ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހުގެ ސަރުކާރަށްވުރެ ފުޅާކޮށް މީޑިއާގެ މިނިވަންކަން ދިން އެއްވެސް ސަރުކާރެއް އަދި ނާންކަމަށް މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރާއްޖޭގައި އޮތް އިދިކޮޅު ޓީވީ ޗެނަލް، ޗެނަލް-13 އަށް ބްރޯޑްކާސްޓް ކޮމިޝަން މެދުވެރިކޮށް އިންޒާރުދިން މައްސަލަ މަޖިލީހުން ބޭރުކޮށްލުމާއި ގުޅިގެން އުފެދިފައިވާ ބަހުސްގައި ވާހަކަދައްކަވަމުން ރޮޒައިނާ ވިދާޅުވީ މަޖިލީހަށް މިއަދު ހުށައެޅި ކުއްލި މައްސަލައަކީ ސީދާ ސަރުކާރަށް "ބަވަން" ހުށައެޅި މައްސަލައެއް ކަމަށެވެ.
ސަރުކާރާއި އިދިކޮޅު މެމްބަރުން އެކި ކުއްލި މައްސަލަތަށް ހުށައަޅަނީ މަޖިލީހުގެ މަސައްކަތްތަކަށް ހުރަސްއަޅާ މުހިންމު ބިލުތަކަށް ބަހުސްކުރުމުގެ ފުރުސަތު ގެއްލުވާލާ، ސަރުކާރަށް ފާޑުކިޔާނެ ޖާގަ ހޯދުމަށްކަމަށް ރޮޒައިނާ ވިދާޅުވި އެވެ.
އެއާއެކު ރޮޒައިނާ ވިދާޅުވީ ޗެނަލް-13 އިން ގެނެސްދިން ލަވަތަކެއްގެ މައްސަލަ ބްރޯޑްކޮމް އިން ބަލަން ފެށުމަކީ އެމީހުންގެ ޒިންމާއެއްކަމަށެވެ.
އެގޮތުން ޓީވީ ޗެނަލް ތަކުން ގެނެސްދޭ ކޮންޓެންޓަކީ ގޭތެރޭގައި އާއިލާއާއެކު ބަލޭވަރުގެ އަޚްލާގީ މިންގަނޑު ހިފެހެއްޓިފައިވާ ކޮންޓެންޓުކަން ކަށަވަރުކުރުމަކީ ބްރޯޑްކޮމްގެ ޒިންމާއެއްކަމަށް ރޮޒައިނާ ވިދާޅުވި އެވެ.
ރޮޒައިނާ ވިދާޅުވީ މީޑިއާގެ މިނިވަންކަމަކީ ހައްދެއްގެ ތެރޭގައި އޮންނަން ޖެހޭ ކަމެއްކަމަށް ދެކިވަޑައިގަންނަވާ ކަމަށެވެ. އެގޮތުން މީޑިއާތަކުގެ ނަމުގައި މީހުންގެ އަބުރު ކަތިލުމާއި ފިތުނަ އުފެއްދުމަށް ޖާގަ ދެވިގެން ނުވާނެކަމަށާއި، އެކަންކަން ހުއްޓުވުމަކީ ކުރަންޖެހޭކަމެއްކަން ރޮޒައިނާ ފާހަގަކުރެއްވި އެވެ.
ރޮޒައިނާގެ ވާހަކައިގައި ވަނީ މި ސަރުކާރުން މީޑިއާގެ މިނިވަންކަމަށް ހުރަސްއަޅާކަމަށް ބުނެ ބައެއް މެމްބަރުން ދައްކަވާފައިވާ ވާހަކަތަކަށް ވެސް ރައްދުދެއްވާފަ އެވެ.
"މި ސަރުކާރަށްވުރެ ފުޅާކޮަށް މީޑިއާއަށް މިނިވަންކަން ދީގެން މަސައްކަތްކުރި ސަރުކާރެއް މިހާތާކަށް ނާދޭ"
އައްޑޫ މީދޫ މެމްބަރު ރޮޒައިނާ
ރައީސް ޔާމިންގެ ޒައާމަތުގައި އަބުރުގެ ގާނޫނެއް އެކުލަވާލުމާއި ގުޅިގެން އޭރު އިދިކޮޅުގައި އޮތް އެމްޑީޕީގެ މެމްބަރުން ބޮޑެތި ފާޑުކިޔުންތަކެއް އަމާޒުކޮށްފައި ވެއެވެ. އަދި ރައީސް ޔާމިންގެ ވެރިކަން ބަދަލުވެ އެމްޑީޕީއަށް ވެރިކަން ލިބުމާއެކު މި ސަރުކާރުން ވަނީ އެ ގާނޫނު ވެސް އުވާލާފަ އެވެ.
އެކަމަށް އިޝާރާތްކުރައްވާ ރޮޒައިނާ ވިދާޅުވީ، އަބުރުގެ ގާނޫނުގެ ދަށުން މީގެކުރިން މީޑިއާތައް ޖޫރިމަނާކުރި ގޮތަށް މިހާރު މީޑިއާތައް ޖޫރިމަނާކުރަމުން ނުދާކަމަށެވެ.
އެހެން ނަމަވެސް އަބުރު ރައްކާތެރިކުރުމަކީ ކުރަން ޖެހޭ ކަމެއްކަމަށާއި، މަޖިލީހުގެ އިމްތިޔާޒުގެ ބޭނުން ނަހަމަ ގޮތުގައި ހިފައިގެން މީހުންގެ ބޮލުގައި ބޮޑެތި ކުށްތަކުގެ ތުހުމަތުތައް އަޅުވައިގެން ނުވާނެކަމަށް އޭނާ ވިދާޅުވި އެވެ. އަދި އެއީ ހުއްޓުވަން ޖެހޭ ކަންކަމުގެ ގޮތުގައި ރޮޒައިނާ ވަނީ ފާހަގަކުރައްވާފަ އެވެ.
Advertisement
This content is created and paid for by advertisers and does not involve Voice Journalists
