ދިވެހިރާއްޖެއާއި ޗާގޯސް އާރކިޕެލާގޯގެ މައްސަލައިގެ ނިންމުމަކީ ދިވެހި މަސްވެރިންނަށް ލިބުނު ދެރައެއް ކަމަށް އެމް.އާރް.އެމްއިން ބުނެފިއެވެ.
މިކަމާއި ގުޅިގެން އެ ޕާޓީއިން ނެރުން ބަޔާނެއްގައި ބުނެފައިވަނީ ދިވެހިރާއްޖެއާއި ޗާގޯސް އާރކިޕެލާގޯގެ އިޤްތިޞާދީ ސަރަޙައްދުން ފުށުއަރާކަމަށް ބުނާބައި ޑީލިމިޓް ކުރުމަށް އެދި މޮރިޝަސް އިން ހުށަހެޅި މައްސަލަ ނިމުނު ގޮތަކީ، ދިވެހިރާއްޖެއަށް ލިބުނު ކާމިޔާބީއެއް ކަމުގައި އެމް.އާރް.އެމްއިން ނުދެކޭ ކަމަށެވެ.
އެގޮތުން މި ނިންމުމަކީ ޒަމާނުއްސުރެ ދިވެހިންނަށް ލިބެމުންދިޔަ އިޤްތިޞާދީ އެތައް ފައިދާ ތަކަކަށް އުނިކަން ލިބިގެން ދާނެ ނިންމުމަކަށް ވުމުން މިއީ ދިވެހި ދައުލަތަށާއި ދިވެހި ރައްޔިތުންނަށް ލިބުނު ބޮޑު ގެއްލުމެއް ކަމުގައި އެމް.އާރް.އެމްއިން ދެކޭ ކަމަށް އެ ޕާޓީއިން ބުނެފައިވެއެެވެ.
މިއާއިއެކު ރާއްޖެ އަކީ ޤައުމުތައް އަޅުވެތި ކުރުމާ (ކޮލޮނައިޒޭޝަނާ) ދެކޮޅަށް އަބަދުވެސް ވޯޓު ދެމުން އައި ޤައުމެއް ކަމަށާއި ކުރީގެ ސަރުކާރުތަކުންވެސް އަމަލުކޮށްފައިވަނީ އެގޮތަށް ކަމަށް އެ ޕާޓީއިން ވަނީ ފާހަގަކޮށްފައެވެ.
އެހެންނަމަވެސް މޮރިޝަސްއިން ބޭނުންވާ ގޮތަށް ފޯޅަވައްސަކީ މޮރިޝަސްގެ ބައެއްގެ ގޮތުގައި ހެދުމަށް ރާއްޖެއިން ދެކޮޅު ހަދަމުން ގެންދިޔަ ސަބަބަކީ، އިނގިރޭސީންގެ އަތްދަށުން މޮރިޝަސް މިނިވަންވިއިރު، ފޯޅަވައްސަކީ މޮރިޝަސްގެ ބައެއްކަމަށް ނުވާތީ އާއި، ފޯޅަވަހި މޮރިޝަސްގެ ބައެއްގެ ގޮތުގައި ހަމަޖެހިއްޖެނަމަ ރާއްޖޭގެ އިޤްތިޞާދީ ސަރަޙައްދު ކުޑަވެ، އިޤްތިޞާދީ ސަރަޙައްދުން ރާއްޖެއަށް ލިބެންވާ ޤުދްރަތީ ވަސީލަތްތަކަށް އުނިކަން ލިބޭނެތީ ކަމަށް އެމް.އާރް.އެމްއިން ބުނެފައިވެއެވެ.
އަދި މިމައްސަލަ ނިމިގެން ދިޔަގޮތުން މިހާރު މިވަނީ ރާއްޖޭގެ އިޤްތިޞާދީ ސަރަޙައްދު ކުޑަވެ، ޒަމާނުއްސުރެ ދިވެހިންގެ ދިރިއުޅުން އެކަމެއްގެ މައްޗަށް ބަރޯސާވެފައިއޮތް މަސްވެރިކަމުގެ ސިނާއަތަށްވެސް ވަރަށް ބޮޑު ގެއްލުންތަކެއް ލިބޭގޮތަށް ކަމަށް ވެސް އެޕާޓީއިން ބަޔާނުގައި ބުނެފައިވެއެވެ.
މީގެ އިތުރުން އެމް.އާރް.އެމްއިން ބުނެފައިވަނީ މިނިންމުމުގެ ސަބަބުން އުނިވެގެން ދިޔައީ ދިވެހި މަސްވެރިން މަހަށް ނިކުމެ އުޅޭ ކަނޑުގެ ބައެއް ކަމަށް ވުމުން، މިއީ އިއާދަ ނުކުރެވޭވަރުގެ ދެރައެއްކަމުގައި އެ ޕާޓީއިން ދެކޭ ކަމަށެވެ.
