ވައްކަންކުރި މީހަކު ހިފަހައްޓައި، އޭނާ ގައިގައި ދަވާދުލީ މައްސަލައެއް ބަލަން ފަށާފައިވާ ކަމަށް ދިވެހި ފުލުހުންގެ އިދާރާ އިން ބުނެފި އެވެ. 

މާފަންނުގައި ހުރި ފިހާރައަކުން ވައްކަން ކުރި މީހަކު ހިފަހައްޓައި، އޭނާގެ ގައިގައި ދަވާދުލަމުންދާ މަންޒަރު ފެންނަ ވީޑިއޯއެއް ރޭ މީސްމީޑިއާގައި ވަނީ ދައުރުވެފައެވެ. 

އެކަމާއި ގުޅިގެން ފުލުހުންގެ މީޑިއާ އޮފިޝަލް ވިދާޅުވީ، އެ ފިހާރައިން ވައްކަން ކުރި މީހަކު ހިފަހައްޓައިގެން އުޅޭ ކަމުގެ މައުލޫމާތު ރޭ ދަންވަރު ފުލުހުންނަށް ލިބިފައިވާ ކަމަށެވެ.

Advertisement

އަދި އެ ރިޕޯޓް ލިބުމާއިއެކު ފުލުހުން އެ ސަރަހައްދަށް ގޮސްފައިވާ ކަމަށާ، އެހެން ނަމަވެސް ފުލުހުން އެ ސަރަހައްދަށް ދިޔައިރު، އެތަނުން އެމީހުން ގޮސްފައިވާ ކަމަށްވެސް އޮފިޝަލް ވިދާޅުވި އެވެ. 

މީގެ އިތުރުން ފުލުހުންގެ މީޑިއާ އޮފިޝަލް ވިދާޅުވީ، މި މައްސަލައާއި ގުޅިގެން އެ ސަރަހައްދުގެ ސީސީޓީވީ ފޫޓޭޖްތައް ބަލައި، ވައްކަންކުރި މީހާއާއި، އޭނާ އާއި މެދު އަމަލުކުރި މީހުން ދެނެގަތުމުގެ މަސައްކަތް ތަހުގީގުގެ ތެރެއިން ކުރިއަށް ގެންދާ ކަމަށެވެ.