ޏ. ފުވައްމުލަކުގެ އެތެރޭގެ މަގުހެދުމުގެ މަޝްރޫޢުގެ ބޮޑު ބައެއް މިހާރު ފުރިހަމަ ކުރެވިފައިވާ ކަމަށް އެމްޓީސީސީއިން ބުނެފިއެވެ.

އެގޮތުން އެ ކުންފުނިން މިއަދު ބުނެފައިވަނީ މި މަސައްކަތުގެ 86 އިންސައްތަ ފުރިހަމަ ކުރެވިފައިވާ ކަމަށާއި ސަބް ބޭސް އެޅުމުގެ މަސައްކަތުގެ 92 އިންސައްތަ ނިމިފައިވާ ކަމަށެވެ.

މިއާއިއެކު ސަބް ގްރޭޑް އެޅުމުގެ މަސައްކަތުގެ 66 އިންސައްތަ ނިމިފައިވާއިރު ސައިޓުގައި މިހާރު ކުރިއަށްދަނީ ތާރުއެޅުމާއި މަގުބައްތި ހަރުކުރުމުގެ މަސައްކަތް ކަމަށް އެމްޓީސީސީއިން ވަނީ ބުނެފައެވެ.

މި މަޝްރޫޢުގެ ދަށުން، 122,659 އަކަ މީޓަރުގެ ސަރަޙައްދެއްގައި ސަބްބޭސް އެޅުމާއި، 95,239 އަކަ މީޓަރުގެ ސަރަހައްދެއްގައި ތާރު އެޅުމާއި، 27,450 އަކަ މީޓަރުގެ ފުޓްޕާތް ހެދުމާއި، މަގުމަތީ ނިޝާން ހަރުކުރުމާއި، މަގުބައްތި ހަރުކުރުމާއި، 19,940 މީޓަރުގެ ފެންހިންދާ ނިޒާމެއް ޤާއިމުކުރުމުގެ މަސައްކަތް ހިމެނެއެވެ.

އެމްޓީސީސީއިން ވަނީ މި މަޝްރޫޢަކީ 302.72 މިލިއަން ރުފިޔާގެ މަޝްރޫޢެއް ކަން ފާހަގަކޮށްފައެވެ.