މޫދަށް ކުނިއެޅުމުން ވ. ނަކައި އަލިމަތާ ރިސޯޓު ތިންލައްކައިން ކުރި ޖޫރިމަނާ 45 ހާހަށް ކުޑަކޮށްފިއެވެ.

އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ކުރި އިއުލާނެއްގައި ބުނީ، ނަކައި ރިސޯޓު ގްރޫޕްގެ އަލިމަތާ ރިސޯޓުން ކަނޑަށް ކުނި އެޅުމާ ގުޅިގެން އެ އެޖެންސީން އެ މައްސަލަ ބެލުމަށްފަހު މިދިޔަ އަހަރުގެ ޖުލައި މަހުގެ ތިންވަނަ ދުވަހު އަލިމަތާ ރިސޯޓް 312,750.00 ރުފިޔާއިން ޖޫރިމަނާ ކޮށްފައިވާ ކަމަށެވެ.

ނަމަވެސް އަލިމަތާ ރިސޯޓް ގެ ފަރާތުން އެ މައްސަލަ އިސްތިއުނާފު ކުރުމާ ގުޅިގެން، މައްސަލަ ބެލުމަށްފަހު ޖޫރިމަނާ އިސްލާހު ކުރުމަށް މިނިސްޓްރީ އޮފް އެންވަޔަރަމަންޓް، ކްލައިމެޓް ޗޭންޖް އެންޑް ޓެކްނޮލޮޖީ އިން، އީޕީއޭއަށް އަންގާފައި ވާކަމަށް އީޕީއޭއިން ބުންޏެވެ.

އަދި އަލިމަތާ ރިސޯޓުން 2-3 މަސްދުވަހުގެ މުއްދަތަކަށް ގަވާއިދާ ޚިލާފަށް ކަނޑަށް ކުނިއަޅާފައިވާކަން ކަށަވަރުވާނެފަދަ ލިޔެކިޔުމެއް ނެތުމާއި އަދި މިއީ ނަކައި ރިސޯޓު ގްރޫޕްގެ އަލިމަތާ ރިސޯޓުން ގަވާއިދު ކުނި މެނޭޖްކުރުމާބެހޭ ގަވާއިދާ ޚިލާފުވެގެން ފިޔަވަޅު/ޖޫރިމަނާ ކަނޑައެޅޭ ފުރަތަމަ ފަހަރު ކަމަށް ވުމާއެކު، ޖޫރިމަނާ އިސްލާހު ކުރީ ކަމަށް އީޕީއޭއިން ބުންޏެވެ.

އެހެންކަމުން އަލިމަތާ ރިސޯޓު ޖޫރިމަނާ ކޮށްފައިވާ އަދަދަކީ 45,000.00 ރުފިޔާ ކަމަށާއި މި ފައިސާ މަސް ދުވަހުގެ ތެރޭގައި ދެއްކުމަށް އީޕީއޭއިން ވަނީ އެ ރިސޯޓަށް އަންގާފައެވެ.

މީގެ އިތުރުން، މިހާރު ރިސޯޓުގައި އުފެދޭ ކާބޯތަކެތީގެ ބާކީ ބަޔާއި ބެހެއްޓުމުން އަމިއްލަޔަށް ނެތިފަނާވެދާ ކުންޏާމެދު ޢަމަލުކުރާ ގޮތަކީ ކޮބައިކަމާއެކު ކުނި މެނޭޖް ކުރުމުގެ ޕްލޭން ވެސް މަސް ދުވަހުގެ ތެރޭގައި އީޕީއޭއަށް ހުށަހެޅުމަށް އީޕީއޭއިން ވަނީ އެ ރިސޯޓަށް އަންގާފައެވެ.