ޕާޓީގެ އެންމެ މުހިންމު މަގުސަދަކަށްވާނީ ރައްޔިތުންގެ ޖީބަށް ތަނަވަސްކަން ގެނައުން: ދި ޑިމޮކްރެޓްސް
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނުން އުފައްދަވާ އައު ސިޔާސީ ޕާޓީ "ދި ޑިމޮކްރެޓްސް"އިން އެންމެ ބޮޑު އިސްކަމެއް ދޭނީ ރައްޔިތުންގެ ޖީބަށް ތަނަވަސްކަން ގެނެސް، އިގްތިޞާދީ ގޮތުން ރައްޔިތުން ބާރުވެރިކުރުވަން ކަމަށް އެ ޕާޓީން ބުނެފިއެވެ.
ފިކުރެއްގެ ދިރުމުން އުފައްދާ ޕާޓީ އުފެއްދުމުގެ ހުއްދައަށް އެދި އިލެކްޝަންސް ކޮމިޝަނަށް ހުށަހެޅުއްވުމަށް ފަހު ނޫސްވެރިންނާ ބައްދަލުކުރައްވާ އެ ޕާޓީގެ ތަރުޖަމާނު، އެލްޖީއޭގެ ކުރީގެ ސީއީއޯ އަފްޝަން ލަތީފް ވިދާޅުވީ އެ ޕާޓީގެ އެންމެ ބޮޑު އެއް އަސާސަކަށް ވާނީ ވީހާވެސް ގިނަ ފަރާތައް ބައިވެރި ވުމާއި ބައިވެރި ކުރުން ކަމަށެވެ.
"އެންގޭޖްވާނެ، އެންގޭޖް ކުރާނެ އަދި އެހެން މީހުންގެ އެންގޭޖްމަންޓް ހޯދާނަން. ނަން ހުށަހެޅުމަށް ވެސް ހުޅުވާލީ އެގޮތުގެ މަތިން. ވަކި ޕާޓީގައި ބައިވެރިވާން ބޭނުންވާ މީހުންނަށް އެކަންޏެއް ނޫން. އެންމެންނަށް ހުޅުވާލައިގެން،" އަފްޝަން ވިދާޅުވިއެވެ.
Advertisement
މިއާއެކު އަފްޝަން ވިދާޅުވީ އެ ޕާޓީއަށް ނަން ހުށަހެޅުމަށް ހުޅުވައިލުމުން ތަފާތު 233 ނަން ލިބުނު ކަމަށެވެ. އަދި، އޭގެން 53 އިންސައްތަ ނަމުގައި ކޮންމެވެސް ގޮތަކަށް 'ޑިމޮކްރަސީ' އެ ބަސް ބޭނުން ކޮށްފައިވާ ކަމަށް އަފްޝަން ވިދާޅުވިއެވެ.
އެހެން ކަމުން ރައްޔިތުން އެ ޕާޓީގެ ފަރާތުން އެންމެ އެދޭ ކަމަކީ ޑިމޮކްރަސީގެ ނިޒާމު ހަރުދަނާ ކޮށް، ވަރުގަދަ ކުރާނެ ޕާޓީއަކަށް އެ ޕާޓީވުން ކަމަށް ގަބޫލުކުރެވޭ ކަމަށް ވެސް އޭނާ ވިދާޅުވިއެވެ.
މިއާއެކު އަފްޝަން ވިދާޅުވީ، އެ ޕާޓީގެ މުޅި އޮނިގަނޑު ވެސް ހެދިގެންދާނީ ޑިމޮކްރަސީ އުސޫލު ތަކުން ކަމަށެވެ. އެގޮތުން، ޕާޓީގެ މަގާމުތަކާއި އަސާސްތައްވެސް، އަދި ސިޔާސަތު ތައްވެސް އެކުލަވާލެވޭނީ އެ ގޮތުގެ މަތިން ކަމަށް އޭނާ ވިދާޅުވި އެވެ.
އަފްޝަން އިތުރަށް ވިދާޅުވީ ޕާޓީގެ އެންމެ މުހިންމު ކަމަކަށް ވާނީ ރައްޔިތުން އިގްތިޞާދީ ގޮތުން ބާރުވެރިކޮށް، ލާމަރުކަޒީ ގޮތެއްގެ މަތިން ޕާޓީ ހިންގޭނެ ނިޒާމެއް ޔަގީން ކުރުން ކަމަށެވެ. އަދި، އެ ޕާޓީގެ އަސާސްތަކަކީ ރައްޔިތުން ބަލައިގަންނަ އަސާސްތަކަކަށް ހަދާނެ ކަމަށް އަފްޝަން ވިދާޅުވިއެވެ.
"އަޅުގަނޑުމެން މަސައްކަތް ކުރާނީ ޑިމޮކްރަސީ ހަރުދަން ކުރުމުގެ ތެރެއިން ރައްޔިތުންނަށް އިކޮނޮމިކް އެމްޕަވަރމަންޓް. ދެން ޖީބަށް ތަނަވަސްކަން. ބާއްޖަވެރިކަން. އިގްތިސާދީ ފައިދާ. އެކަންތައްތައް އިތުރު ކޮށްދިނުމުގެ އިތުރުން، ލާ މަރުކަޒީ ކޮށް ޕާޓީ ހިންގޭނެ ސްޓްރަކްޗަރ އެއް ޔަގީން ކުރުމާއި، އަޅުގަނޑުމެން ގަބޫލުކުރާ އަސާސްތައް އެއީ ރައްޔިތުން ގަބޫލުކުރާ އަސާސްތަކަކަށް އަލުން ރުޖޫއަ ކޮށްދިނުން."
އަފްޝަން ލަތީފު
ދި ޑިމޮކްރެޓްސް އަކީ ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދުގެ އިސްނެންގެވުމުގެ މަތިން އުފައްވާ ޕާޓީއެއް ނަމަވެސް އެ މަނިކުފާނު އަދިވެސް އެމްޑީޕީގައި ހުންނެވުމުގައެވެ. އަދި އެމަނިކުފާނު އެމްޑީޕީ ދޫކުރައްވައި އައު ޕާޓީއާއި ގުޅިވަޑައިގެންނަވާނެ އިރެއް ނޭނގޭ ކަމަށް އެ ޕާޓީން މިއަދު ވަނީ ބުނެފައެވެ.
Advertisement
Advertisement
Advertisement
This content is created and paid for by advertisers and does not involve Voice Journalists
Advertisement
