ކުރީގެ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތައް ސާބިތުކުތުމަށް ހުށައެޅި ބޭންކު ސްޓޭޓުމަންޓުތައް ހޯދާފައިވަނީ ޤާނޫނާއި ޚިލާފަށްކަމަށާއި، އެ ސްޓޭޓުމަންޓުތައް ހެކީގެ ގޮތުގައި ބަލައިނުގަތުމަށް ރައީސް ޔާމިންގެ ފަރާތްޕުޅުން ދަންނަވައިފި އެވެ. 

ފުއްގިރި މައްސަލައާއި ގުޅޭ އަޑުއެހުމެއް މިއަދު ވަނީ ކްރިމިނަލް ކޯޓުގައި ކުރިއަށް ގެންގޮސްފަ އެވެ. 

ފުއްގިރި މައްސަލައިގައި ދައުލަތުން ހުށައަޅާފައިވާ ބޭންކު ސްޓޭޓުމަންޓުތަކާއި ގުޅޭގޮތުން ގާނޫނީ ވަކީލުން ވިދާޅުވީ ބޭންކު މީހެއްގެ ބޭންކު ސްޓޭޓުމަންޓު ތަހުގީގީ އިދާރާއަކުން ހޯދާނަމަ އެކަން ކުރެވޭނީ ކޯޓު އަމުރެއްގެ ދަށުން ކަމަށެވެ. ތަހުގީގީ އިދާރާއަކުން ސިޓީއެއް ހުށައަޅައިގެން އެފަދަ މައުލޫމާތުތައް ހާމަކުރުމަކީ ޑިމޮކްރެޓިކް މުޖުތަމައުގައިވެސް އަދި ގާނޫނުގައި ވެސް އަމުލުކުރާ ގޮތް ނޫންކަން ގާނޫނީ ވަކީލުން ފާހަގަކުރެއްވި އެވެ. 

ކޯޓު އަމުރަކާއި ނުލާ ބޭންކު ސްޓޭޓުމަންޓު ހޯދޭނެ ގޮތްތައް ބަޔާންކޮށްފައިވާއިރު، ގުޑް ފެއިތު އެކަމުގައި އޮންނަން ޖެހޭކަން ބަޔާންކޮށްފައިވީ ނަމަވެސް، ފުލުހުން އަމަލުކޮށްފައިވަނީ ގުޑް ފެއިތް ނުވަތަ ހެޔޮ ނިޔަތުގައި ނޫންކަން މީގެ ކުރިން ވޮޑުމުއްލާ މައްސަލައިގައި ފުލުހުން އަމަލުކޮށްފައިވާ ގޮތުން ސާފުވާކަމަށް ރައީސް ޔާމީން ވިދާޅުވި އެވެ. 

އެމަނިކުފާނު ވިދާޅުވީ މީގެކުރިން ވޮޑުވުއްލާ މައްސަލައިގައި ކޯޓު އަމުރަކާއި ނުލާ ބޭންކު ސްޓޭޓުމަންޓުތައް ހޯދުމަށްފަހު ފުލުހުންގެ އާންމު ބަޔާނެއްގައި އެމަނިކުފާނުގެ އެކައުންޓުގައި ހުރި ފައިސާގެ ޖުމްލަ އަދަދު ހާމަކޮށްފައިވާކަމަށެވެ. އެގޮތަށް އެކަން ކުރިއިރު ފުލުހުންގެ އިޚްލާސްތެރި ނިޔަތް ކޮބައިތޯ ރައީސް ޔާމިން ވަނީ ސުވާލު އުފައްދަވާފަ އެވެ.

ހަމަ މި މައްސަލައިގައި ވެސް ހާމަކުރަން އުޅެނީ ރައީސް ޔާމީންގެ ޒާތީ މައުލޫމާތުތަކެއްކަން ފާހަގަކުރައްވާ އެމަނިކުފާނު ވިދާޅުވީ މީގެ ކުރިން ވޮޑުމުއްލާ މަސައްލައިގައި ފުލުހުން އަމަލުކޮށްފައި އޮތް ގޮތަށް ބަލާއިރު، އެމަނިކުފާނާއި ދޭތެރޭގައި ފުލުހުންގެ ނުނިޔަތް އޮތްކަން ފެންނަން އޮތްކަމަށެވެ. 

ރައީސް ޔާމިނުގެ އިތުރުން އެ މައްސަލައިގައި ދައުވާ އުފުލާފައިވާ ކްރިކް ރިޒާގެ ގާނޫނީ ވަކީލުން ވެސް ވަނީ ދައުލަތުގެ ފަރާތުން ހުށައަޅާފައިވާ ބޭންކު ސްޓޭޓުމަންޓުތައް ނަގާފައިވަނީ ޤަވައިދާއި ޚިލާފަށްކަން ފާހަގަކުރައްވާ އެ ސްޓޭޓުމަންޓުތައް ބަލައިނުގަތުމަށް އެދިވަޑައިގަންނަވާފަ އެވެ. 

މިއަދުގެ އަޑުއެހުމުގައި ވަނީ ހެކީގެ ގޮތުގައި ހުށައަޅާފައިވާއިވާ އިތުރު ލިޔުންތަކާއި ގުޅޭގޮތުން ވެސް ވާހަކަދައްކަވާފަ އެވެ. 

އެހެން ނަމަވެސް މިއަދުގެ އަޑުއެހުމުގައި ހުރިހާ ނުކުތާތަކަށް ވާހަކަދައްކާ ނިންމާލެވިފައެއް ނުވެއެވެ. 

މިއަދުގެ އަޑުއެހުން ކުރުކޮށްލާފައިވަނީ ޝަރީއަތް ދިގުލައިގެންދާތީ އިނށީދެ އިންނަވަން ދަތިފުޅުވާކަން ފާހަގަކުރައްވާ ރައީސް ޔާމީން ގެ ސިއްޙީ ހާލަތަށް ބައްލަވައި ޝަރީއަތް ކުރުކޮށްދެއްވުމަށް އެދިވަޑައިގެންނެވުމާއި ގުޅިގެންނެވެ. 

އެމަނިކުފާނަކީ އުނަގަނޑުގެ އާލާސްކަންފުޅެއް ހުންނަ ބޭފުޅަކަށް ވެފައި، އެކަމާއި ގުޅޭ ހުރިހާ ލިޔެކިޔުންތަކެއް ކޯޓަށް ހުށައަޅާފައިވާނެ ކަމަށާއި، އަދި ޖަލުގައި ހުންނަވާ ދުވަސްތަކުގައި އެ އާލާސްކަންފުޅަށް އެކަށީގެންވާ ފަރުވާއެއް ލިބިވަޑައި ނުގަންނަވާކަން ފާހަގަކުރައްވާ ރައީސް ޔާމީން ވަނީ ޝަރީއަތްތައް ކުރިއަށް ގެންދަވާއިރު، ދިގުލައިގެން ނުދާނެގޮތަކަށް ތާވަލްކޮށްގެން ކުރިއަށް ގެންގޮސްދެއްވުމަށް ގާޒީގެ އަރިހުން އެދިވަޑައިގެންފަ އެވެ.