އެމްޑީޕީގެ ފިކުރެއްގެ ދިރުމުގެ ގޮފީގެ އައު ސިޔާސީ ޕާޓީ އުފައްދަން ބޭނުންވާ ހުއްދައަށް އެދި އިލެކްޝަންސް ކޮމިޝަނަށް މިއަދު ފޯމު ހުށަހަޅާނެ ކަމަށް ރައްޔިތުން މަޖްލިސްގެ ތޮއްޑޫ ދާއިރާގެ މެމްބަރު ޙަސަން ޝިޔާން ވިދާޅުވެއްޖެއެވެ.

އެގޮތުން މިކަމާއި ގުޅިގެން ޝިޔާން ކުރެއްވި ޓްވީޓުގައި ވިދާޅުވެފައިވަނީ ފޯމް ހުށަހެޅުން ކުރިއަށް ގެންދާނީ މިއަދު މެންދުރު 12:45 ގައި ކަމަށެވެ.

އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު އާއި އެމްޑީޕީގެ ނާއިބު ރައީސް މުހައްމަދު ޝިފާޒު އާއި އެމްޑީޕީއަށް ނިސްބަތްވެވަޑައިގަންނަވާ 12 މަޖިލިސް މެންބަރުން ހިމެނޭހެން ޖުމްލަ 14 މެންބަރުން ބުދަ ދުވަހު ވަނީ އެމްޑީޕީން ވަކިވެވަޑައިގެންފައެވެ.

އެއަށްފަހު އެ މެންބަރުން ބޭއްވި ނޫސްވެރިންގެ ބައްދަލުވުމުގައި ވަނީ އެ ފެކްޝަނުން "ފިކުރެއްގެ ދިރުން" ނަމުގައި އައު ޕާޓީއެއް އުފެއްދުމަށް ނިންމާ ފައިވާ ކަމަށާ އެ ޕާޓީ އުފެއްދުމަށް އަންނަ ހަފްތާގައި ފޯމު ހުށަހެޅުމަށް ފަހު 3،000 މީހުންގެ ސޮއި ހޯދުމުގެ މަސައްކަތް ފައްޓާނެ ކަން އިއުލާންކޮށްފަ އެވެ. 

އަދި އެ ބައްދަލުމުގައި ވާހަކަ ދައްކަވަމުން މަޖިލީހުގެ ނާއިބު ރައީސް އީވާ އަބްދުالله ވަނީ ފިކުރެއްގެ ދިރުމުން އުފައްދާ ޕާޓީން ކުރިއަށް އޮތް ރިޔާސީ އިންތިހާބުގައި ކެންޑިޑޭޓަކު ވާދަކުރައްވާނެ ކަންވެސް އިއުލާން ކުރައްވާފައެވެ. އަދި "ފިކުރެއްގެ ދިރުން" ގެ ކެނޑިޑޭޓު ކަނޑައަޅާނީ އެތެރޭގެ ފުރިހަމަ ޑިމޮކްރެޓިކް ނިޒާމެއްގެ ތެރެއިންކަމަށްވެސް އީވާ ވިދާޅުވި އެވެ.