އެގޮތުން ރާއްޖޭގެ ދެކުނު ސަރަޙައްދުން ވަގަށް މަސްވެރިކަން ކުރުން އިތުރުވެގެން ދިއުމާއެކު، މުޅި ރާއްޖޭގެ މަސްވެރިކަމުގެ ސްޓޮކް ހީނަރުވެގެން ދިއުމުގެ ފުރުސަތު ބޮޑުވާނެ ކަމަށާއި، މި މައްސަލަ ނިމިގެން ދިޔަ ގޮތުން ވާދަވެރި ހަރަކާތްތައް އިތުރުވެ ސަރަޙައްދު ބެލެހެއްޓުމުގެ އަގު ބޮޑުވެ، އެ ސަރަޙައްދުގެ ކަނޑާއި ބިމުއަޑީ ތަހުލީލުތައް ކުރުމާއި ކަނޑުވެށި މޮނިޓަރުކުރުމުގެ ފުރުސަތު ގެއްލޭނެ ކަމަށް އެ ޕާޓީއިން ބުނެފައިވެއެވެ.
އަދި އުނިވެގެން ދިޔަ ސަރަޙައްދުން މުސްތަޤްބަލުގައި ރާއްޖެއަށް ލިބޭނެ މަންފާތައް ގެއްލިގެން ދިޔަކަން ފާހަގަކޮށް، މި ސަރަޙައްދުގެ ކަނޑުންނާއި ބިމުއަޑީން ލިބެން ހުރި ސީފުޑާއި ނާދިރު މަޢުދަނާއި، ބޭސްފަރުވާގެ އުންސުރުތައް ފަދަ މަޢުދަނީ މަންފާގެ ފުރުސަތު ގެއްލޭ ކަމަށްވެސް އެ ޕާޓީއިން ވަނީ ބުނެފައެވެ.
ހަމަ އެއާއެކު، މި ސަރަޙައްދުގައި މޫސުމީ އަދި ކާރިސީ ތަހުލީލުތައް ކުރުމުގެ ފުރުސަތު ގެއްލުމުގެ އިތުރުން ދެޤައުމުގެ މަސްލަޙަތު ބެލެހެއްޓުމުގެ ޚާރިޖީ އަގު (މާއްދީ އަދި ސިޔާދަތީ އަގު) ވަޒަންނުކުރެވޭ މިންވަރަށް ބޮޑުވުމާއި، މައްސަލައިގެ ބާވަތުން ދާޚިލީ ހަމަނުޖެހުން އިތުރުވެ، އޭގެ ދިފާޢީ އަގު ބޮޑުވެގެން ދާނެ ކަމަށް އެމް.އާރް.އެމްއިން ފާހަގަކޮށްފައިވެއެވެ.
މީގެ އިތުރުން އިންޑިއާ ކަނޑުގެ ސްޓްރެޖިކް ބެލެންސް ގެއްލި، ސަރަޙައްދުގައި ދެމެހެއްޓިފައިވާ އަމާންކަން ގެއްލުމުގެ ބިރުވެރިކަން އުފެދުމާއި، ޤައުމީ އެއްބައިވަންތަކަން ރޫޅި، ބޭރުގެ އިސްތިޢުމާރީ ފިކުރަށް ޖާގަ ހުޅުވުމުގެ ފުރުސަތު އޮތުމާއި އެސަރަޙައްދުގައި މިނިވަންކޮން ހިނގަމުންދާ ޝިޕިންރޫޓް ތަކަށް ނޭދެވޭ އަސަރުތަކެއްކުރާނެ ކަމަށްވެސް އެ ޕާޓީއިން ވަނީ ބުނެފައެވެ.
އެމް.އާރް.އެމް އިން ވަނީ އެ ޕާޓީއިން ދެކޭގޮތުގައި މިއީ ރާއްޖޭގެ މަސްވެރިކަމުގެ ޞިނާޢަތުގައި އުޅޭ އެންމެހާއި ފަރާތްތަކާއި އަދި ޖުމްލަކޮށް ދިވެހިންގެ މަސްލަޙަތު އޮތްކަމަށްވާއިރު، މިދެންނެވި ފަރާތްތަކައި މަޝްވަރާކުރެވިގެން ނޫނީ މިހާހިސާބަށް ގޮސްގެންވާނެ ކަމެއް ނޫން ކަމަށާއި، މި މައްސަލަ ނިމިގެންދިޔައިރު މިކަމުގައި ދިވެހި ރައްޔިތުންގެ ބަހެއް ހިމެނިފައި ނެތުމަކީ ނުހަނު ކަންބޮޑުވާ ކަމެއް ކަމަށް އެ ޕާޓީއިން ވަނީ ފާހަގަކޮށްފައެވެ.
