ފޯޅަވަހި މައްސަލައާއި ގުޅޭގޮތުން 1982 ވަނަ އަހަރުން ފެށިގެން ދިވެހިރާއްޖޭގެ ސަރުކާރުތަކުން ނިންމާފައިވާ ނިންމުންތައް އާންމުކުރުމަށް ކުރީގެ ފޮރިން މިނިސްޓަރު ޑރ އަހުމަދު ޝަހީދު އެދިވަޑައިގަންނަވައިފި އެވެ. 

ފޯޅަވަހި މައްސަލައާއި ގުޅިގެން ރައްޔިތުންގެ މެދުގައި ތަފާތު ގޮތްތަކަށް ވާހަކަތައް ދެކެވެމުންދާ މި ދަނޑިވަޅުގައި ޑރ ޝަހީދު ކުރެއްވި ޓްވީޓެއްގައި ވަނީ އެ މައްސަލައާއި ގުޅޭގޮތުން 1980 ވަނަ އަހަރުން ފެށިގެން ރައީސް އޮފީހާއި ފޮރިން މިނިސްޓްރީ އާއި އެޓާނީ ޖެނެރަލްގެ އޮފީސް އަދި ނިއުޔޯކާއި ލަންޑަނުގައި ހުރި ރާއްޖޭގެ މިޝަންތަކުގައި ރައްކާ ކޮށްފައިވާ ފައިލްތައް އާންމުކުރުމަށް އެދިވަޑައިގަންނަވާކަމަށް ވިދާޅުވެފަ އެވެ. 

ޑރ ޝަހީދު ވިދާޅުވީ އެ މައުލޫމާތުތައް ހާމަކުރުމަކީ އިތުބާރު ހިފޭ ކަމެއްކަމަށް ދެކިވަޑައިގަންނަވާ ކަމަށެވެ. އެގޮތުން އެ މައުލޫމާތުތައް ހާމަކުރުމަކީ މައުލޫމާތުގެ އިތުބާރު ނަގަހައްޓާ، ނޫސްވެރިން ބާރުވެރިކުރުމުގެ އިތުރުން ފުރިހަމަ މައުލޫމާތާއެކު ރައްޔިތުންނަށް މި މައުލޫގައި ބަހުސްކުރެވޭނެ މަގެއްކަމަށް ޑރ ޝަހީދު ވިދާޅުވި އެވެ. 

ފޯޅަވަހި މައްސަލައިގައި ރާއްޖޭގެ ދެކުނުގެ ސަރަހައްދާއި ގުޅޭގޮތުން ކުރެވޭ ބަހުސް ދެކަފިވެފައިވާއިރު، އެ ކަމާއި ގުޅޭގޮތުން ސަރުކާރުން ބުނަމުން ދަނީ އިޓްލޮސްގައި ކުރިއަށް ދިޔަ މައްސަލަ ނިމުނުގޮތުގެ ސަބަބުން ރާއްޖެއަށް ބޮޑު ކާމިޔާބީއެއް ލިބިގެން ގޮސްފައިވާ ކަމަށެވެ. 

އެއީ އިޓްލޮސްއިން އެ މައްސަލަ ނިންމުމާއި ހަމަޔަށް ދެކުނުގެ ސަރަހައްދު އޮތީ ކަނޑަނޭޅި ކަމަށާއި، އިޓްލޮސްއިން އެ މައްސަލަ ނިންމު ގޮތުގެ ސަބަބުން ދިވެހިރާއްޖެއަށް ބޮޑުބައި ލިބިގެން ގޮސްފައިވާކަމަށް ސަރުކާރުން ދަނީ ބުނަމުންނެވެ. 

އެހެން ނަމަވެސް ޗާގޯސްގެ ސިޔާދަތު މޮރިޝަސްއަށް ލިބިގެންދާކަމަށް ޤަބޫލުކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިޓީފުޅުގެ ސަބަބުން ޗާގޯސް އަކީ މޮރިޝަސްގެ ބައެއްގެ ގޮތުގައި ބަލައިގެން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އިން ސަރަހައްދީ އިން ކަނޑައެޅުމާއި ގުޅިގެން ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ގޮސްފައިވާކަމަށް އިދިކޮޅު ފަރާތްތަކުން ދަނީ ބުނަމުންނެވެ. 

އެކަންކަމަށް އަލިއަޅުވާލައްވާ ޑރ ޝަހީދު ވިދާޅުވީ ޗާގޯސް އާއި ގުޅޭ ނިންމުންތައް ހާމަކުރުމަކީ މި ބަހުސް ކުރިއަށް ގެންދިއުމުގައި ރައްޔިތުންނަށް އެތައް މައުލޫމާތެއް ލިބިގެންދާނެ ކަމެއް ކަމަށެވެ.

އެހެންކަމުން އެ މައުލޫމާތުތައް ހާމަކޮށްދެއްވުމަށް ރައީސް ޞާލިހާއި މަޖިލީހުގެ ރައީސް މުޙައްމަދު ނަޝީދުގެ އަރިހުން ވަރަށް އަދަބުވެރިކަމާއެކު އެދިވަޑައިގަންނަވާކަމަށް ޑރ ޝަހީދު ވިދާޅުވި އެވެ.