަޑައިނުގެން ހުންނަވާ ދެން އިތުރަށް އެ މައްސަލައިގައި ކުރެވޭނެ ކަމެއް ނެތްކަމަށް ވިދާޅުވެ ވާހަކަދައްކަވަމުން ދިއުމުން މިއަދު މި އޮތީ ދައުލެއްކަމާމެދު ވެސް ސުވާލު އުފެދޭކަމަށް އާޒިމާ ވިދާޅުވި އެވެ. 

އެކަން ފާހަގަކުރައްވާ އާޒިމާ ވިދާޅުވީ އެ މައްސަލަ އިސްތިއުނާފު ކުރެވޭނެ ކަމަށެވެ. އަދި އެކަން ކުރުމަށް ފުރުސަތުތައް ފަހިވެފައިވާ ކަމަށެވެ. އެ މަސައްކަތް ކަނޑު ވިއްކާލުމާއި ދެކޮޅަށް އުފައްދާފައިވާ އިއްތިހާދުން ކުރައްވާނެކަމުގެ ޔަގީންކަންވެސް އާޒިމާ ދެއްވި އެވެ.