ރައްޔިތުންގެ މަޖިލީހުގެ އައްޑޫ މީދޫ ދާއިރާ ރޮޒައިނާ އާދަމްގެ ނަން އިއްވާ މަޖިލީސް ތަޅުމުން ނިކުތުމަށް މަޖިލީހުގެ ރިޔާސަތުން އެންގެވުމުން މަޖިލީސް ހޫނުވެ މިއަދު ކުރިއައްދާ ޖަލްސާ މެދުކަނޑާލައިފި އެވެ.
ޗުއްޓީއިން އެނބުރިއައިސް ރައްޔިތުންގެ މަޖިލީހުގެ ދެ ވަނަ ދައުރުގެ ފުރަތަމަ ޖަލްސާ މިއަދު ފަށާފައިވާއިރު، އެމްޑީޕީގެ ތެރޭގައި އުފެދިގައިވާ ބައިބައިވުންތަކާއި މެމްބަރުންގެ މެދުގައި އޮތް ރުޅިވެރިކަން މިއަދުގެ ޖަލްސާގައި ވަނީ ފަޅައިގެންގޮސްފަ އެވެ.
މަޝްރަހު އެންމެ ބޮޑަށް ހޫނުވެގެން ދިޔައީ ފެނަކަ ކޯޕަރޭޝަނުން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސް ކުރުމަށާއި، ފެނަކައިގެ ފައިނޭންސް އަދި މެނޭޖުމަންޓު އޮޑިޓެއް ހެދުމަށާއި ދަރަނި އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލާ ހުށައެޅި ޤަރާރަށް ބަހުސްކުރަމުން ދިޔަ ވަގުތުތައެވެ.
އެ ޤަރާރަށް އެމްޑީޕީން ވަކިވެވަޑައިގެން މެމްޑިޕީގެ މެމްބަރުން ވާހަކަދައްކަވަން ފެއްޓެވުމާއެކު ސަރުކާރު ފަޅީގެ މެމްބަރުން ނިޒާމީ ނުގުތާތައް ފުލުފުލުގައި ނަގާ އެ މޭރުމުން ވާހަކަ ނުދެއްކޭނެކަމަށް ދިޔައީ ބުނަމުންނެވެ. އަދި އެ މެމްބަރުންނަށް ވަގުތު ދެނީ ކޮން އުސޫލަކުންތޯ ތަކުރާރުކޮށް ރިޔާސަތަށް ދިޔައީ ސުވާލުކުރަމުންނެވެ.
ރައްޔިތުންގެ މަޖިލީހުގެ ކުޅުދުއްފުށީ އުތުރުދާއިރާގެ މެމްބަރު ޔާސިރު އަބްދުއްލަތީފު ވާހަކަ ދައްކަވަމުން ދިޔައިރު މެމްބަރު ރޮޒައިނާ ގެންދެވީ ހަޅޭއްލަވާ އަޑިގަދަ ކުރަމުންނެވެ.
އެކަމާއި ގުޅިގެން ރިޔާސަތުން ވަނީ 3 ފަހަރު ރޮޒައިނާގެ ނަން އިއްވުމަށްފަހު މަޖިލީސް ދޫކުރައްވާ ވަޑައިގަތުމަށް އެދިވަޑައިގަންނަވާފަ އެވެ.
އެހެން ނަމަވެސް ރޮޒައިނާ މަޖިލީސް ދޫކޮށް ވަޑައިގަތުމަށް ދެކޮޅު ހެއްދެވިއެވެ. އަދި ވިދާޅުވަމުން ގެންދިޔައީ އޭނާއަށް ނަން އިއްވާފައިވަނީ ގަވައިދާއި ޚިލާފަށް ކަމަށެވެ.
އެކަމާއި ގުޅިގެން މަޖިލީސް ހޫނުވެ، ރިޔާސަތުން ވަނީ ކުޑަވަގުތުކޮޅަކަށް މަޖިލީސް މެދުކަނޑާލާފަ އެވެ.
Advertisement
This content is created and paid for by advertisers and does not involve Voice Journalists
