މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައިގެން އުފައްދެވި ފިކުރެއްގެ ދިރުން ގޮފިން އުފައްދާ ޕާޓީގެ ސައިޒަކަށް ވާނީ، ސަރުކާރި ހިންގާ ކޯލިޝަންގައި ހިމެނޭ އެމްއާރްއެމްގެ ސައިޒު ކަމަށް މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ވިދާޅުވެއްޖެއެވެ.

ޝަރީފު ކުރެއްވި ޓްވީޓެއްގައި ވިދާޅުވީ، މީގެ ކުރިންވެސް "ފިކުރެއްގެ ދިރުން" އަށް 50,000 މީހުން ސޮއި ކޮށްފި ކަމަށާ، އެ ފެކްޝަނުން ރާއްޖޭގެ އެކި ރަށްތަކުގައި ގޮފިތައް ހަދައިގެން، ބޮޑު ކޮންގްރެސް އެއް ބާއްވާނެ ކަމަށް ވެސް މީގެ ކުރިން ބުނަމުން ދިޔަ ކަމަށެވެ. އަދި އެ ކޮންގްރެސް މެދުވެރިކޮށް އެމްޑީޕީގެ ރިޔާސީ ޓިކެޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އަތްޕުޅުން އަތުލައި ރައީސް ނަޝީދަށް ދެއްވާނެ ކަމަށް އަޑު ހަރުކޮށް ގޮވަމުން ދިޔަކަމަށްވެސް އޭނާ ވިދާޅުވި އެވެ.

އެހެން ނަމަވެސް، އެކަން އެގޮތަށް ނުވުމުން މިހާރު އެ ފެކްޝަނުން ދައްކާ ވާހަކަ އަކީ ފިކުރެއްގެ ދިރުން އެމްޑީޕީ އަށްވުރެ ވެސް ބޮޑު ވާނެ ވާހަކަ ކަމަށް ޝަރީފު ވިދާޅުވި އެވެ. 

މިއާއެކު ޝަރީފް ވިދާޅުވީ މުސްތަގުބަލުގައި ފިކުރެއްގެ ދިރުމަށް ވާނެ ގޮތް، އެމްއާރްއެމް އިން އެއޮތީ ފެންނަން ކަމަށާ، ރިޔާސީ އިންތިހާބަށްފަހު ފިކުރެއްގެ ދިރުމުގެ ސައިޒު އަކަށްވެސް ވާނީ އެމްއާރްއެމްގެ ސައިޒު ކަމަށެވެ. އަދި އެމްއާރްއެމް އެ ޕަޓީގެ ޒަޢީމް އަދި ކުރީގެ ރައީސް މައުމޫން އަބްދުލްޤައްޔޫމް ގެ ފަހަތުން އެނބުރޭ ގޮތަށް ފިކުރެއްގެ ދިރުން އެނބުރޭނީ ރައީސް ނަޝީދު ގެ ފަހަތުން ކަމަށްވެސް ޝަރީފް ވިދާޅުވިއެވެ. 

އެމްއާރްއެމް އަކީ މެންބަރުން މަދު ޕާޓީއެކެވެ. އެ ޕާޓީގައި 3000 މެންބަރުން ހަމަ ނުވެގެން އެ އަދަދަށް މެންބަރުން ހަމަ ކުރުމަށްފަހު އިރު އިރު ކޮޅާއި އިލެކްޝަންސް އަށް ހުށަހަޅައެވެ.

ސަރުކާރު ހިންގާ މައި ޕާޓީ، އެމްޑީޕީ މިހާރު ހިނގަމުންދަނީ ޕާޓީ އުފެއްދި އަސާސްތަކާއި ޚިލާފަށް ކަމަށް ބުނެ އެމްޑީޕީގައި ހިމެނޭ ގިނަ މެންބަރުން ތަކެއް އެ ޕާޓީން ކެނޑި، އައު ޕާޓީއެއް އުފައްދަވާނެ ކަމަށް ފާއިތުވި ބުދަ ދުވަހު ވަނީ އިއުލާން ކޮށްފައެވެ. އަދި އިދިކޮޅު ޕީޕީއެމް ފިޔަވައި، ދެން ރާއްޖޭގައި އޮންނާނެ އެންމެ ބޮޑު ސިޔާސީ ޕާޓީ އަކަށްވާނީ, ފިކުރެއްގެ ދިރުމުން އުފައްދަން މަސައްކަތް ކުރަމުންދާ ޕާޓީ ކަމަށް އެ ފެކްޝަނުގެ މެންބަރުން އަންނަނީ ބުނަމުންނެވެ.