ފޯޅަވައްސަކީ މޮރިޝަސްއަށް ސިޔާދަތު ލިބިގެންދާ ތަނެއްކަމަށް ޤަބޫލުކޮށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު މައުލޫމާތު ލިބިގަތުމުގެ ހައްގުގެ ދަށުން އާއްމު ނުކުރި ނަމަވެސް ރައްޔިތުންގެ މަޖިލީހަށް އެ ސިޓީފުޅު ހިއްސާކުރަން ޖެހޭނެ ކަމަށް ރާއްޖޭގެ ކުރީގެ ޚާރިޖީ ވަޒީރު ޑރ. އަހުމަދު ޝަހީދު ވިދާޅުވެއްޖެއެވެ.
ޗާގޯސް މައްސަލައާއި ގުޅިގެން ޝަހީދު ކުރެއްވި ޓްވީޓެއްގައި ވިދާޅުވީ، ރައީސް ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީ މަޖިލީހާއި ހިއްސާކުރަންޖެހޭ ސަބަބުތައް ވަނީ ހާމަކުރައްވާފައެވެ.
އެގޮތުން ވިދާޅުވީ، ރައީސް ޞާލިހުގެ އެ ސިޓީފުޅު މޮރިޝަސް ސަރުކާރުން ބޭރުގެ ބައެއް ފަރާތްތަކާއި ހިއްސާކޮށްފައިވާ ކަމަށެވެ. އަދި އެ ސިޓީފުޅުގެ ވާހަކަ، އިން ވަކިކުރުމުގެ މައްސަލާގައި އިޓްލޮސްއިން އިއްވި ހުކުމުގައިވެސް ބަޔާންކޮށްފައިވާ ކަން ޝަހީދު ފާހަގަކުރެއްވިއެވެ.
ޝަހީދު އިތުރަށް ވިދާޅުވީ، މޮރިޝަސްއިން އިޓްލޮސްއަށް މައްސަލަ ހުށައެޅީ ސިޔާސީ އޮއިވަރެއްގައި ޖެހިގެން ކަމަށެވެ. އެހެންކަމުން އައިސީޖޭގެ ލަފާ ރާއްޖެއިން ބަލައިގަތުމަށް ނިންމުމަކީވެސް ސިޔާސީ މޮޅު އުކުޅަކަށްވުން އެކަށީގެންވާކަމަށް އޭނާ ވިދާޅުވި އެވެ.
އެހެންކަމަށްވުމުން އެ ސިޓީއަކީ ރާއްޖޭގެ ލިޓިގޭޝަން ސްޓްރެޓެޖީގެ ދަށުން ލީގަލް ޓީމުން ފޮނުވި ސިޓީއަކަށް ވާނަމަ އެއީ ރައީސް ޞާލިހް އެޅުއްވި ހިކުމަތްތެރި ފިޔަވަޅެއްކަމަށް ބެލުމުގެ ޖާގަ އޮތްކަމަަށް ޝާހިދު ވިދާޅުވި އެވެ.
"އެސިޓީ ސިއްރުކުރެއްވުމަށް ބާރު އަޅުއްވާ ބޭފުޅުންނަށް އެ ކުރެއްވޭ ކަމަކީ ރައީސް ޞާލިހް އާއި ދެކޮޅަށް، އޮޅިގެން ނަމަވެސް ބައި ކޮޅަށް ގޯލެއް ޖެއްސެވުން" ޝަހީދު ވިދާޅުވިއެވެ.
ޗާގޯސްއާއި ރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިޓްލޮސްއަށް ހުށައެޅި މައްސަލައިގައި ދިވެހި ދައުލަތުގެ ފަރާތުން ވަކާލާތުކޮށްފައިވަނީ ރައްޔިތުންގެ މަސްލަހަތު އިސްކޮށްގެން ނޫން ކަމަށް އިދިކޮޅު ފަރާތްތަކާއި ކުރީގެ ބަންޑާރަ ނައިބުންނާއި ދިފާއީ ބާރުގައި މަސައްކަތްޕުޅު ކުރައްވާފައިވާ އެކިއެކި ފަރާތްތައްވެސް ދަނީ ބުނަމުންނެވެ.
މި މައްސަލައިގައި ކަނޑުގެ ސަރަހައްދުން ބައެއް ދޫކޮށްލީ 500 މިލިއަން ޑޮލަރިގެ ޑީލެއް ހަދައިގެން ކަމަށާއި، އެކަމުގައި އިސްކޮށް އުޅުއްވާފައިވަނީ ފޮރިން މިނިސްޓަރު އަބްދުالله ޝާހިދުކަމަށް އިދިކޮޅު ފަރާތްތަކުން ދަނީ ތުހުމަތުކުރަމުން ނެވެ.
އެ ތުހުމަތުތަކާއި ގުޅިގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިޓީފުޅު ހޯދުމަށް މަސައްކަތްތަކެއް ކުރެވިފައިވާ ކަމަށާއި، އެހެން ނަމަވެސް މިހާތަނަށް އެ ސިޓީފުޅު ހާމަކުރައްވާފައި ނުވާކަމަށް ކަނޑުވިއްކާލުމާއި ދެކޮޅު އިއްތިހާދުގެ މަޖިލީސް މެމްބަރުން ގެންދަވަނީ ވިދާޅުވަމުން ނެވެ.
އަދި ސަރުކާރުން އެ ސިޓީ ސިއްރުކުރުމަކީ ކަނޑުވިއްކާލީ ޑީލު ހަދައިގެން ކަމަށް ކުރެވޭ ތުހުމަތަށް ބާރުލިބޭކަމެއްކަމަށް އެ އިއްތިހާދުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
