ރާއްޖޭގައި އަލަށް ފަށަން މަސައްކަތްކުރާ އެއާލައިން، 'ބިއޯންޑް' ގެ ސީއީއޯ ޓޭރޯ ޓަސްކިލާ، އެ އެއާލައިންއަށް ގައުމީ އެއާލައިންގެ ދަރަޖަ ދީފައިވާ ކަމަށް ވިދާޅުވެވުނީ އޮޅިގެން ކަމަށް ބުނެ މައާފަށް އެދިއްޖެއެވެ.

ޓަސްކިލާއަށް މިހެން އޮޅިގެން ވިދާޅުވެވުނީ ސީއެންއެންގެ ވިޔަފާރި ޝޯ، 'ކުއެސްޓް މީންސް ބިޒްނަސް'އަށް މިދިޔަ ހުކުރު ދުވަހު ދެއްވި އިންޓަވިއުއެއްގައެވެ.

އެގޮތުން ޓަސްކިލާ ވިދާޅުވީ ބިއޯންޑަކީ ގައުމީ އެއާލައިނެއްގެ ދަރަޖަ ރާއްޖެއިން ދީފައިވާ އެއާލައިނަކަށް ވާތީ 80 ގައުމަކާ އެކު ރާއްޖެއިން ސޮއިކޮށްފައިވާ މުއާހަދާތަކުން ލިބޭ ލުއިތަކާއި އިސްތިސްނާތައް އެ އެއާލައިނަށް ލިބޭނެ ކަމަށެވެ.

އެހެންނަމަވެސް ދިވެހި ސަރުކާރުގައި މިހާރު ގައުމީ އެއާލައިންގެ ދަރަޖަ ދީފައިވަނީ ސަރުކާރުގެ 100 އިންސައްތަ ހިއްސާ އޮންނަ އައިލެންޑް އޭވިއޭޝަން ސާވިސަސް އިން ހިންގާ މޯލްޑިވިއަންއަށެވެ. އިތުރު އެއާލައިން އަކަށް މި ދަރަޖަ ދީފައިވާ ކަމަށް ނުވަތަ ދިނުމަށް މަޝްވަރާ ކޮފައިވާ ކަމަށް ސަރުކާރުން ހާމަކޮށްފައެއް ނުވެއެވެ.

އެހެންކަމުން މިފަދައިން ބުނެ ސީއީއޯ ބޭނުންކުރައްވާފައިވާ ލަފްޒުތަކަކީ ބަހުގެ މާނައިގެ ގޮތުން ސައްހަ ނޫން ލަފްޒުތަކެއް ކަމަށް ބުނެ 'ބިއޯންޑް' އިން ވަނީ މިއަދު މައާފަށް އެދިފައެވެ.

އެގޮތުން މިކަމާއި ގުޅިގެން އެއާލައިންގެ އިންސްޓަގްރާމްއަށް ލާފައިވާ ބަޔާނެއްގައި މައާފަށް އެދި ބުނެފައިވަނީ މި ދަރަަޖަ ރާއްޖޭގައި ދެވިފައިވަނީ މޯލްޑިވިއަން އަށް ކަމަށާއި ބިއޯންޑަށް މި ދަރަޖަ ދީފައިނުވާ ކަމަށެވެ. އަދި މި ދަރަޖަ އެ އެ އެއާލައިންއަށް ދިނުމަށް އެއްވެސް މަޝްވަރާއެއް ކަމާބެހޭ ފަރާތްތަކާއި ކޮށްފައިނުވާ ކަމަށެވެ.

މިއާއިއެކު އެ އެއާލައިންގެ އުންމީދަކީ ދިވެހިރާއްޖޭގެ ސަރުކާރާއި، ފަތުރުވެރިކަމުގެ ސިނާއަތާއި، ކަމާބެހޭ ވުޒާރާތަކާއި، ރާއްޖޭގެ ހުރިހާ އެއާލައިންތަކަކާއިއެކު ރާއްޖޭގެ ފަތުރުވެރިކަމާއި އިގްތިޞާދު ކުރިއެރުވުމަށް މަސައްކަތް ކުރުން ކަމަށް ބިއޯންޑް އިން ވަނީ ބުނެފައެވެ.

ބިއޯންޑް އެއާލައިންއަކީ ރާއްޖޭގައި ސެޕްޓެމްބަރު މަހު ދަތުރުތައް ފެށުމަށް މަސައްކަތް ކުރާ އެންމެ މަތީ ފެންވަރުގެ އެއާލައިންއެކެވެ.

މި އެއާލައިންގެ ދަތުރުތަކުގައި އޭ-320 މަރުކާގެ ބޯޓުތައް ބޭނުންކުރުމަށް ހަމަޖެހިފައިވާއިރު ފުރަތަމަ ބޯޓުގައި ހިމެނޭނީ މުޅިން ވެސް މަތީ ފަންތީގެ 44 ގޮނޑިއެވެ.

މިއާއިއެކު ކުރިއަށް އޮތް ފަސް އަހަރުގެ ތެރޭގައި ފްލީޓު ބޮޑުކޮށް، ދަތުރުކުރާ މަންޒިލްތައް އިތުރުކުރާނެ ކަމަށް އެއާލައިން މައުލޫމާތު ވަނީ ދީފައެވެ.