މަޖިލީހުގެ ރިޔާސަތުން މެމްބަރުންގެ މެދުގައި ތަފާތުކުރުން ގެންގުޅުއްވާތީ ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ނުރުހުން ފާޅުކުރައްވާ މަޖިލީހުގައި އިހުތިޖާޖުކޮށްފި އެވެ.
ރައްޔިތުންގެ މަޖިލީހުގެ ދެވަނަ ދައުރުގެ 4ވަނަ ޖަލްސާގައި ލިބިވަޑައިގެންނެވި ފުރުސަތުގައި ވާހަކަދައްކަވަމުން ރޮޒައިނާ ވަނީ މަޖިލީހުގައި ޤަވައިދާއި ޚިލާފަށް ރިޔާސަތުން ކުރައްވަމުން ގެންދަވާ ކަންކަން ފާހަގަކޮށް ނުރުހުން ފާޅުކުރައްވާފަ އެވެ.
ޖަލްސާ ކުރިއަށް ގެންދިޔައިރު، ހުސްވަގުތުކޮޅަށްފަހު މަޖިލީހުގެ ރިޔާސަތު ބެލެހެއްޓެވީ ރައްޔިތުން މަޖިލީހުގެ ވިލިފުށި ދާއިރާގެ މެމްބަރު ހަސަން އަފީފެވެ.
ރޮޒައިނާގެ ވާހަކަ ފައްޓަވަމުން ފުރަތަމަވެސް ވިދާޅުވީ އަފީފު ރިޔާސަތުގައި އިންނެވީ މަޖިލީހުގެ ޤަވައިދާއި ޚިލާފަށް ކަމަށެވެ. އެހެންކަމުން އަފީފު ރިޔާސަތުގައި އިންނެވީ ކޮން ސަބަބަކާއި ހުރެކަން އެންމެ ފުރަތަމަ ކަމެއްގެ ގޮތުން ސާފުކޮށްދެއްވަން ޖެހިވަޑައިގަންނަވާނެކަމަށް ރޮޒައިނާ ވިދާޅުވި އެވެ.
"މަޖިލީހުގެ ރައީސްއާއި ނައިބުރައީސް ރިޔާސަތުގައި ނީންނަވާކަމަށް ވަންޏާ، ނީންނަވަން ޖެހެނީ ރަނގަޅު ޤަބޫލުކުރެވޭ އުޒުރަކާއި އެކީގައި. މަޖިލީހުގެ ކުޑަދޮށުގައި އަނގަތަޅަން ތިއްބަވާފައި، މިތަނަށް އެހެން ބޭފުޅަކު ރިޔާސަތަށް ފޮނުއްވީމަ އެވާހަކަ މަޖިލީހުގެ އިއްޒަތްތެރި މެމްބަރުން ފާހަގަކުރައްވާނެ"
އައްޑޫ މީދޫ ދާއިރާގެ މެމްބަރު ރޮޒައިނާ
ރޮޒައިނާގެ އެ ވާހަކަތައް މެދުކަނޑާލުމަށްފަހު، ރިޔާސަތުން ވަނީ އޭރު ބަހުސް ކުރެވެމުންދިޔަ އެމްޑީޕީ ވެރިކަމެއް އޮވެ އެމްޑީޕީގެ މެނިފެސްޓޯގައިވާ މަސްވެރިކަމުގެ ސިޔާސަތު ހިންގުމުގައި ފަހަތުފަޔަށް ބުރަވެ ސަރުކާރުން މަސްވެރިކަމުގެ ސިނާއަތާއި ދެކޮޅަށް ވާހަކަދެއްކުން ހުއްޓާލައި އެމްޑީޕީގެ މެނިފެސްޓޯގައިވާ ގޮތަށް އަދި ރައީސުލްޖުމްހޫރިއްޔާގެ އޮފީހުގެ ވެބްސައިޓުގައި ޝާއިއުކޮށްފައިވާ ސިޔާސަތު ތަންފޫޒުކުރުމަށް ގޮވާލައި ހުށައަޅާފައިވާ ޤަރާރަށް ބަހުސްކުރެއްވުމަށް އެދިވަޑައިގެންފަ އެވެ.
ރިޔާސަތުގެ އެ އެންގުމާއި ގުޅިގެން ރޮޒައިނާ ވިދާޅުވީ މަޖިލީހުގެ ރިޔާސަތަށް ހުށައަޅާފައިވާ ގަރާރި ފެންނަނީ ބައެއް މެމްބަރުން ގަރާރުގައި ނުހިމެނޭ ވާހަކަ ދައްކަވަން ފެއްޓެވެމުން ކަމަށެވެ.
ބައެއް މެމްބަރުން ކަމާއި ނުގުޅޭ ވާހަކަތައް ދެއްކި ނަމަވެސް ރިޔާސަތުން އެ މެމްބަރުން ހުއްޓުވުމަށް އެއްވެސް މަސައްކަތެއް ކުރަމުން ނުދާކަން ރޮޒައިނާ ފާހަގަކުރެއްވި އެވެ.
"މާފަންނު މެދުދާއިރާގެ މެމްބަރު މިތާގައި މި ގައުމުގެ ރައީސުލްޖުމްހޫރިއްޔާއަކީ ބޮން ގޮއްވައިގެން މީހަކު މަރާލަން އުޅުނު މީހެކޭ ކިޔައިގެން އެންމެ ހުތުރުކޮށް މަރުގެ އިލްޒާމު އެޅުވިއިރު އިއްޒަތްތެރި ރައީސްއަށް އެއީ ގަރާރާއި (ޚަލާފު) ވާހަކައަށް ނުވި.. އަނެއްކަ މިއަދު ޤަރާރުގައި އޮތީ އެ ވާހަކަތޯ؟ އަޅުގަނޑުމެންނަށް ފެންނަނީ މަސްވެރިކަމާއި ބެހޭ ޤަރާރެއް. ބޮން ގޮއްވުމާއި ބެހޭ ޤަރާރެއް ނޫން"
އައްޑޫ މީދޫ ދާއިރާގެ މެމްބަރު ރޮޒައިނާ
މެމްބަރުންގެ މެދުގައި ރިޔާސަތުން ތަފާތުކުރާ ވާހަކަ ދައްކަވަން ފެއްޓެވެމުން ރިޔާސަތުން ވަނީ ރޮޒައިނާއަށް ވާހަކަދެއްކެވުމަށް ދިން ފުރުސަތު ކުރުކޮށްލައްވާ، މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމަށް ފުރުސަތު އަރުވާފަ އެވެ.
އެކަމާއި ގުޅިގެން މިއަދުގެ ޖަލްސާވެސް ހޫނުވެގެން ދިޔައެވެ.
މެމްބަރު ރޮޒައިނާގެ އިތުރުން އެމްޑީޕީގެ މެމްބަރުން ވަނީ މަޖިލީހުގެ ރިޔާސަތުން މެމްބަރުންގެ މެދުގައި ތަފާތުކުރަމުންދާކަން ފާހަގަކޮށް އިހުތިޖާޖުވެސް ކޮށްފައެވެ.
އެކަމާއި ގުޅިގެން މަޖިލީސް ހަމަޔަކަށް އެޅުވުމަށް ޖަލްސާ މެދުކަނޑާލަން ވެސް ޖެހުނެވެ.
Advertisement
This content is created and paid for by advertisers and does not involve Voice Journalists
