ފޯޅަވަހީގެ މައްސަލާގައި ބާ ކައުންސިލުން އިންސާފުވެރި ދިރާސާއެއް ހަދާނެކަމާމެދު ޝައްކު އުފެދޭ ކަމަށް ވިލިމާލެ ދާއިރާގެ މަޖިލިސް މެމްބަރު އަހްމަދު އުޝާމް ވިދާޅުވެއްޖެއެވެ.

އުޝާމް މިހެން ވިދާޅުވެފައިވަނީ ބާ ކައުންސިލުން އިޓްލޮސްގެ ނިންމުމާއި ގުޅޭ ދިރާސާއެއް ކުރުމަށް އިއްޔެ ނިންމާ ނެރެފައިވާ ބަޔާނަށް ފާޑު ވިދާޅުވަމުން މިއަދު ކުރެއްވި ޓްވީޓެއްގައެވެ.

އެގޮތުން ބާ ކައުންސިލުން ނެރުން ބަޔާނުގައި ބުނެފައިވަނީ އިޓްލޮސް އިން ދިވެހިރާއްޖެއާއި ޗާގޯސް އާ ދެމެދު އޮތް ކަނޑުގެ ސަރަހއްދު ބެހުމާއިމެދު ނިންމާފައިވާ ނިންމުމަކީ ގައުމީ މުހިންމު މައްސަލައެއް ކަމަށާއި، އާންމު މަސްލަހަތާ ގުޅުންހުރި ގާނޫނީ ނުވަތަ ދުސްތޫރީ މައްސަލަތަކާއި ކަންތައްތަކާއި ގުޅިގެން، ބާ ކައުންސިލްގެ ރައުޔާއި މައުލޫމާތު ހާމަކުރުމަކީ އެ ކައުންސިލާއި ހަވާލު ކުރެވިފައިވާ މަސްއޫލިއްޔަތެއް ކަމަށެވެ.

Advertisement

އެހެންކަމުން މި މައްސަލާގައި ބާ ކައުންސިލުގެ ރައުޔު ހާމަކޮށްދިނުމަށް އެދި އެ ކައުންސިލުގެ މެމްބަރަކު ހުށަހަޅުއްވާފައިވާ މައްސަލަ ބާ ކައުންސިލްގެ އެގްޒެކެޓިވް ކޮމިޔުނިޓީ އިން ބަލައިގަތުމަށް ނިންމާ، މި މައްސަލަ ދިރާސާ ކުރުމަށް ބާ ކައުންސިލްގެ ލޯ ރިފޯމް އެންޑް ރިސަރޗް ކޮމިޓީއަށް ފޮނުވުމަށް އެ ކައުންސިލުގެ އެކްޒެކެޓިވް ކޮމިޓީއިން ނިންމާފައިވާ ކަމަށް ބަޔާނުގައި ވެއެވެ.

މިކަމާއި ގުޅިގެން އުޝާމް ވިދާޅުވެފައިވަނީ ފޯޅަވަހި މައްސަލާގައި ސަރުކާރުން ކަންކޮށްފައިވާ ގޮތަށް ތާއީދުކޮށް މަރުހަބާ ކިޔައި ބާކައުންސިލްގެ ރައީސް އަދި އެކްސްކޯގެ ބައެއް މެންބަރުން ވާހަކަ ދައްކާފައިވާ ކަމަށެވެ.

އަދި މިމައްސަލާގެ އެންމެ ބޮޑެތި ގޯސްތައް ހަދާފައިވާ ބަންޑާރަނައިބު އިބްރާހީމް ރިފްޢަތަކީ ބާކައުންސިލްގެ އެކްސްކޯ މެންބަރެއް ކަމަށެވެ.

އެހެންކަމުން މިފަދަ ހާލަތެއްގައި އޮތް ކައުންސިލަކުން އިންސާފުވެރި ހަމަހަމަ ދިރާސާއެއް ހަދާނެކަމާ ދޭތެރޭ ޝައްކު އުފެދޭ ކަމަށް އުޝާމް ވިދާޅުވިއެވެ.

ފޯޅަވަހީގެ ނިންމުމުގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް ބުނެ ރިފްޢަތުގެ އިތުބާރު ނެތް ކަމުގެ ވޯޓު ނަގަން ފޯޅަވަހީގެ މައްސަލާގައި އިދިކޮޅު ޕާޓީތަކުން އުފައްދާފައިވާ އިއްތިހާދުން ވަނީ ހުށަހަޅާފައެވެ.

މި އިއްތިހާދިގައި ޕާޓީ ތަކުގެ ތެރޭގައި ޕީޕީއެމް-ޕީއެންސީ ކޯލިޝަނާއި، އެމްޑީޕީގެ ރައީސް މުޙައްމަދު ނަޝީދު ފިކުރެއްގެ ދިރުމާއި، ޖުމްހޫރީ ޕާޓީ އާއި އަދި އެމްއެންޕީ ހިމެނެއެވެ.