ޗާގޯސްއަކީ ދިވެހިރާއްޖޭގެ ބައެއްކަމަށް ބުނެ ދައްކާ ވާހަކައަކީ ރާއްޖެއަށް ދީނީ މިނިވަންކަން ގެންނަން ހިންގާ ޖަރީމާއެއްކަމަށް މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު ވިދާޅުވެއްޖެ އެވެ. 

ނިހާދު މިފަދައިން ވިދާޅުވެފައިވަނީ ޗާގޯސްއަކީ މޮރިޝަސްގެ ސިޔާދަތު އޮތް ތަނެއްކަމަށް ސަރުކާރުން ގަބޫލުކޮށް ސިޓީ ފޮނުވީ ޤަވައިދާއި ޚިލާފަށްކަމަށް ބުނެ އެކަމާއި ދެކޮޅަށް ގިނަ ސިޔާސީ ޕާޓީތަކެއް ގުޅި މަސައްކަތް ކުރަން ފަށާފައިވާ ދަނޑިވަޅެއްގައި ކުރެއްވި ޓްވީޓެއްގަ އެވެ. 

ނިހާދު ވިދާޅުވީ ޗާގޯސް އަކީ ރާއްޖޭގެ ތަނަކަށް ވާ ހިސާބުން ރާއްޖޭގައި ފައްޅި އެޅުން ހުއްދަކުރަން މަޖުބޫރުވާނެ ކަމަށެވެ. 

Advertisement

ޗާގޯސް މައްސަލައާއި ގުޅިގެން ރާއްޖޭގެ ބައެއް ގެއްލިއްޖެކަމަށް ބުނެ އިދިކޮޅު ފަރާތްތަކުން ވަކާލާތު ކުރަމުންދަނީ ރާއްޖޭގައި ދީނީ މިނިވަންކަން ހޯދައިދިނުމުގެ ނުބައި މަޤްސަދުގައިކަމަށް ނިހާދު ވަނީ ތުހުމަތު ކުރައްވާފަ އެވެ. 

ނިހާދު ވަނީ ޗާގޯސް އަކީ ރާއްޖޭގެ ތަނެއްކަމަށް ބުނެ ވާހަކދެއްކުން ހުއްޓާަލަން ޖެހޭ ކަމަށެވެ. އަދި ރާއްޖޭގައި އޮންނާނީ ހަމައެކަނި އިސްލާމް ދީންކަމަށް އޭނާ ވިދާޅުވި އެވެ. 

ޗާގޯސްގެ ސިޔާދަތު ލިބިގެންވަނީ މޮރިޝަސްއަށްކަމަށް ކަމަށް އެއްބަސްވެ ދިވެހި ދައުލަތްތަކުން ޒަމާނުއްސުރެ ދަމަަހައްޓަމުން އައި ސްޓޭންޑް ބަދަލުކުރުމާއި ގުޅިގެން އެކަމާއި ދެކޮޅަށް މަސައްކަތް ކުރާ ފަރާތްތައް ބުނަމުން ދަނީ ސަރުކާރުގެ ސްޓޭންޑް ބަދަލުކުރުމުގެ ސަބަބުން ރާއްޖޭގެ ކަނޑުގެ ސަރަހައްދުން ބޮޑު ބައެއް ގެއްލިގެން ގޮސްފައިވާ ކަމަށެވެ. 

ރާއްޖޭގެ އިން ކަނޑައެޅުމާއި ގުޅޭގޮތުން އިޓްލޮސްގައި އޮތް މައްސަލަ ނިމިގެން ދިޔައިރު ރާއްޖޭގެ ކަނޑުގެ ސަރަހައްދުން ބައެއް މޮރިޝަސްއަށް ލިބިގެން ދިޔައީ ރައީސް ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީފުޅުގެ ސަބަބުންކަމަށް ވެސް "ކަނޑު ވިއްކާލުމާއި ދެކޮޅު" އިއްތިހާދުން ވަނީ ބުނެފަ އެވެ. 

އެހެން ނަމަވެސް ނިހާދު އެކަން މާނަކުރައްވާފައިވާ ގޮތަށް، ރާއްޖޭގައި ދީނީ މިނިވަންކަން އޮންނަން ޖެހޭނެކަމަށް ޗާގޯސް މައްސަލައިގައި ސަރުކާރަށް ފާޑުވިދާޅުވާ އެއްވެސް ފަރާތެއް މިހާތަނަށް ވިދާޅުވެފައެއް ނުވެއެވެ.