ހަތިމަށް ކުޅު ޖެހި މައްސަލައެއްގެ އިތުރުން ބަރަހަނަ ހާލުގައި މޫދުގައި އޮއްވާ ހައްޔަރުކުރި މ. ޝޭޑީހޯމް، ޙަސަން ޒިޔާދު، އޭނާގެ އެއްބަނޑު ބޭބެއަށާއި، އެއްބަނޑު އެއްބަފާ ދައްތައަށް ބިރު ދައްކައި، ދިރިއުޅޭ ގޭގެ މުދަލަށް ގެއްލުން ދިނުމުގެ ސަބަބުން ޖަަލަށް ލާން ކްރިމިނަލް ކޯޓުން ހުކުމް ކޮށްފިއެވެ.

ޒިޔާދުގެ މައްޗަށް ޝަރީއަތުން އުފުލާފައިވަނީ އެވަގުތު އަނިޔާ އެއް ދީފާނެކަމުގެ ބިރު ދެއްކުމުގެ ދައުވާއާއި މުދަލަށް ގެއްލުން ދިނުމުގެ ދައުވާ ކަމަށް ކްރިމިނަލް ކޯޓުން އާންމު ކޮށްފައިވާ ނިންމުމުގައި ވަނީ ބުނެފައެވެ.

އެގޮތުން އޭނާގެ އެއްބަނޑު ބޭބެ ހ. ރޯޒްހައުސް އަބްދުالله ރަޝީދު ދިން ހެކިބަހުގައި ބުނެފައިވަނީ މިދިޔަ އަހަރުގެ ޖޫން 27 ގައި ދަންވަރު 02:15 ކަންހާއިރު ޒިޔާދު އާއި ރަޝީދު ދިރިއުޅޭ ހ. ރޯޒްހައުސްގޭގެ ކުޑަ ދޮރުގެ ލޫވަތަކާއި، އެގޭގެ ތަށިތައް ތަޅާލައި ކަރަންޓް ސްވިޗް ބޯޑުތަކަށް ފެން ޖަހާފައިވާ ކަމަށެވެ.

Advertisement

އަދި ދޮންނަ މެޝިނަށް ފެން އެޅުމަށްފަހު ކަރަންޓު ސަރކެޓް ބޯޑަށް ކަރަންޓު ވާގަނޑެއް ގުޅައި އޭގެ އަނެއްކޮޅު ދޮންނަ މެޝިނަށް އަޅާފައި ހުރި ފެނަށް ގުޅައި ކަރަންޓް ޖައްސައި، އެގޭގެ ކަރަންޓް ސަރކެޓް ބްރޭކަރު ވައްޓާލައި، ކަރަންޓް ކަނޑައި، ތަކުރާރުކޮށް ބްރޭކަރު ނަގައި ކަރަންޓް ޝޯޓްކޮށްފައިވާ ކަމަށް ވެސް ރަޝީދު ބުނެފައިވެއެވެ.

މިއާއިއެކު ގޭތެރޭގައި އަލިފާން ރޯކޮށްފައިވާ ކަމަށާއި މިކަން ރަޝީދަށް ނުފެނުނު ނަމަ މުޅި ގޭގައި ރޯވީސް ކަމަށާއި އޭނާއާއި ދިމާލަށް ވަޅިއެއްވެސް އެއްލާފައިވާ ކަމަށް ރަޝީދު ވަނީ ބުނެފައެވެ. 

އެހެންނަމަވެސް ކޮއްކޮއާއި ދޭތެރޭ ނަފްރަތެއް ނެތް ކަމަށާއި ޒިޔާދަކީ ނަފްސާނީ ބައްޔެއް ހުންނަ މީހެއް ކަމަށް ރަޝީދު ވަނީ ފާހަގަކޮށްފައެވެ.

ރަޝީދުގެ އިތުރުން ޒިޔާދުގެ އެއްބަނޑު އެއްބަފާ މ. ޝޭޑީހޯމް, މަރްޔަމް ރަޝީދާ ވެސް ހެކި ދެމުން ބުނެފައިވަނީ އެގޭގެ މުދަލަށް ޒިޔާދު އެކި ފަހަރު މަތިން ގެއްލުން ދީ އެމީހުންނަށް ބިރުދައްކާފައިވާ ކަމަށާއި އެދުވަހުގެ ވަގުތެއްގައިވެސް ރަޝީދާއާއި ދިމާލަށް މަރާލާނަމޭ ބުނެފައިވާ ކަމަށެވެ.

ޒިޔާދު ވަނީ ކޯޓުގައި މި ދެ ދައުވާ އަށްވެސް އިންކާރު ކޮށްފައެވެ.

އެހެންނަމަވެސް ޝަރީއަތުން ބެލި ބެލުމުގައި މި ދެ ދައުވާވެސް ޝައްކެއް ނެތް މިންވަރަށް ސާބިތުވާ ކަމަށް ވަނީ ކަނޑައަޅާފައެވެ.

މީހަކަށް އަނިޔާއެއް ދީފާނެ ކަމަށް ބިރު ދެއްކުމުގެ ކުށުގެ އަދަބުގެ އަސާސީ މިންގަނޑަކީ 1 އަހަރާއި 7 މަހާއި 6 ދުވަހެވެ. ނަމަވެސް ޒިޔާދުގެ މައްޗަށް ޑްރަގް ކޯޓުން ޖިނާއީ ކުށެއް ސާބިތުވެފައިވާތީ އަދަބުގެ އަސާސީ މިންގަނޑަ އެއް ދަރަޖައިން ވަނީ މަތިކޮށްފައެވެ. އަދި ޒިޔާދު 11 މަހާއި 2 ދުވަސް ކުށުގެ ތުހުމަތުގައި ބަންދުގައި ހޭދަކޮށްފައި ވުމުގެ ސަބަބުން މި އަދަދު ވަނީ އަދަބުން އުނި ކޮށްފައެވެ.

އެހެންކަމުން މި ދައުވާގައި ޒިޔާދުގެ މައްޗަށް ހުކުމް ކޮށްފައިވަނީ 1 އަހަރާއި 28 ދުވަހުގެ ޖަލު ހުކުމެކެވެ.

މީގެ އިތުރުން މުދަލަށް ގެއްލުން ދިނުމުގެ އަދަބުގެ އަސާސީ މިންގަނޑަކީ 1 މަހާއި 6 ދުވަސް ނަމަވެސް މިއީ މި ހާދިސާގެ ތެރެއިން ޒިޔާދުގެ މައްޗަށް ސާބިތުވާ ދެވަނައަށް އެންމެ ބޮޑު ކުށް ކަމަށް ވުމުގެ ސަބަބުން އޭނާ ތަންފީޒު ކުރަންޖެހެނީ މީގެ ދެބައިކުޅަ އެއްބައެވެ.

އެހެންކަމުން މި ދައުވާގައި ޒިޔާދުގެ މައްޗަށް ހުކުމް ކޮށްފައިވަނީ 18 ދުވަހުގެ މުއްދަތަކަށް ޖަލަށް ލުމަށެވެ.