މިއާއިއެކު ދިވެހިރާއްޖޭގެ ކަނޑުގެ ސަރަޙައްދުތަކާ ބެހޭ ޤާނޫނުން، ރާއްޖޭގެ އާކިޕެލެޖިކް ބޭސްލައިނުން ފެށިގެން 200 މޭލުގެ ސަރަޙައްދެއް ޚާއްޞަ އިޤްތިޞާދީ ސަރަޙައްދުގެ ގޮތުގައި ލިބިދީފައިވާއިރު މީގެކުރިން ދިވެހި ދައުލަތުން މިދެންނެވުނު ސަރަޙައްދަށް އުނިކަމެއް އަންނަ ގޮތަކަށް އެއްވެސް ފަރާތަކާ އެއްބަސްވެ ސޮއިކޮށްފައި ނެތް ކަމަށް އެމް.އާރް.އެމްއިން ވަނީ ފާހަގަކޮށްފައެވެ.
ކަން މިހެން އޮތްއިރު، 2019 ގައި މޮރިޝަސްގެ ސިޔާދަތު ފޯޅަވަހީގެ މައްޗަށް އޮތުމާ ދެކޮޅަށް ވޯޓު ދިނުމަށްފަހު، އެސިޔާސަތު ބަދަލުކޮށް ދިވެހި ސަރުކާރުން މޮރިޝަސްގެ ބޮޑުވަޒީރަށް ފޮނުވިކަމަށް ބުނާ ސިޓީގެ ހަޤީޤަތް ރައްޔިތުންނަށް އެނގިފައިނުވުމަކީ، އަދި އެސިޓީގައިވާ އެއްޗެއް ހާމަކުރުމަށް އިޢުތިރާޒު ކުރަމުން ގެންދިއުމަކީ އޭގެ އަޑީގައި ފޮރުވިފައިވާ ކަންތައްތަކެއް ވާނެކަމަށް ރައްޔިތުން ދެކޭކަމެއް ކަމަށް އެ ޕާޓީއިން ވަނީ ބުނެފައެވެ.
އެހެންކަމުން މިކަމާ ގުޅޭ ސައްޚަ މަޢުލޫމާތު ފޯރުކޮށްދީފައި ނުވުމާއި، މި މައްސަލައިގައި ސަރުކާރުގެ ނިންމެވުން ރައްޔިތުންގެ މަޖިލީހަށް ހުށަހަޅުއްވައި މިކަމުގައި މަޖިލީހުގެ ބަހެއް ސަރުކާރުން ހޯއްދަވާފައި ނުވާތީ އެމް.އާރް.އެމް އިން ވަނީ ކަންބޮޑުވުން ފާޅުކޮށްފައެވެ.
އެ ޕާޓީއިން ވަނީ ރާއްޖޭގެ ސިޔާދަތީ ޙައްޤަކަށް ކުޑަވެސް އުނިކަމެއް ލިބިދާނެ އެއްވެސް ނިންމުމަކަށް އެމް.އާރް.އެމް އިން ތާއީދެއް ނުކުރާނެ ކަމަށް ފާހަގަކޮށް، އެފަދަ އެއްވެސް ނިންމުމެއް ސަރުކާރުން ނިންމަވާފައިވާނަމަ އެ ނިންމުމެއް ބަދަލުކުރެއްވުމަށާއި ރައްޔިތުންގެ ހައްޤުގައި މިމައްސަލަ އިސްތިޢުނާފުކޮށް، ދިވެހިންގެ މަސްލަޙަތަށް އިންސާފުވެރި އުސޫލަކުން ސަރަޙައްދު ބެހުމަށް ގޮވާލައިފައެވެ.
މިއާއިއެކު ވަކިބަޔަކު ސިޔާސީ މަޤްޞަދު ޙާސިލުކުރުމަށް ރައްޔިތުންގެ ތެރޭގައި މަސްލަޙަތު ގެއްލޭގޮތަށް "ކަނޑު ވިއްކާލުން" ފަދަ ސާބިތު ނުހިފޭވާހަކަ ދެއްކުމުން މިކަމަށް ރައްޔިތުންދޭ އަހައްމިޔަތު ކުޑަވާ ކަމަށާއި މިފަދަ ޢަމަލުތަކުގެ ސަބަބުން މައްސަލަ ކާމިޔާބުކުރުމަށް އުނދަގޫ ވާނެކަމަށް އެ ޕާޓީއިން ގަބޫލުކުރާކަމަށް ވަނީ ބުނެފައެވެ.
މީގެ އިތުރުން މިމައްސަލައަކީ ސިޔާސީ މައްސަލައަކަށް ނުވާއިރު، ބައެއް ފަރާތްތަކުން މިމައްސަލަ ސިޔާސީ މައްސަލައެއްގެ ގޮތުގައި ނަގަމުންދާކަން ހިތާމައާއެކު ފާހަގަކޮށް، ޤައުމީ މަސްލަޙަތު ހިމެނޭ މިފަދަ ކަންކަން ސިޔާސީކުރުން ހުއްޓާލުމަށް އެމް.އާރް.އެމް އިން ވަނީ ގޮވާލާފައެވެ.
Advertisement
This content is created and paid for by advertisers and does not involve Voice Journalists
