ރައީސް އިބްރާހިމް މުހައްމަދު ޞާލިހަކީ މިވަގުތު ރާއްޖޭގެ ސަލާމަތަށް ހުރި ނުރައްކަލެއް ކަމަށް ހެންވޭރު ހުޅަނގު ދާއިރާގެ މެންބަރު އަލްއުސްތާޛް ހަސަން ލަތީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ ތަޅުމުގައި މިއަދު ވާހަކަ ދައްކަވަމުން ހަސަން ލަތީފް ވިދާޅުވީ ފުޑް ސެކިއުރުޓީއާ ދޭތެރޭ މިވަގުތު ވަރަށް ބޮޑު ކަންބޮޑުވުމެއް އެބައޮތް ކަމަށާއި އެޔާއެއްކު ރާއްޖޭގެ ރައްޔިތުންގެ ސަލާމަތާ ރައްކާތެރިކަމަށްވެސް އިންތިހާއަށް ނުރައްކާތެރި ވެފައިވާ ކަމަށެވެ.
އެގޮތުން މާލޭގެ މަޖީދީމަގުގެ މެދުގަ ރަމަޟާން މަހުގައި ބޮމެއް ގޮއްވާލިއިރު އެ ބޮން ގޮވުމުގެ ކުރިން އެ މައުލޫމާތު ސީދާ ރައީސުލް ޖުމްހޫރިއްޔާއަށް ލިބިފައި ވާކަމަށް ހަސަން ލަތީފް ވިދާޅުވިއެވެ.
"އަޅުގަނޑު މި ދަންނަވާ ވާހަކަ އަކީ އިއްޒަތްތެރި ރައީސް، މިތަނުގަ 241 ކޮމިޓީން، ސަލާމަތީ ހިދުމަތްތަކާ ބެހޭ ކޮމިޓީން ހިންގި އިންކުއަރީގަ ސާފުކޮށް އެބައޮތް އެނގެން، ކެނެރީގެ ހުންނަ ގޯޅީގާ ސައިކަލެއް ބަހައްޓާފާ އެ ސައިކަލުގަ ބޮމެއް ހަރުކޮށްފާ، ރައީސް ނަޝީދު ނުކުމެވަޑައިގަންނަވާ ގަޑީގާ އެ ބޮން ގޮއްވާލައިގެން ރައީސް ނަޝީދު މަރާލަން އުޅުނު ކަމުގެ މައުލޫމާތު ރައީސުލް ޖުމްހޫރިއްޔާއަށް އެނގިވަޑައިގަންނަވާ ކަމުގެ މައުލޫމާތު ވަނީ ލިބިފަ އިންކުއަރީއަށް" ހަސަން ލަތީފް ވިދާޅުވިއެވެ.
ނަމަވެސް ބޮން ގޮއްވުން ނުހުއްޓުނުކަން ފާހަގަ ކުރައްވައި ހަސަން ލަތީފް ވިދާޅުވީ އޭގެ ސަބަބަކަށް ދެއްކެވީ އެތަނުގައި ހުރި ސައިކަލުތަކެއް ސާފުކޮށް ނުލެވުން ކަމަށެވެ.
އެއީ ރަނގަޅު ވާހަކައެއް ކަމަށް ގަބޫލުކުރަން ދަތި ކަމަށް ހަސަން ލަތީފް ވިދާޅުވިއެވެ.
އޭގެ އިތުރުން ހަސަން ލަތީފް ވިދާޅުވީ ޔާގޫތުގޭގައާއި މެރީބްރައުން ކައިރީ ވެސް ބޮމެއް ބާއްވައިގެން ގޮއްވާލަން އުޅުނުކަމުގެ މައުލޫމާތު ލިބުނު އިރު މި ކަންކަމަކަށް އަޅާލާފައި ނުވާ ކަަމަށެވެ.
މިއީ ރައީސަށް ނޭނގި ހިނގާ ކަންކަން ކަމަށް ދެކެވަޑައިގަންނަން ދަތިކަމަށް ހަސަން ލަތީފް ވިދާޅުވިއެވެ.
އެހެންކަމުން ފުޑް ސެކިއުރިޓީއަކީގެ ވާހަކަ ދެއްކުމުގެ ބަދަލުގައި ފުރަތަމަ ރާއްޖޭގެ ރައްޔިތުންގެ ސެކިއުރުޓީއާ ދޭތެރޭ ވާހަކަ ދައްކަން ޖެހޭ ކަމަށާއި ރައީސް ޞާލިހަކީ ރާއްޖޭގެ ސަލާމަތަށް ހުރި ނުރައްކަލެއް ކަމަށް ހަސަން ލަތީފް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
