މިދިޔަ އަހަރު އެވްރެޖުކޮށް ކޮންމެ ޤައިދީއަކަށް 20000 ރުފިޔާ ޚަރަދުކޮށްފައިވާ ކަމަށް ކަމިޝަނާ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވެއްޖެ އެވެ.
ކޮމިޝަނަރ މިހެން ވިދާޅުވީ ކަސްޓޯޑިއަލް މެނޭޖްމަންޓް އެންޑް ސެކިއުރިޓީ ޕްރޮގްރާމްގެ 9 ވަނަ ބެޗްގެ އޮފިސަރުން ދަސްވެނިވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ކޮމިޝަނަރ ވިދާޅުވީ މިދިޔަ އަހަރު އެސާރވިސްއަށް ކަނޑައަޅާފައިވާ ބަޖެޓުން ކޮންމެ ޤައިދީއަކަށްވެސް ބޮޑު ޚަރަދެއް ހިނގާފައިވާކަމަށެވެ. ޚާއްޞަކޮށް ކޮންމެ ޤައިދީއެއް ވެސް އަނބުރާ މުޖުތަމަޢުއަށް ނެރުމަށް ކުރެވޭ މަސައްކަތަށް ކުރަންޖެހޭ ހޭދަ ބޮޑުކަން ކޮމިޝަނަރު ފާހަގަކުރެއްވި އެވެ.
"ވޭތުވެދިޔަ އަހަރުގެ ބަޖެޓަށް ބަލާއިރު، ކޮންމެ ޤައިދީއެއްގެ މައްޗަށް 20000 ރުފިޔާ ޚަރަދުކުރެވިފައިވޭ. މީގެން ދައްކުވައިދެނީ ދައުލަތުން މިކަމަށް ކުރާ ހޭދަ. އެހެންކަމުން އަޅުގަނޑުމެން މިކުރާ މަސައްކަތުން ހެޔޮ ބަދަލެއް ގެނެވޭތޯ މަސައްކަތްކުރަންޖެހޭ."
ކަމިޝަނާ އޮފް ޕްރިޒަން އަޙްމަދު މުޙައްމަދުފުޅު
ޖަލުތަކުގައި ތިބި ޤައިދީންގެ މައްޗަށް ދައުލަތުގެ ބަޖެޓުން ކުރާ ހޭދަ އަހަރުން އަހަރަށް އިތުރުވަމުން އަންނައިރު އޭގެ ސަބަބުން މުޖުތަމަޢަށް ހެޔޮ ބަދަލެއް ގެނައުމަށް ޖަލު އޮފިސަރުންގެ ފަރާތުން ހަރުދަނާ މަސައްކަތްތަކެއް ކުރަންޖެހޭކަމަށް ވެސް ކޮމިޝަނަރ ވިދާޅުވިއެވެ.
ޖަލުތަކުގެ ޙާލަތު ރަނގަޅުކުރުމަށް ސަރުކާރުން އެންމެ ފުރަތަމަ ވަނީ ޖަލުތަކުގެ އޮޑިޓެއް ހަދާފައެވެ.
މިއޮޑިޓުން ފާހަގަކުރެވުނު ކަންކަން ރަނގަޅުކުރުމަށް މިވޭތުވެދިޔަ 5 އަހަރެއްހާ ދުވަހުގެ ތެރޭގައި ގިނަ މަސައްކަތްތަކެއް ކުރެވިފައިވާކަމަށް ސަރުކާރުން ވިދާޅުވެއެވެ.
އެގޮތުން ޖަލުތަކަށް ބޭނުންވާ އިންސާނީ ވަޞީލަތާއި ޢުމްރާނީ ތަރައްޤީއަށް ގިނަ މަސައްކަތްތަކެއް ކުރެވިފައިވާކަމަށް ސަރުކާރުން ހާމަކުރައްވައެވެ.
Advertisement
This content is created and paid for by advertisers and does not involve Voice Journalists
