ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ދިވެހިރާއްޖޭގެ ވެރިކަން ދިނީ ތަބަކަކަށް ލާފައިކަމަށް ރައްޔިތުންގެ މަޖިލީހުގެ ގައްުދޫ ދާއިރާގެ މެމްބަރު އަހުމަދު ޒާހިރު ވިދާޅުވެއްޖެ އެވެ.
މެމްބަރު ޒާހިރަކީ ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް ތާއީދުކުރައްވާ މެމްބަރެކެވެ. އޭނާ އަކީ އެމްޑީޕީއިން ނިކުމެ ވަކިވި 12 މެމްބަރުންގެ ތެރޭގައިވެސް ހިމެނިވަޑައިގަންނަވާ ބޭފުޅެކެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ޒާހިރު ވިދާޅުވީ މި ސަރުކާރުން ފަށާފައިވާ މަޝްރޫއުތައް ނުނިންމާ ވާހަކައަކީ އަބަދުވެސް ދައްކަމުން އައި ވާހަކައެއް ކަމަށެވެ.
އާރުޑީސީއާއި ހަވާލުކޮށްގެން ހިންގަމުންދާ މަޝްރޫއުތަކުން މިސާލު ނަންގަވަމުން ޒާހިރު ވިދާޅުވީ ނާގާބިލު ފަރާތްތަކަށް މަޝްރޫއުތައް ދެނީ ސަރުކާރުގެ ދިފާއުގައި އެމީހުން ލައްވާ މަސައްކަތް ކުރުވުމަށް ކަމަށެވެ.
މި ވެރިކަމަކީ ރައީސް ޞާލިހަށް ތަބަކަކަށް ލާފައި ބަޔަކު ދިން ވެރިކަމެއް ކަމަށާއި، ވެރިކަމުގެ ލައްޒަތު ލިބިވަޑައިގަތުމުން އެމްޑީޕީގެ އަސާސްތައް މުގުރާފައި ނަމަވެސް އެމަނިކުފާނު މިހާރު މަސައްކަތްޕުޅު ކުރައްވަމުން ގެންދަވަނީ ދެވަނަ ދައުރެއް ހޯއްދަވާ ވެރިކަމުގައި ދެމިހުރުމަށްކަމަށް އޭނާ ވިދާޅުވި އެވެ.
"ވެރިކަމުގެ ދައުރެއް އެ ނިމެނީ ލިންކު ރޯޑު ނެހެދި. ތަބަބަކަށް ލާފައި ވެރިކަން ދިނީމާ ދެން ހަމަ ވިސްނޭނީ ދެން ކިހެނެއްތޯ ވެރިކަމުގެ ދެވަނަ ދައުރެއް ހޯދާނީ؟ އެކަން ކުރަންވެގެން އެ އުޅުއްވަނީ"
ގައްދޫ ދާއިރާގެ މެމްބަރު އަހުމަދު ޒާހިރު
މެމްބަރު ޒާހިރުގެ އިތުރުންވެސް އެމްޑީޕީން ނިކުމެވަޑައިގެން މެމްބަރުން ގެންދަވަނީ ރައީސް ޞާލިހުގެ ސަރުކާރުން ވައުދުތައް ނުފުއްދާކަން ފާހަގަކޮށް ސަރުކާރަށް ގިނަ ފާޑުކިޔުންތަކެއް އަމާޒުކުރަމުން ނެވެ.
އެގޮތުން މަސްވެރިންނާއި ދަނޑުވެރިންނަށް ވީ ވައުދުތައްވެސް ސަރުކާރަށް ފުއްދާދެވިފައި ނުވާކަމަށާއި، ރައީސް ޞާލިހަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނެތްކަމަށް އެމްޑީީޕީން ވަކިވެ ވަޑައިގެން މެމްބަރުން ގެންދަވަނީ ވިދާޅުވަމުން ނެވެ.
Advertisement
This content is created and paid for by advertisers and does not involve Voice Journalists
