ޗާގޯސްގެ ކަނޑުގެ ސަރަހައްދާއި މެދު ގޮތެއް ނިންމުމަށް ވަކާލާތު ކުރިއިރު، ގާނޫނުއަސާސީއާއި ޤާނޫނުގައި ދިވެހިރާއްޖެ އިމުގެ ގޮތުގައި ކަނޑައަޅާފައި އޮތް ސަރަހައްދު އެންމެ ފަހަރަކުވެސް ދިފާއުނުކުރީ ކީއްވެތޯ ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ސުވާލުކުރައްވައިފިއެވެ.

ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލަ ދިވެހިރާއްޖެއިން ވަކާލާތު ކުރިގޮތަށް ނިމިގެން ދިޔުމުން ސަރުކާރުން އެކަމާއި މެދު އުފާކޮށް، އެއީ ކާމިޔާބީއެއް ކަމަށް ސިފަ ކުރާއިރު، ދިވެހިރާއްޖޭގެ ގާނޫނު އަސާސީން ދިވެހިންގެ ސަރަހައްދު ކަމުގައި ކަނޑައަޅާފައިވާ 200 ނޯޓިކަލް މޭލުގެ ހާއްސަ އިގްތިސާދީ ސަރަހައްދުން 45،331 އަކަ މީޓަރު ވަނީ އެ ނިންމުމުގެ ސަބަބުން ގެއްލިފައެވެ.

އެކަމާއި ގުޅިގެން ވައްޑެ ކުރެއްވި ޓުވީޓެއްގައި ވަނީ ދިވެހިސަރުކާރުން އެކަމުގައި ވަކާލާތު ކުރި ފަރާތްތަކާއި މުހިންމު ސުވާލުތަކެއް ކުރައްވާފައެވެ. 

އެގޮތުން، އެ މައްސަލާގައި ސަރުކާރުން ވަކާލާތު ކުރިއިރު، ގާނޫނުއަސާސީއާއި ޤާނޫނުގައި ދިވެހިރާއްޖެ އިމުގެ ގޮތުގައި ކަނޑައަޅާފައި އޮތް ސަރަހައްދު އެންމެ ފަހަރަކުވެސް ދިފާއުނުކުރީ ކީއްވެތޯ ވައްޑެ ވަނީ ސުވާލު ކުރައްވާފައެވެ. 

އަދި ދިވެހިރާއްޖޭގެ އިގްތިސާދީ ސަރަހައްދާ ގުޅޭ އެފަދަ ބޮޑު ނިންމުމެއް ނިންމާލިއިރު ރައްޔިތުންގެ މަޖިލީހާ ހިއްސާނުކުރީ ކީއްވެތޯވެސް ވައްޑެ ވަނީ ސުވާލު ކުރައްވާފައެވެ. 

އެއާއެކު ވައްޑެ ވަނީ، ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިޓްލޮސްއިލަށް މައްސަލަ ހުށަހަޅާފައިވަނިކޮށް، ދިވެހިންނާއި ދެކޮޅަށް ދަޢުވާ އުފުލައިގެން އުޅޭ ބަޔަކަށް "މަތިން ބައިން"  ފޮނުވީ ކޮން ސިޓީއެއްތޯ އާއި އެ ސިޓީ ފޮނުއްވީ ކީއްވެތޯ ސުވާލު ކުރައްވާފައެވެ.