މަޖިލީހަށް ހުށަހެޅޭ ކުއްލި މައްސަލަތަކާއި ގަރާރުތަކުގައި ސަރުކާރަށް ތާއީދުކޮށް މެންބަރުން ވަކާލާތު ކުރުމަކީ ވަރަށް މުހިންމު ކަމެއް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

ރައީސް ޞާލިހް މިފަދައިން ވިދާޅުވެފައި ވަނީ މިނިވަން މެންބަރެއްގެ ގޮތުގައި ރައްޔިތުންގެ މަޖިލީހަށް އިންތިހާބުވި ނިލަންދޫ ދާއިރާގެ މެންބަރު އަބްދުލް މުހުސިން ހަމީދު (ޖޭފޯ) ސަރުކާރު ހިންގާ މައިޕާޓީ އެމްޑީޕީ އަށް ސޮއި ކުރުމަށް އިއްޔެ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. 

ރައީސް ވިދާޅުވީ ސަރުކާރު ހިންގާ ފަރާތަށް ރައްޔިތުން މަޖިލީހުގެ އަޣުލަބިއްޔަތު އޮތުމަކީ ވަރަށް ބޭނުންތެރި ކަމެއް ކަމަށެވެ.

ރައީސް ވިދާޅުވީ އެމްޑީޕީ އަށް ސޮއި ކުރެއްވުމުގެ ކުރީގައިވެސް، ޖޭފޯ އަކީ ކޮންމެހެން ބޭނުންވެއްޖެ ހާލަތެއްގައި އަބަދުވެސް ސަރުކާރަށް އެއްބާރުލުން ދެއްވި ބޭފުޅެއް ކަމަށެވެ. އަދި ކުރިންވެސް ޖޭފޯ ހުންނެވީ އެމްޑީޕީ އަށް ސޮއި ކުރުމަށް ތައްޔާރަށް ކަމަށާއި އެކަން އޭރު ނުކުރީ އެއީ އެންމެ ރަނގަޅު ވަގުތު ކަމަށް އެމްޑީޕީ އަށް ނުފެންނާތީ ކަމަށް ރައީސް ވިދާޅުވިއެވެ.

“އެހެންނަމަވެސް މިއަދު މިއީ ޕާޓީއާ އެކީގައި ޕާޓީގެ މެންބަރެއްގެ ގޮތުގައި މަސައްކަތް ކުރަންވީ ވަގުތުކަން. އެވަގުތުގައި އެ ނިންމެވުން ޖޭފޯ ނިންމެވިކަން އަޅުގަނޑު އަދިވެސް އެއްފަހަރު ވަރަށް އިހުލާސްތެރިކަމާއެކުގައި ޝުކުރު އަދާކުރަން،” ރައީސް ވިދާޅުވިއެވެ.

ޖޭޕޯ އެމްޑީޕީއަށް ސޮއި ކުރުމާއިއެކު އެ ޕާޓީގެ މަޖިލިސް މެމްބަރުންގެ މިހާރުގެ އަދަދަކީ 56 އެވެ.

މަޖިލީހަށް އެމްޑީޕީގެ މެޖޯރިޓީ ލިބުމުން ސަރުކާރުން ބޭނުން ގޮތަކަށް ކަންތައްތައްކޮށް ސަރުކާރު ޒިންމާދާރު ކުރުމަށް އިދިކޮޅުން ކުރާ މަސައްކަތަށް ވަރަށް ބޮޑު ހުރަހެއް ކުރިމަތިވާ ކަމަށް އިދިކޮޅުން ބުނެއެވެ.